坤記牛腩 (Closed)

與朋友在九龍城區想快快食一餐，路過這間以牛腩為主的麵店就決定幫襯，因為最欣賞這類做得咁「專門」的食店，就好像日本的拉麵店般好專注。除了主打的牛腩，還有牛筋和牛肉，總之，最啱牛魔王如我！湯底有上湯和咖喱兩種選擇，我點了上湯牛筋腩河：牛筋好入味，有咬口得來又不是韌，牛腩很有牛味，正！湯很好味很濃，真的重牛味，原來是牛骨上湯，我大口大口地喝到接近清底！朋友點了上湯牛筋腩撈麵，還很豪的加了$4轉食伊麵，伊麵彈牙，無油，附上的也是牛骨上湯，從顏色已可知道是牛的濃湯！我於星期六的下午1:30幫襯，雖然不是爆滿，但客人是川流不息的，而也許因為大部份駕車的顧客怕被抄牌，全部都是食完就走，不會hea食而霸佔座位。

餐廳貼咗唔同嘅雜誌同報紙嘅報導，細心睇睇，原來呢度嘅牛腩係用新鮮嘅騸牯牛呀，係騸牯牛呀，其實姐係咩？我A姐真係唔識！但報導就話呢款牛係肥瘦均勻，肉味香濃！但因為供應唔多，各位想試騸牯牛真係要早啲嚟排隊喇！上湯牛筋腩河都話食麵要先飲湯，呢度嘅牛骨上湯好香濃，好似啜緊成隻牛落肚咁！越飲越多，就快飲哂成碗喇，不過，飲完係會口渴㗎。至於牛腩牛筋份量好多，牛味好香呀。牛腩係切腩，唔算太肥，仲幾腍添；而牛筋仲正，夠爽口好有彈性，應該好多骨膠原呀，M佬唔好同我掙啦！ 上湯牛筋腩撈伊麵同一樣嘅牛筋腩，一樣係咁好味！不過，伊麵底有少少失望，雖然彈牙爽口，但伊麵唔夠索汁，好彩靠碗上湯頂一頂，牛味濃郁，好鮮甜！酥炸魚皮一個字講晒，脆呀！咬落去卜卜聲，好香魚味，真係好好吃，個個吃！至於去到食完一刻先失望大發現，原來呢度嘅牛腩係分切腩同坑腩，我哋一直無為意，如果切腩都咁好味，咁坑腩未仲好味？！但今日真係無quota喇，下次約班朋友再嚟啦！