新泰東南亞餐廳 (Moved) New Location

已經好耐冇食泰國菜啦今次去呢間真係幾正，好多菜式都好啱我口味，一定會再去多次！我地叫咗香芒牛油果軟殼蟹卷 $88，勁多食，好足料，芒果、牛油果、蟹肉、紅蘿蔔、肉鬆、蒜片，係甜同咸味之間取得平衡，鮮甜得黎又唔會似甜品，因為有啲蒜香味。第一碟上既就係泰式生蝦$98，有5隻，大大隻，非常推介，因為真係好新鮮，一路有冰鎮住，而且有保鮮紙隔住。點返個泰式生蝦汁，辣辣地，可以為鮮甜既蝦味加多點口感然後就係好期待既馬來西亞肉骨茶 $78、鹹魚炒芥蘭$72，同埋加咗一碗白飯$20，因為肉骨茶同菜都適合用白飯黎餸，先唔會太咸。依個馬來西亞肉骨茶同新加坡肉骨茶好唔同，雖然我比較中意新加坡果種，以前係新加坡食過一間好好食就返唔到轉頭，但係依個馬拉肉骨茶都好有佢既獨特之處同味道。依隻係以藥材為湯汁，加豬肉、冬菇一齊煲，岩哂中意藥材湯底既人餸白飯一流！我個人中意食肉骨茶湯飯。

兩口子去左灣仔二德惠睇整麵包材料 順便食晚飯由於灣仔係小編媽媽嘅地頭 就問下佢有咩好介紹最後 佢就叫我地去食盧押道果間「新泰東南亞餐廳」門口裝修到好似泰國spa咁 淙淙流水聲好relax不過上層先係客人用餐嘅地方 冇升降機嘅 如果有行動不便既朋友就要留意一下啦～一貫較暗嘅spa風 裝修依舊充滿泰味兩口子叫左生蝦刺身($98)、豬肉生菜包($68)、南瓜焗咖哩海鮮($148)同印度薄餅($30)生蝦刺身就係食泰菜必食嘅 一共有6隻 爽口又新鮮 醬汁酸酸地好開胃生菜包既豬肉粒粒分明 香口又回辣  而且肉粒肥瘦適中 配埋鮮甜既生菜包埋一齊好正 絕不油膩一開始以為南瓜咖哩係焗飯黎 原來有飯果個係另一款(日本南瓜焗海鮮飯-$108)大大個南瓜從入面全部都係香濃但唔算辣嘅咖哩同仲有豐富嘅海鮮  包括青口、魚、墨魚同蝦等等由於原來冇飯跟 所以我地叫左個印度薄餅點咖哩食薄餅外鬆內軟 牛油味勁濃 配埋咖哩汁一齊食好夾好好食 感覺嗌左錯係賺左添果然係媽媽一星期要食3次嘅食堂搵次都要做乖乖女 陪媽咪黎呢度食lunch先～

同朋友plan左好耐要食泰國同埋東南亞菜，於是上左openrice搵有咩好推介，結果搵到呢間新泰東南亞餐廳頭盤就叫左呢道泰式生蝦沙律，D蝦食得出有鮮味，點埋秘製酸辣醬就更加完美了食泰國菜又點小得馬拉盞通菜呢佢調配得唔係好辣，對於我呢D唔係幾食得辣既朋友就非常好！味餸亦都好香，加左好多分。呢道青咖哩羊架真係非常好食，我自己本身好鐘意食羊，所以就叫左。估唔到有驚喜，如果可以既話唔洗全熟會食到更嫩既肉質。雞，牛，豬串燒係全晚入面最好食既一道菜，熱騰騰而且調味恰到好處，必吃推薦！

週二跳舞，發現盧押道口新開咗間「新泰東南亞餐廳」，上OpenRice見未有人寫食評，所以週四與情人約會立刻改地點進行 。餐店地下o既接待處擺滿鮮花及泰國飾物，令小肥諗起公司附近一家東南亞料理，細問下先知原來兩者都係同公司o既分店 。用餐區設於一樓，食客必先行上樓梯。樓梯頂o既吊燈、牆上o既裝飾、同四周o既擺設一樣咁有特色 。散座大堂分開幾個區域，樓梯旁望向窗一列單人高櫈，隔離就擺咗幾張二人枱。大廳一邊有方形合拼式o既四至多人位。入內水吧旁則擺咗張大圓枱。想要多少少空間可選擇凹咗入去o既梳化位，感覺好似間假房咁 。椅櫈大多為藤造，簡潔涼爽。襯埋頭頂上o既藤罩燈飾及餐具下o既藤墊，泰味濃厚。 兩口子被安排入座二至四人o既梳化式卡位，闊落舒適。Honey留意到牆邊掛有僧人o既背影，唔知係咪有咩玄機呢？！厚厚o既餐牌中英對照，亦附有彩圖，好易明。 泰式生蝦（$98）：生蝦不但外表晶瑩剔透，咬落更爽脆無比，連同伴碟o既生蒜片同泰式辣汁食真係辣得好醒神，嗜辣o既honey更大讚馥郁香濃， ！ 冬陰功（$48/細）：冬陰功湯辣勁夠，海鮮湯料又足，情人話$48真係好抵飲。 蒜茸越南