十兄弟車仔麵 (Closed)

好耐冇食過地道車仔麵，經過灣仔見到佢個黃色招牌好搶眼，決定入去試試(旁邊係超人氣新景園咖喱小廚)▶️ 自選車仔麵三餸一麵起，有多款配料選擇揀咗勁腍牛孖筋 ($16)、醉雞捲 ($14)、蠔油冬菇 ($12)配波菜麵底 ($15)牛孖筋係皇牌必食推介，見隔離個遊客都叫，冇理由唔試㗎😆一碗有成5-6大條，有啲質感硬啲，有啲就好腍，冇上次「讚好台灣」嗰個咁黏同似啫喱，不過滷得夠入味個人鍾意結實啲嗰啲，食落更有質感，腍嗰啲似食緊肥膏，的確幾值得點醉雞捲有兩件，外表看似普通，味道卻有驚喜浸起湯底入邊依然保持酒香味，咬落仲啖啖肉，只係鞋身咗少少🐔蠔油冬菇相對冇咁出色，一碗有五粒，size偏細，🍄欠缺香菇味，同埋唔太juicy，質感比較實，唔建議叫清湯味道已經好濃，食完都幾口渴😛推介叫多蔥去增添口味👍🏻某程度上係為咗佢個菠菜麵而來，冇令我失望，質感有啲似拉麵加蛋麵而唔係蝦子麵，少少彈牙，浸內阻湯唔會爛雖然冇菠菜味，但係會見到面入邊有啲斬碎咗嘅菜🥬感覺健康啲-以車仔麵來講，水準唔錯環境企理唔污糟晏晝嚟到多人，本身要搭枱，好在咁啱有枱客食完走咗，先搬咗去卡位坐服務好，啲姐姐好有人情味，見我哋搬枱即刻過嚟幫

十兄弟，位於灣仔既車仔麵，新派重新包裝既車仔麵，店舖光鮮💡電話落單，App既介面好靚，樣樣都有相睇，令人更加想食，好多野都好吸引，所以餐廳準備左皇牌必食推介，包括玻璃魷魚、紅燒鮑魚、勁腍牛孖筋等🤤聽到都想食勁腍#牛孖筋+鮮蝦#韮菜餃+香辣豬紅配鮮製油麵加腩汁小辣多葱🍜上枱一刻驚人，驚人在多葱多到呢🫢葱控(=我)一定心動💗濃味腩汁湯加葱就係正，食咩都加一堆好爽😄即刻試鮮製油麵，幾滑幾粗，有啲拉麵感覺而都有蛋味，加葱食正👍🏻 鮮蝦韮菜餃，大粒，一望就知薄皮，個皮滑到好似雲吞皮，好味，濃韮菜味😚勁腍牛孖筋，超大舊好有份量，好入味好腍，配少少辣椒醬仲正🤩辣椒醬係秘製既，辣得黎幾特別，配唔同既餸食都幾正，不過食到我出晒汗，請量力而為🤣香辣豬血都唔錯，加辣椒醬會加分👏🏻再加左半份香炸墨魚丸，炸得好香，一咬好彈牙，墨魚味濃🦑高質整體來講係幾唔錯既車仔麵，最難忘都係爆炸多葱😝必食推介又唔係無見過既食材，但味道就整得幾有特色🫶🏻秘製辣椒醬亦係驚喜，食到辣既朋友真係要試試🌶所以話細節取勝！推介多到食唔晒，咁方便要食多幾次😗

每個禮拜總會食碗車仔麵，食得唔多，但又想試唔同餸嘅我，5餸1麵，份量啱啱好。咖哩牛柏葉 $10 - 3大塊，鍾意佢唔係剪到一條條，而係薄身塊狀，口感更爽脆香辣玻璃魷 $15 - 4件，少少辣，爽口易咬，慢慢辣出嚟極腍豬軟骨 $13 - 2件，入味，真係極軟腍勁腍牛孖筋 $13 - 3件，滿滿膠質紅燒鮑魚 $9/隻 - 幾蚊一隻，過吓口癮菠菜麵 $14 - 十款麵底，揀咗平時較少有嘅菠菜麵湯底丶加咩汁丶加蔥走蔥油都可以自由選擇，而我最鍾意多蔥，第一次叫多蔥，又真係加咗咁多蔥，正！

成日行過都見到排哂隊，今日就嚟試吓呢間新開嘅十兄弟～呢度有超過40款餸可以揀，用QRcode自己落單，外賣仲有9折(當日都幾多人買外賣)，店員姐姐們會主動協助，服務態度好。我就揀堂食，落單即製，要耐心等一陣。天氣凍，胃口特別好，好肚餓… 介紹返～ 本身揀咗5款餸，突然見到有只係$9嘅鮑魚仔，就加埋佢啦！菠菜麵 $14腩汁 多蔥柱侯牛坑腩 $12 都幾大件，味道正常，但未夠腍，有少少難咬勁腍牛孖筋 $12又係大大件，滑到可以直接吞，建議可剪細件啲咖哩牛柏葉 $10呢款係必點，好耐都無食過咁爽又入味嘅牛柏葉！推介香炸魚蓉燒賣 $10比較少見到車仔麵可揀燒賣做餸香辣豬紅 $9爽滑好味！原隻鮑魚仔 $9限時優惠價仲跟埋幾塊生菜 👍🏻