金御海鮮酒家 (Closed)

Majesty Chinese Restaurant

33 Reviews

Taste

Decor

Service

Hygiene

Value

619

Hung Hom

$101-200

叉燒包

2 Recommended

$18

奧志雷

Level4

2.1K

Read full review

可以到金御飲茶真幸福，稻香點心大陸工場生產，質量差劣難食勁多味精，不要預我 ﹗曉廚曉色香味比金御百倍，用料及手藝比金御好千倍。全體同事補足壽星女生日，以茶待酒，生日快樂﹗

幾十籠點心，多到影唔晒啊 ﹗難得十幾廿個同事興緻勃勃飲茶，半間公司同事有成 16 位，浩浩盪盪操來飲茶，認真熱鬧。坐迫少少都無問題，親近一點、開心一點﹗老闆竟然殺到出席，同事們突發寄想打算夾錢請老闆飲茶，最終都係老闆埋單啦，多謝多謝。

中國五千年歷史損腳趾，大家都啜得高興開心又暢快 ﹗羅漢齋鴨掌、滷水豬腳仔、豉汁蒸鳳爪、藥膳雞腳、鮑汁炆雞腳、沙薑雞腳，損沙薑腳趾！再損豉汁腳趾！

羅漢齋鴨掌，墊底的齋碎只作裝飾吧，如此賣相完全提不起興趣。斬成 3 節的鴨掌滾上齋芡慢慢啜，咸香加醬油味，爽爽腳皮搭彈彈腳筋，過足口癮。積奇最愛的點心，見您掛住同斯里亞猿吹水非常好，那幾節鴨掌轉眼就被我消滅掉啦﹗

金御蝦餃，皮薄嚥韌微彈，蝦爽帶鮮，熱烘烘併埋豆瓣醬格外惹味。香芋糯米卷，造型幾得意，薄薄一片芋頭卷住糯米飯，我唔食芋頭架，糯米飯黏黏味濃不油仲香噴噴，淨食都好味。

蠔皇鮮竹卷，薄薄腐皮半透明，餡料若隐若現狀甚誘惑惹人犯罪。立即原條隊入口，大啖一咬燙死寶寶了 ﹗貌似靜蠅蠅沒煙沒氣，誰知只是被厚厚蠔汁遮掩著啊，熱辣辣味濃肉香甜美可口，要搶住食呀。炸明蝦角，其實似足炸蝦餃，外皮鬆脆，內裡蝦爽鮮甜。我較喜歡有沙律醬包在一起的，來點酸咪咪濕潤的味道。

燒腩仔，肥美兼靚仔，高質層次分明，入口皮脆肉嫩，肉汁豐富，咸香恰到好處不嗆不膩，豬皮脆卜卜，瘦肉濕彈彈，留香持久。蒜拍青瓜，陰沉室溫的味道，沒被鹽醃過所以味道偏淡，蒜蓉醋味在外，爽脆多汁，過過口癮可以。

叉燒包，馳名中外，滿分可作招牌點心 ﹗包皮超勁軟塾有彈性，手感一流，放在手中暖笠笠，渣到欲罷不能。撕開觀賞，餡多濕潤爆晒汁，叉燒醬芳香撲鼻，食落甜味得宜。白灼油麥菜，沾點淡豉油，清新的味道，爽甜鮮嫩無比，好食喎。

白灼菜芯，水味突出沒有菜甜味，幸好夠嫩不老亦無渣，靠晒您喇淡豉油。豉汁蒸鳳爪，趁熱食味道剛好不油淋淋，醬甜豉香椒惹味，一啜骨肉分難，皮爽筋彈，損腳趾開心又暢快。布拉腸粉，溫度夠熱，微滑濕潤散發米香，滾上混醬還不錯。

山竹牛肉，巨大肉球滾熱辣，破開兩邊在涼浸浸的喼汁上翻騰幾回，溫度稍降就可以掉到舌尖慢慢嘆。馬蒂芫茜混合球，幼滑帶彈，淡淡然的牛肉味撞著醒胃喼汁，平凡合格。滷水豬腳仔，豬皮爽爽脆脆，瘦肉多汁嫩滑，筋彈彈有咬口，白滷水浸得入味可口，損到停不了。

蒜泥白肉，酸味濃郁，大量蒜泥密麻麻鋪在表面，惹味出眾，酸酸甜甜十分開胃 ﹗薄薄白肉火腩迷人軟綿極具彈性，索汁好味道﹗

魚香茄子炆伊麵，平時我自己食都會要求全走，走蔥走芽菜走韮黃。點解師傅勁落韮黃芽菜架？兩樣我都唔食，又要花時間慢慢挑走喇﹗咸魚梅香吸引，肉鬆嚥韌，茄子爽滑，伊麵調得味濃微辣，過濕過腍而油淋淋，不過不失還入得口。

醬皇金錢肚，極度爽彈，醬皇厚厚芡芡亦不能掩蓋微弱羶味。咖哩牛孖筋，新產品？碎濕濕牛筋粒，腍滑微辣淡口，試一次便夠。糯米珍珠雞，懷舊包法有咸蛋黃在內堅香口堅好食百倍。油紙吸去多餘水份及蒸氣更加乾爽，而且將所有精華及香氣都包得緊緊在內。糯米黏黏濕潤，散發強烈荷香及飯香，肉碎醬汁調得出色，無投訴。

椒鹽黃金磚，炸得金黃奪目，賣相吸眼一流。雖然外脆內嫩豆味純厚，最敝唔夠熱呢，味道大打節扣 ﹗香煎蘿蔔糕，這世上只有阿媽的蘿蔔糕最好食最真材實料，無可替代 ﹗幾粒叉燒碎、幾粒蝦米碎，食到蘿蔔味但食不到蘿蔔絲，溫度夠熱而兩面煎香，入口鬆散，鬆性欠奉，味道合格的。

皮蛋瘦肉粥，我自己都估不到會讚酒樓粥品，真心煲得不錯喎 ﹗粥底棉棉帶著甜美瘦肉味，連粥帶料齊齊食格外精采。生煎包，食肉獸完全體的我對包類及粥粉麵都提不起勁呢﹗厚厚油油的包皮，一丁點的豬肉餡，雖然麵包味香甜非凡，都係再見吧。

家鄉煎薄罉，傳統客家菜色，阿媽好喜歡在家中自己煮弄。微暖咸咸油油，趙落綿綿有蔥油香有少少焦香。燒味併盤，基本五味，海蜇燻蹄、蜜汁叉燒、玫瑰油雞，燒鵝。海蜇燻蹄，金御海蜇燻蹄味道居然跟我兒時味道一模一樣，使人非常懷念，第二間食唔到。淋上麻油酸醋，醒腦震奮 ﹗燻蹄豬肉味甜味非凡，瘦肉質感夠軟綿，豬皮膠彈有嚼勁，咸香討人喜歡。海蜇雖然不及兒時粗條爽脆，不過味道一樣出類拔萃 ﹗

蜜汁叉燒，乾鞋有點韌，食到到蜜餞，只有咸咸的味道。玫瑰油雞，大肥雞的髀，黃色肥膏一舊舊，咬掉食得更舒服，白肉嬌嫩滲著雞汁，薄薄雞皮全滿甜豉油味道，食得過的。燒鵝，肥騰騰油淋淋，一咬爆油吃不消，幸好肉香帶滑又帶甜，平凡唔難食。

白灼芥菜，甘甜味出眾，爽嫩爆水，最緊要趁熱食，放涼使到菜甜味大打節扣。炸魷魚鬚，硬硬魷魚殼不鬆脆，魷魚鬚韌韌的不爽彈，唯有可取味道鮮甜，浸上喼汁同吃十分可口醒神。蟹子燒賣，我最愛的肉球，食肉獸的良伴。半肥瘦甘香啖啖肉，結實彈彈不鬆散，豬肉甜、蝦肉鮮，熱騰騰新鮮出爐，燙燙的美味。

四寶雞紮，我都話最憎芋頭咯﹗都唔知何時開始用上芋頭，兒時都係用豬肚、火冬菇、蟹柳、等等，好味百倍。雞柳泛著隔夜酸縮味，火腿條極大條，咸度指數十分高，不過非常彈牙，魚肚薄薄細細，吸汁力微弱，爽爽似豬皮。腐皮蒸到過火乾爭爭，雖則唔好食，但我都食晒無浪費。

薑蔥蒸牛柏葉，腍劈劈不爽不彈，薑蔥芡厚厚一舊舊有點可怕。咖哩魷魚，顏色暗淡黑媽媽，水魷鬚震騰騰，咖哩汁彈到滿檯都是了 ﹗清淡的咖哩水，爽爽的鬚及彈彈的身，簡單普通過口癮。香滑雞粥，足料大量雞件，雞肉沒什麼味道，但掛上綿綿粥底竟然味道鮮甜，真的要食多兩啖。

錦滷響鈴，普通的炸響鈴配上甜酸汁吧，香脆開胃。蘿蔔酥，凍凍的使到油膩感倍增，酥皮鬆化，蘿蔔蓉餡清甜，造得蠻有水準。豉椒蒸排骨，油光立立令反晒光，骨多肉少非常失望。

川芎白勺魚頭湯，個個同事都勁客氣怕醜，客氣生疏食少好多﹗話知理，我唔客氣獨佔成碗湯咯，好好飲呀 ﹗我最最最愛的魚湯 ﹗雖然不是大魚頭，又不是奶白色的湯汁，味道質素已經不俗 ﹗濃濃藥材味，淡淡魚鮮味，清澈的湯底，飲完暖笠笠，啜埋魚頭損得乾乾淨淨更暢快。

豉椒排骨炒河，味道煮理恰到好處，多汁惹味可口，咸甜辣十分平衡，最衰粉粉散碎不夠完整，未能一氣呵成大啖大啖地吸啜。細細粒排骨排烚烚，質地乾硬鞋。我需要辣椒醬，不過酒樓經常只給豆瓣醬，味道咸而不香辣，還食到成口都係辣椒皮，激死我﹗

北菇棉花雞，北菇彈彈多水，魚肚軟棉嫩滑，雞柳香甜入味，齊住所有材料一齊食才是皇道，百味融和豐富，那有不好吃的理由。沙薑雞腳，咸味得宜，雞腳黏滑兼備，每口充滿雞汁與沙薑味，味美滾動。潮州粉果，脹卜卜的芫茜蔥粉果！青味太濃食不到，抱歉。

叉燒腸粉、牛肉腸粉，勁蔥叉搭勁蔥牛，免強頂得住那股青味，腸皮滑但厚厚的，夠飽肚啦。豉油皇鵝腸，爽脆滑溜，豉油清香不濁剛剛好，大注大注塞入口，爆汁舒到到震。乾炒牛河，琪姐您碟乾炒牛河走牛肉加扣底嗎？點解得幾條河粉，芽菜同蔥就勁多喎，牛肉在那啊？靜態地演繹，暖暖的沒有鑊氣可言，幸好生抽老抽比例均勻清甜香氣脫俗。

鮑汁炆雞腳，無敵膠滑黏，入味多汁，啜得開心。衰在炆到甩皮甩骨，賣相驚嚇。口水雞，另類煮理加入勁多豆豉，造錯豆豉雞嗎？花生香、豉味濃，油而不辣配上雞肉軟腍還可以。松草花蒜蓉蒸排骨，似乎多此一舉、畫蛇添足，草還草、骨還骨。大大舊鞋口排骨滲著蒜香，話晒都有啖肉食。