錦華牛雜

營業中

休息中

呢間錦華牛雜喺同一條有幾間分店，街頭嗰間仲要長期好多人排隊，所以立刻排隊先！就咁望只會見到一條隊，但其實係需要俾咗錢先排隊攞嘢食，我地都排咗幾分鐘先發現到。現場只係有個好細嘅牌寫住點餐區，所以大家去嘅時候記得俾錢先。前前後後大概花咗十五分鐘，終於拎到嘢食，我就叫咗一個細牛雜試下，朋友有叫配菜類，主要都係啲打邊爐經常食到嘅食材。其實叫咩都好，處理手法都係大同小異。佢都係煮熟啲食材，之後淋返咖哩汁再加辣醬。牛雜種類大約五至六種，食落唔腥。等嘢食嘅時候，老闆話佢地係用中藥煮過啲牛雜，所以先唔腥。牛雜尚算有味道，但必須要加返咖哩汁先有比較多層次嘅味道。朋友就叫左雜菇，菜，芝士腸等等，但煮得太淋，食材嘅原味已經無咗，所以食落只係食到咖哩汁嘅味道。總括而言，呢間舖頭嘅牛雜比一般配菜類好食，但回頭率唔高，名過於實。