PizzaExpress (已結業)

同行有唔係點食肉嘅人，所以今次叫嘅嘢都幾齋。好鍾意佢哋嘅麵包球，同番茄醬、牛油、青醬一齊食，又香又脆。南瓜蓉醬，個南瓜蓉混入咗橄欖油同蒜蓉，以為辣辣哋，食落又幾清，有啲松子仁晌度都幾有咬口。磨菇芝士醬，係用磨菇同大啡菇再加芝士汁整成，食落好香菇菌味，芝士味就一般唔太出。輕盈沙律，入面有南瓜、牛油果、紅菜頭、扁豆、青豆、松子仁、菠菜同低脂芝士，再用黑醋調味，個配搭都真係幾健康，同埋唔算細份。羅勒番茄薄餅，上面係羅勒、水牛芝士、車厘茄、青醬、番茄醬，雖然一塊肉都無，不過食落酸酸哋都唔錯，個餅亦都幾脆。呢晚好似食素咁，久唔久唔食肉都幾好，不過我哋幾個都食得飽，如果係男仔嘅話應該只可以攝牙罅。