近年香港興起一股食台式芋圓嘅熱潮，各式各樣嘅芋圓甜品舖喺短時間內開到周圍都有，真係總有一間喺左近，有啲估你唔到嘅地方都有芋圓。咁多間，到底邊間嘅芋圓先係最好食、最正宗呢？
最多款芋圓甜品 木子甜品 Muzi Dessert
木子甜品喺香港已經開咗六年咁耐，亦有唔少分店，皆因呢到芋圓嘅煙韌度同台灣食嘅芋圓絕對有得比，而且有超多款以芋圓配搭嘅甜品，當中有仙草、豆花、雪泥，海底椰等等。除此之外，呢間甜品店嘅性價比亦算高，芋圓份量亦足夠，唔怪得開咗一段時間都仲有唔少捧場客啦！
康瑞涼茶係一間今年開始彈起嘅一間涼茶舖，勝在份量多、價錢平，而且大部分糖水都係即叫即造，因此吸引咗唔少人專程去到深水埗朝聖。當中最受歡迎嘅特式仙草百配（左圖），裡面除左有煙韌嘅芋圓之外，仲有地瓜圓、仙草、珍珠、 薏米、 小丸子、西米同紅豆，口感夠晒豐富。要留意嘅係，由於大部分食物都係即叫即整，所以等候時間會比較耐，唔想排隊等太耐嘅話記住早啲去喇！
豆花比芋圓做得出色 豆花先生
葵涌廣場二樓出名多小食店，當然唔少得芋圓啦！豆花先生以手工豆花同芋圓配搭嘅甜品作為主打，雖然食物種類唔算多，但勝在豆花夠滑而且夠有豆味，因此亦吸引到唔少食客。主角芋圓唔算好煙韌，但係都算有咬口同芋頭香味，可惜份量唔多。比較之下，豆花比芋圓做得出色，如果咁啱經過葵廣想過下芋圓口癮都可以一試。
大大粒芋圓 來來小吃店
圖: noknokyuen 、eatnfat
位於小食天堂太安樓嘅來來小吃店，特別在於芋圓比起其他店舖大粒，而且芋圓裡面仲有芋頭肉，夠曬真材實料。款式方面，除左一般嘅仙草、豆花，亦有較特別嘅台式黑糖刨冰，大大碗份量夠晒多。特別值得一提嘅係喱到仲有特別口味嘅芋圓，例如綠茶味芋圓，唔少人食完大讚新奇好味，睇黎各位綠茶控亦可一戰。
新派西式甜品配芋圓 小方糖甜品
相比起上面幾間專賣芋圓嘅糖水舖，小方糖甜品則以賣多種類中西式甜品為主，雖然當中亦有幾款芋圓甜品，但芋圓比較軟身，無咬口，而且無芋頭味，明顯係其他甜品做得比較出色。但勝在可以喺唔同種類嘅甜品上加配芋圓，可以滿足下新鮮感。
最呃Like大熱紫薯芋圓 海記合桃坊甜品
喱間傳統糖水舖以近年大熱嘅紫薯同芋圓一齊推出新款甜品，一上抬賣相已經非常吸引眼球。雖然芋圓同地瓜圓份量唔多，但口感都算煙韌。可惜嘅係芋圓嘅芋頭味唔重，但有大大粒紫薯溶搭夠，啱晒同時鍾意食紫薯同芋圓嘅朋友仔。
喱間賣上海小籠包拉麵嘅小店近期推出左芋圓甜品，價錢非常相宜，啱晒糧尾人士。八寶冰入面包括芋圓、地瓜圓、小丸子、珍珠、紅豆、仙草、薏米同啫哩，以煉奶刨冰做底，味道同口感都超豐富。可惜芋圓同地瓜圓都雪得比較硬身，食落口唔夠煙韌，有少少扣分。
文：Dap
讚好OpenRice專頁！
