Rabbitland Cafe

營業中

休息中

我好鐘意兔仔，自己都有養，東京下北沢嘅兔cafe亦有去過。我唔會期望喺銅鑼灣搞兔仔cafe可以好似日本咁，始終香港個土地問題你我都知，但我真係好失望，坐咗20分鐘左右忍唔住走咗。第一，如果係有預約制，咁即係其實都方便員工去控制每個時段嘅客人數目，但我見員工係好似地鐵嗰啲咁入得就入，個場地每張枱仔中間差不多係完全無空間。如果大家只係全程坐喺度食，呢個好似放題餐廳嘅密集式擺法係無問題，但嚟得嘅就會想行出去睇吓餵吓兔仔，走動時，行嗰個辛苦，坐喺度嗰個又會俾人踢到，小朋友心急啲的話隨時PK。解決嘅方法好簡單，你全場擺少一兩張細枱，或者改做擺放多一兩張大枱，確保即使滿坐，客人都有空間走動，成件事安全同舒服好多。第二，其實養開兔嘅人都知，兔仔係鐘意安靜，太多人同一時段咁嘈住，對佢地都唔係咁好。我好明白開業唔係好耐嘅cafe，係會想做得就做，有客就入，但個客嚟到，佢嘅感覺同experience都好緊要，我都相信個owner係真心鐘意兔仔，但個硬件配套方面絕對要改善。