美味佳 (已結業)

讀Poly嘅時候，成日都會同啲同學嚟呢度食嘢，因為價錢平，又好食。但係出名越夜越多人，等得耐，同埋唔可以吹佢快啲，所以以前唔夠時間真係唔可以嚟食～今次帶着男朋友重遊我嘅舊地，六點幾就黎到美味佳，依個時間唔算多人，個姨姨亦都好有禮貌咁招呼我哋入嚟，遞埋點菜紙，教埋我哋點樣寫～我仲見到牆上已經冇咗唔可以吹佢嗰張紙添！由於好肚餓嘅關係我同男朋友每人都叫咗一碗車仔麵，車仔麵最抵食嘅食法，梗係叫一隻雞全翼再夾另外兩個餸啦！然之後我哋再叫咗另外一啲串燒。車仔麵最正嘅係個湯底非常足料，有薯仔啊豬骨啊等等等等，佢亦都會比埋啲湯料一齊上，變相多咗幾個餸添！啲串燒就咁多年都冇變過！仍然係咁香口咁好食！可以辣可以唔辣任君選擇！我最鍾意嘅梗係雞全翼啦，蒜蓉金菇都唔錯㗎。不過我哋叫咗牛脷同埋雞腎，兩串都係黑色細細粒，淨係睇個樣係分唔出邊樣打邊樣囉