2025年開年飯局攻略 | 屯門7大燒肉火鍋放題推介

迎接新一年，緊係要一班人齊齊整整食得豐富啲啦！而屯門市中心有多間燒肉火鍋放題餐廳任君選擇，無論你想一個人靜靜享受專屬時光，定係拉埋朋友暢食，都一定搵到啱心水！燒肉香味四溢、火鍋熱辣滾燙，屯門美食帶你開啟新一年嘅幸福味道。快啲mark實屯門7大燒肉火鍋放題推介，一齊用美食激發新一年嘅無限動力啦！

日本農場直送佐賀和牛｜佐賀燒肉谷

食和牛迎接2025年夠晒奢華！今年就約齊親朋好友，去屯門市廣場3樓嘅佐賀燒肉谷食旺佢啦。呢度主打日本佐賀縣農場直送嘅佐賀和牛，全場無限量肉類、海鮮放題，逾百款配料任食。包括牛味濃郁嘅澳洲和牛原塊板腱、煙燻壺漬封門柳等等，CP值好高呀。

呢度有4款燒肉放題套餐揀，推薦Lv.3套餐以上！因為可以免費飲埋日本清酒、梅酒同SAPPORO生啤，CP值非常高。而且牛肉上枱時以木架天梯擺放，儀式感十足，鍾意食肉類定海鮮都可以無限追加，啱晒一班人唔同口味。如果揀「Lv.4 日本佐賀A4和牛海鮮」放題套餐，而家仲可以更可免費升級任食「燒生白鱔」，鮮嫩嘅白鱔肉質配上燒烤，絕對係不可錯過嘅美味。今期仲有「鮮主題美食（魚+羊）」，平時好少燒肉餐廳有羊食，而家可以試埋羊小腸串、香草羊架、孜然羊肉串、羊黑毛肚串、吉列多春魚、黑魚片湯等一系列主題美食啦。

佐賀燒肉谷可以無限任食高質靚牛，開飯仔推介必試煙燻壺漬封門柳。

今期「鮮主題美食（魚+羊）」有羊小腸串、香草羊架、孜然羊肉串等，非常豐富。

IGable台灣火鍋放題｜山見台式火鍋

一班親友相聚除咗圍爐燒肉，仲可揀一齊圍爐打邊爐，開飯仔推介大家要嚟屯門呢間好IGable嘅台式火鍋放題—山見台式火鍋！餐廳門口離遠已經見到「十分車站」門口，入面仲好似台灣「十分老街」咁，放滿台灣舊式郵筒、懷舊海報、天燈裝飾、台鐵火車頭等等，絕對有一秒飛到台灣錯覺。

台灣人除咗打邊爐，仲好鍾意浸溫泉。而家山見台式火鍋就有推出個全新溫泉台式火鍋主題，提供多款台灣溫泉名物—鹽焗溫泉蛋、古法窯雞等，用味蕾感受溫泉風味。全店有5款套餐揀，推薦「Lv.4特選和牛海鮮餐」，任食特選澳洲和牛、澳洲和牛肩胛肉眼、頂級無骨牛小排、花膠同原隻鮑魚等。仲有台式小食同甜品，好似蚵仔煎、惡魔雞排、九份仙草椰果芋圓、十分愛玉花生芋圓都好少喺放題店見到。

門口好IGable。放滿台灣舊式郵筒、懷舊海報等，絕對有一秒飛到台灣錯覺。

「Lv.4特選和牛海鮮餐」任食特選澳洲和牛、澳洲和牛肩胛肉眼、頂級無骨牛小排、花膠同原隻鮑魚等，仲有台式小食同甜品。

高級燒肉の懶人福音｜焼肉焔

想享受專人代客燒肉，呢間高級日式燒肉—焼肉焔就啱你喇。呢度主打上乘燒肉，身處雅緻日式環境品嚐日本每日直送嘅和牛可令你放鬆身心疲累。店員會為肉品親身講解，而且可以全程幫你燒，確保熟度啱啱好，絕對係懶人福音！

嚟到一定要食名物！菠蘿漬鑽石和牛胸腹肉，菠蘿入面放滿和牛令肉味帶果香之餘，水果天然酵素仲會分解軟化和牛蛋白質，所以肉質特別鬆軟㗎。鍾意油香嘅話，推薦鹽燒特上三角牛小排，入口化出油脂有種入口即融感覺。另外人氣高企嘅醬漬原條封門柳真係好濃肉味，肉控一定會愛上！海鮮愛好者一定要食埋龍蝦尾，辛辣蔥蒜同蒜香牛油，令彈牙嘅龍蝦肉更有香味。

高級日式燒肉—焼肉焔可專人代客燒肉，靜心品嚐日本每日直送和牛可令你放鬆身心疲累。

名物！菠蘿漬鑽石和牛胸腹肉。菠蘿天然酵素會分解軟化和牛蛋白質，和牛特別鬆軟又有果香。

涮涮鍋+高質小食區｜牛気

涮涮鍋迷嚟到屯門都有好推介！屯門市廣場3樓嘅人氣日式火鍋放題牛気有多款湯底揀之餘，仲有壽喜燒選擇㗎。全店提供6款放題套餐，人氣之選「Lv.5澳洲極上和牛＋海鮮放題」可揀秘傳牛肉清湯底，任食澳洲極上和牛、穀飼黑安格斯牛等牛肉，更免費升級日本和牛肩胛肉眼，脂肪同油花豐富，口感軟嫩。將牛肉放入湯底涮一涮，牛肉原始肉味發揮得淋漓盡致！同時仲有嚟自世界各地嘅帆立貝、青口、鮑魚、大蝦等海鮮任食，每啖都充滿冬日幸福感。

呢度自助區亦係一大亮點，好少放題火鍋有咁多小食。依家到1月21日仲有「和洋祭」火鍋主題，提供多款西日料理—意式番茄肉丸、紅酒燉牛肉、迷你蘋果脆脆撻、迷你雜錦脆皮泡芙、吉列炸蝦、咖啡拖肥味軟雪糕等。就算小朋友一齊嚟食涮涮鍋都好多嘢食揀，啱晒一家大細或多人飯局。

「Lv.5澳洲極上和牛＋海鮮放題」可揀秘傳牛肉清湯底，任食澳洲極上和牛、澳洲殼飼黑安格斯牛、免費升級日本和牛肩胛肉眼等牛肉，以及嚟自世界各地嘅帆立貝、青口、鮑魚、大蝦等海鮮。

1月21日前有「和洋祭」火鍋主題。提供多款西日料理，啱晒一家大細用味蕾enjoy新一年節日氣氛。

和牛迷必食｜牛角日本燒肉專門店

呢間嚟自日本嘅超人氣燒肉店，多款醬汁由日本直送，同日本一樣口味，用合理價錢就食到唔同國家嘅靚牛肉，包括日本黑毛和牛、澳洲和牛同埋美國和牛，仲可以任食各類海鮮、豚肉、野菜等。

牛角有5款放題套餐揀，想要高CP值推薦「Lv.2嚴選美國和牛放題」，用中等價錢就可任食美國和牛、香蔥溫泉玉子飯等。鍾意高級享受就可以揀「Lv.5究極日本和牛放題」任食日本九州黑毛和牛、鮑魚、松葉蟹腳、甲羅燒等，無論牛肉定海鮮都係必食之選。另外仲可以加錢無限暢飲生啤，將燒肉派對氣氛推到最高！

「Lv.2嚴選美國和牛放題」用中等價錢就可任食美國和牛、牛舌、香蔥溫泉玉子飯等。

「Lv.5究極日本和牛放題」集合矜貴食材—日本九州黑毛和牛、鮑魚、松葉蟹腳、甲羅燒等，輕鬆食回本。

享受Me Time｜牛繁一人燒肉

有時想自己靜靜哋食個燒肉但又怕尷尬？屯門市廣場AEON百貨有間東京人氣一人燒肉牛繁就啱晒啦！呢度有多款一人餐，牛肉嚟自美國、澳洲同日本，價錢合理分量大，仲可以享受me time𠻹。

一人餐選擇有「牛胸花套餐」、「牛舌套餐」、「豚肉套餐」等，提供肉類gram數選擇，唔驚食唔晒。另外特別推介「日本十勝和牛西冷套餐」畀識食之人，和牛佈滿油花真係入口融化。選擇困難嘅話可以揀「四重奏套餐」，有齊蔥燒牛胸花、汁燒肩胛片、味噌豬五花、柚子胡椒雞腿肉，夠晒豐富。套餐之外，唔好錯過單點嘅南國元氣雞頸肉、九州雞生蠔肉、九州雞橫隔膜肉。全部日本直送，雞肉係透明感櫻花粉色，食落肉質彈牙、雞味香濃。

提供多款一人餐選擇，價錢合理分量大。

可以單點日本直送嘅南國元氣雞頸肉、九州雞生蠔肉、九州雞橫隔膜肉等。櫻花粉色雞肉彈牙、雞味香濃。

無限爐邊芝士｜炑八韓烤

韓迷一定要mark實屯門市中心呢間韓燒餐廳，主打地道韓味嘅炑八燒烤。除咗必食招牌燒韓牛，推薦肩胛肉、護心肉等部位，肉類採取低溫保存，即叫即切特別新鮮。呢度仲可以無限任加爐邊芝士、泡菜蛋，啱晒芝士控。

必食23cm長王者牛肋骨，一上枱已經好震撼！霸王級別嘅份量，並以韓國梨蓉、洋蔥、蒜蓉、麻油等醃製10小時，肉質鬆化又有淡淡清甜梨香，難怪唔少粉絲都希望佢成為餐廳嘅常駐產品。另一大愛厚切五花腩，邊燒邊爆出油脂好療癒，用生菜、泡菜包住五花腩一齊食更有層次。當然唔少得近年人氣大熱嘅鹽蔥牛舌、韓國鰻魚，都係必食之選。除咗燒肉之外，亦有好多韓國前菜、主食、嘢飲、甜品㗎。