香港茶餐廳特色奶茶大搜查

去茶餐廳飲杯奶茶食件菠蘿油，係唔少外國人嚟香港旅遊都會一試嘅地道風味。絲襪奶茶之名源於唔少茶餐廳都用白毛布做茶袋嚟沖茶，日子耐咗茶袋染成茶色所以望落似絲襪。要沖一杯正宗嘅絲襪奶茶，唔同師傅都有唔同嘅配方，甚至連拉茶撞茶嘅方法都有唔同。每個人心中對一杯好嘅奶茶都有唔同嘅定義，以下介紹嘅未必係你心目中嘅「奶茶王」，但以特色嚟計，絕對值得介紹比各位。

瑞記咖啡　熟食中心樽仔奶茶

圖：allmejacque & Duckduckchic
嚟瑞記飲樽仔奶茶咖啡是常識吧？只此一家用窄身玻璃樽嚟裝凍奶茶同咖啡，每支都已經雪過夜，樽身夠凍所以唔洗加冰都夠解渴。奶茶入口茶味濃郁，而且因為無被冰沖到淡茂茂，所以飲到最後一啖都依然嘆到當初第一啖嘅香滑感，餘韻無窮。

良記餐廳(老鳳冰室)　玩味懷舊波波奶茶

圖：yan.fung.92 & 南空冥
想杯凍奶茶最後都咁香濃，除咗諗辦法唔落冰之外，亦可以從冰入手：落奶茶冰！呢間新派茶餐廳以冰室做主題，裝修有玩味之餘出品亦有用心。原味波波奶茶裡面有三粒圓碌碌好似雪糕球咁嘅奶茶冰，令杯奶茶Keep住凍又唔會變淡，貪得意嘅鑿碎將佢當刨冰食亦得。

樂園　美味二合一奶茶紅豆冰

圖：emilypangsy
奶茶飲到悶嘅話，何不嚟個Mix & Match？除咗加咖啡變鴛鴦之外，其實奶茶同紅豆冰亦係好拍檔。樂園嘅奶茶紅豆冰勝在奶茶夠濃滑之餘，紅豆粒粒都綿軟起沙，增加口感之餘亦為奶茶添上甜而不膩嘅滋味，一次過滿足奶茶同紅豆冰兩個願望。

華嫂冰室　隱世冰花奶茶

圖：糖小妹
有麝自然香嘅道理，或者用嚟形容華嫂冰室就最適合不過。嚟呢度飲奶茶記得要點冰花奶茶而唔係凍奶茶。冰都會開花？其實奶茶上面嘅粒粒冰花係小店將奶茶放喺雪櫃冷藏，每隔一陣就拎出嚟攪拌而成，有心思。奶茶入口茶香奶滑平衡有致，味道亦唔會隨時間變淡。

炳記茶檔　大排檔超Cool奶茶

圖：eatingneverstops & keithkkku
唔好誤會，超Cool嘅意思唔係話佢地嘅凍奶茶比其他茶餐廳更Cool，而係講緊佢地個老闆Cool到連CNN記者去都話可以影相但唔接受訪問咁Cool啫。嚟得呢個茶檔，預咗無五星級服務，但就有一杯飄住茶香口感順滑嘅奶茶，凍奶茶亦有水準，但熱嘅更容易飲到幼滑感。