邊個話炸雞係泡菜仔嘅專利？有一間菲律賓炸雞快餐店同樣都係受到港人嘅歡迎，喺中環已經有兩間舖嘅呢間餐廳，今日開始喺旺角都有分舖喇，地理位置仲要超方便，一出地鐵站行兩步就到，以後唔使過海都可以食到喇！
11點正式開舖嗰陣，有一班菲籍朋友喺門口合照同衝入舖慶祝。
新店有新套餐，酥脆雞柳套餐，有3件或者5件揀，中環舖都未有㗎！雞柳炸到脆脆香香der，皮薄，油唔算多，但略嫌乾咗少少。點埋佢哋自家調配，帶微酸嘅蛋黃醬汁食都幾夾，不過如果啲醬可以多啲就好喇，唔夠點晒3件呀！
至於薯條，就有芝士同BBQ味揀。BBQ味嚟講，佢係撒咗啲調味粉落每一條薯條度，食落幾香口，不過食多幾條開始就會覺得鹹同埋口渴喇。
香芒蜜桃批細細個，幾啖就食完，咬開啲汁又幾多喎，但桃味唔夠突出。另外，雪糕呀漢堡扒呀意粉呀等等嗰啲嘢食都繼續有得食。
祖樂比
地址：旺角亞皆老街16號旺角商業中心1樓
文：Kar
其他新店介紹：
京都百年抹茶老店 今日登陸中環 抹茶怪焙茶怪出動！（有片）
甜品沙漠天水圍 新開隱世小店 要試抹茶麻糬窩夫抹茶心太軟請早（有片）
拉麵控注意！日本涉谷鹽味拉麵 即將登陸葵芳
隨時接收最新資訊
讚好OpenRice專頁！