心齋 (已搬遷) 新店位置

已經有一段時間無去過心齋啦，知道最近搬左新舗，所以就同幾個朋友去開餐試試。新環境地點吾錯，交通方便，坐得幾舒服，係個傾偈吾錯嘅地方。我地三個一坐低首先點左乾煸四季豆同咖喱粉絲煲。乾煸四季豆味道都幾辣，而咖喱粉絲煲嘅味道吾錯，夠熱。之後再點左酸辣湯同松仁黑松露醬炒飯，個酸辣湯嘅賣相同一般上海菜嘅有啲分別，但味道又差不多，重胡椒味，夠辣。而黑松露醬炒飯就炒得好靚好好味，夠乾身，粒粒都有黑松露嘅味。以我呢個無飯不歡咁咀“彫”嘅都話好。之後當然係最期待嘅甜品啦，我地點左蓮花糍，棗茸千層糕同桂花糕。蓮花糍入面餡料十足，果然無令我失望。而棗茸千層糕又係繼續keep到水準，棗嘅香同椰甜係天作之合。我一向對桂花都一般般，但朋友點左桂花糕就點都試下，一入口有啲牙，但又吾係大菜糕同魚膠嘅味，而桂花嘅清香又係真桂花嘅味，吾係一啲假嘅香味。整體嚟講新心齋比之前有改良過，環境新左，交通方便左，味道都Keep 得到。下次再去試下其他嘅菜式。