Haveli Authentic Indian Restaurant (已結業)

嘩！最近真係落狗屎，日日落不停落，由頭濕到落腳，晚晚都要開抽濕機先得！收完貨落樓又係落狗屎，附近想搵到有位既就有入啦，又要醫肚又要避雨！印度呢個地方唔太熟，但同公司同生同長既印度哥哥Mr. Singh就幾熟，成日講印度野有幾好食，今次就影d相去威威！我同Peggy叫左幾款野食，首先係奶油咖哩雞塊，唔好睇個兜少少地，食落都幾多！真心有奶油所以食落好滑，好似奶咁滑，咖哩味不太重，係甜咖哩，雞塊份量都多，我地叫左個蒜蓉烤餅一齊送食，烤餅同平時我地食開既好唔同，呢個漲卜卜的，不單止皮脆，咬入里面仲充滿口感，好厚好大塊，除左蒜蓉，仲有d菜味，好似印度香料咁，拿上手唔覺得油喎，三大塊都係$24，抵食！食一個咖哩點夠喉呢？我地叫左白腰果汁咖哩羊肉再加印度香料炒飯。呢個咖哩唔辣，反而好甜，老闆話真係用腰果磨的，營養價值高！羊肉好So，但係我就覺得就係呢陣So味加左分！羊肉好鬆化，唔覺靭播！印度香料炒飯好特別，首先，d米好長，長條形既米，原來係普通米既2至3倍長！除左香料之外，仲有d芫荽tim！加埋一齊幾香口！Singh生話我堅叻，識點印度菜～梗係啦，平時聽埋聽埋，我都識d野架！