綠茶醬
唔使我多介紹啦（不過點都要講返兩句嘅），呢隻韓國嘅綠茶醬早前紅到爆。佢嘅texture比較似煉奶，直接拎住個樽倒落塊包度會開心過用刀搽。綠茶味好香，係有少少偏甜，不過綠茶控都會好鍾意。
一試鍾情度：****
麥提莎醬
之前同大家講過香港終於都有麥提莎醬買，開飯仔梗係唔執輸，買咗樽返嚟試啦。打開就見到朱古力醬之餘，仲有一粒粒米白色嘅脆粒，搽勻晒成塊包咁食，啖啖都會卜卜聲，脆脆地咁都得意嘅，不過講真，就唔係好麥提莎味囉，似普通朱古力醬加脆脆多啲，係會有少少失望嘅。
一試鍾情度：***
黑芝麻醬
呢隻芝麻醬有分有糖同無糖，我就揀咗隻無糖嘅，健康啲嘛（好似係）。一打開蓋已經聞到好香芝麻味喇，感覺就係好熟悉嘅芝麻糊味咁。呢隻醬係幾杰身嘅，但搽包食好夾，陣味好香濃，未試晒咁多款醬我已經可以宣佈佢係我嘅新寵喇！
一試鍾情度：*****
蒜蓉醬
蒜蓉醬其實就唔係新嘅，而且有時有心機嘅話，自己整啲生蒜再焗個蒜蓉包應該會更好食。不過，人總係懶嘅。有得直接搽，幾好吖。搽落包度就咁睇以為係牛油，不過聞都聞到蒜蓉獨有嘅香味，食就更加食到。建議懶得嚟都唔好太懶，塊包烘一烘過再搽會再好食啲。
一試鍾情度：****
阿華田醬
以前去歐洲旅行嗰陣食過之後，一試難忘。到最近終於喺香港見得返佢喇，不過就成日都斷貨，想試嘅可能都要碰下運氣。講返佢嘅味，完全就係阿華田嘅味道，平時去茶記食方包飲華田，而家一啖就食得到，完勝！
一試鍾情度：*****
咖吔醬
上面講嗰幾隻醬，你哋都可能試過晒。跟住落嚟要同大家介紹兩隻東南亞嘅醬。首先係咖吔醬。啞黃色嘅醬，搣咗招紙話係黃梅果jam可能都會有人信。咖吔係馬來西亞同新加坡嘅產物，主要係由椰醬同雞蛋整成，所以食都會食得到呢兩隻味，但對比起其他醬，佢嘅味就相對淡口少少嘞。
一試鍾情度：**
榴槤醬
呢隻醬呢，我知係重口味咗少少，但如果你係榴槤迷，應該都會幾鍾意。而且佢雖然榴槤味香，哄個鼻埋去就會聞到，但又唔會話勁到一開就全屋都滲透住榴槤味咁誇張，如果屋企有人唔食榴彈嘅都唔使避開。同咖吔醬感覺一樣都係似果jam，但就杰多少少。冇諗過原來榴槤都可以用嚟搽麵包，值得一試呀！
一試鍾情度：****
文：Kar
隨時接收最新資訊
讚好OpenRice專頁！