香港人鍾意打邊爐，麻辣火鍋、臭豆腐火鍋、芝士火鍋、抹茶火鍋等各式嘅邊爐都同大家介紹過，今次想講下墨西哥火鍋。灣仔一間墨西哥餐廳上月底新出㗎，將當地同香港嘅火鍋文化融合埋，有3款湯底，其中有款仲係素食嘅添。

首先要講下，墨西哥火鍋同我哋食開嘅，最大唔同就係佢冇得淥下淥下，全部係大廚將所有食材煮好晒再拎個煲出嚟嘅，不過咁樣嘅好處就係可以原煲清晒，連湯都飲埋呀，唔使怕會好似平時啲邊爐咁，打打下個湯底就太油太肥唔飲得，同埋大家依然可以自由選擇唔同嘅配料搭湯底。

配料嚟講可以揀要雞呀蝦呀生蠔呀藍、綠青口等等，但一場嚟到，最好就試仙人掌啦，你有幾可食過吖？呢度會原塊仙人掌咁煮（當然冇晒刺啦），煮完出嚟依然口感煙韌，而味道就類似青椒、秋葵嗰類啦，同埋原來仙人掌好有益㗎，清熱解毒保健呀。

至於湯底，全部都係用文火熬出嚟嘅，材料有佛手瓜、捲心菜、紅蘿蔔、薯仔、粟米、南瓜等等，相當清甜，素食朋友都啱食。

而海鮮湯底就係再另外加入各款海鮮：紅魚、八爪魚、墨魚、青口、生蠔之類，個湯底有蔬菜嘅清甜之餘，再有埋魚嘅鮮甜味。而無論邊個湯底都好，都可以加埋青檸、芫荽、洋蔥同辣椒嚟提味，令到成個湯底嘅層次又再多咗，但留意返fresh得嚟堅係會有啲辣呀。

又，仙人掌除咗可以用嚟打邊爐，呢度仲有得煎香佢嚟食，又係另一種感覺呀！爽爽脆脆咁，味就清清地嘅，怕清淡嘅朋友仔就加埋青檸汁食啦，酸酸甜甜der。

Verde MAR
地址：灣仔大王東街24號地下