仙滿堂

Open Now

Now Closed

total叫左一個綠茶丸子，一個oreo脆脆丸子🍡，之後再加左一個焦糖布丁🍮，啲奶蓋比咗好多而且好creamy😋😋賣相不錯，但兩個人各食咗六粒丸子之後其實都幾飽下😂個布丁都幾好，唔似傳統布丁有層啡色焦糖喺面，但個布丁好動L好彈，質感偏向啫喱但都幾fit我嘅取向，佢個布丁唔會話超甜超多糖～～ 因為新舖開張所以服務員唔係太熟手，不過服務態度良好，有職員lead我哋入座同講到明有最低消費等等，相信日子耐咗會有改善；環境嗰度都幾舒服。但沙田終於多返間甜品舖😭😭😭

已經食飽晚飯、行經見新開都可以試下既，準備入坐便比個收銀姐姐的態度嚇親她在講解他們堂食既規矩，每一個人入坐均要消費，（但並沒有提及有加一服務費）已感到她很不有善，繼而甜品上場，第一口便覺得不對勁，紅豆太硬、再來一口所謂豆腐花很一般、老實街市好食過佢，奈何試新店之前冇上open rice睇食評，睇左就唔會浪費時間、好在同行有小朋友食野冇要求，抵得諗幫我食左去。。。沒有因為唔好食而浪費、內心才好過些其實依家租金甘貴、食物質素和服務都冇競爭力，不作改善，一定很容易被淘汰。

難得與朋友一聚，去左呢間新開的沙田甜品舖。叫左兩個甜品：仙草2號 $55紅豆、薏米、寒天：一般仙草：正常發揮布丁：呢舊真係驚天大布丁，請大家欣賞以下如圖中所見，舊布丁係硬到可以俾隻羹插住並懸於空中，而且完全冇跌落嚟嘅跡象。口感與大菜糕相似度達99%，而且味道亦係唔好食嘅❌ 如果係叫其他野想加布丁，要成$10！誠心奉勸每一位睇到呢度嘅讀者，請千祈唔好叫布丁‼️招牌紅豆湯 $50所有配料都合格，不過不失，但呢碗嘢比較似係紅豆「湯汁」而唔係紅豆「湯」。因為配料太多，紅豆湯頓時由主角變左做茄喱啡，連對白都冇嘅嗰種茄喱啡🙉 熱度方面，正常紅豆湯上菜應該係熱騰騰，但由於仙草係凍嘅、芋泥都係凍嘅，於是上到嚟碗嘅已經變咗暖暖哋偏凍🌨️ 而家係夏天我食呢碗嘢都嫌凍，更莫講係冬天嗰陣，食到嘅人係會幾咁失望🚬總結：最終由於食物質素差，所以兩碗都冇食晒。係價位唔平、環境很狹窄、用餐時間限時1小時、每人最低消費要叫一樣嘢嘅規範下，實在有太多其他選擇。唔會食第二次仙滿堂🙅🏻‍♀️

去商場超市看上有間甜品店，望上有至愛的芋圓,在不用等的情況下決意入內試。。。環境是比較細，自行以QR Code落單已是常事，要來一碗（芋圓/紅豆/珍珠/迷你白玉/豆花的）【招牌豆腐花】作品成為HK$50. 食物水準中中平平，可能自己偏愛芋圓感覺上就比同類型（豆乳XX）為少，所以話一有比較就絕對有傷害，不作比較總是合格水平⭐️⭐️⭐️★此店有加一服務費★

第一次來，是中午四五點的時候。門口沒店員， 便直接進去。一進去，但被店員趕，要出返門口， 要重新由門口等佢地帶位入去。 怎麼辦？ 食個糖水以為遇上了訓導老師 及風紀了嗎？ 店內人不多，印象中好像只有一枱。我們想坐得寬敞一點的位置， 卻帶到去最角落最逼夾 的二人位。 無所謂，去到此， 心想只此一次而矣。 我們叫錯了東西， 三秒內已經立即發現，立即要求更正。 外面店員 未入廚房，已經大大聲大叫：「整左啦喎！」， 我火都黎：「三秒前， 點整好左呀！ 」 。 此外， 此糖水店 係要收加一服務費， 老牌滿記 、對面商場 九龍城過江龍 x記都不會收服務費。一碗糖水成六十蚊 ，但待應惡過乜， 完全不建議去。

八月堂敗走後,期待己久終於有台式甜品進駐新城市,由圍板直至“仙滿堂”開業,坦白說能夠令我一個6月份每個星期都幫襯嘅甜品店只有這裡,無論店員由帶位及介紹落單,均態度親切及有禮貌,全程以QR code 落單,方便快捷,環境及枱櫈亦非常乾淨衛生,食物方面點左”3.5牛乳雪糕杯系列”Oreo麻糬杯”第一層一啖牛乳雪糕,超濃香牛奶味,第二層水晶凍清甜,第三層Oreo麻糬,Oreo餅碎x麻糬嘅煙韌,好味到震呀！再來豆腐花系列“豆腐花牛牛~配料多到呢,有豆腐花,紅豆,珍珠, 芋泥, 芋圆.竟然仲有埋3.5牛乳雪糕,份量足,值得一讚豆腐花超滑,有豆味🤣,芋圓質素亦很高,夠晒煙韌😋又要等下星期再來幫襯👍

唔知啲喊喊係咩事；但作為一個長居台灣嘅香港人，我覺得呢度啲甜品好正常 — 甚至係幾正宗嘅台灣口味。喂大佬，芋圓本身係冇味㗎；你飛去台灣食都一樣。而且呢度份量好足，CP真係唔差。係坐得比較迫。不過服務同清潔都好ok…唔通我去咗二次元？！應承咗個靚女比笑笑幫佢地平反，咁我唯有寫足200字。點了招牌燒仙草同招牌紅豆湯；味道都好台灣道地。唔可以話有驚喜，但起碼十分正常。服務員有啲生疏，但招呼真的不壞。唯一諗到批評嘅係地方淺窄；但香港地係咁㗎啦；另一間「滿字頭」咪又一樣🙄

喺呢間店嘅短短3-40分鐘，真係好似發咗場惡夢！1. 職員反覆出錯無論由帶位，去到入座後服務。職員都好多嘢出錯，不停要改單、改餐、做嘢甩漏。情況非常恐怖。2. 運作非常混亂落咗單差唔多半個鐘， 連我哋更遲入座嘅客人點嘅餐都上枱， 佢先走嚟同我哋講冇曬桃膠， 可唔可以轉其他食品？ 咁都算，但職員更擅自將我哋嘅食品由熱食轉為凍食。 落單情況混亂。3. 服務惡劣、環境污糟不斷改單、冇嘢食不特只。食肆環境十分之惡劣。無論枱面、還是地面。全部都係食物碎。無一個職員去清理同理會。同埋後面客人已多次要求比多支餐具， 問完又問， 職員一陣就唔記得咗。咁嘅服務質素都要收10%收費。相信任何一個客人都唔會食得自在。4. 食物質素差我出世至今， 食過最難食嘅芋圓、布丁就係呢度食到。 芋圓臭嘅、布丁硬嘅、紅豆硬嘅、豆腐花怪怪地。總之冇樣嘢正常，好難食。真係貼錢比我，都唔會再去食。我食咗少少已經走咗，冇下次，拜拜。

見沙田開咗新嘅台式甜品店，見商場簡介話餐廳師傅係專程去台灣學藝，主打仙草同芋圓等台式甜品，身為煙靭控嘅我當然要去試下😜▫️招牌豆腐花 ($50) 3/5豆腐花食落幼滑，覺得唔夠甜嘅話可以自己加糖水。芋圓、地瓜圓同紫薯圓都幾煙韌，但係就冇乜味，都係食佢個口感。▫️焦糖香蕉黑糖麻糬牛角包窩夫配3.6牛乳雪糕 ($88) 4/5牛乳雪糕奶味好重，同壽司郎嗰款牛奶雪糕味道相似，亦都可以免費轉比利時朱古力味，大家要轉嘅話記得先同店員講聲先自助落單。窩夫上枱嗰時仲暖暖地，外層食落好香脆，但係就做唔到內層酥軟濕潤外脆內軟嘅口感。面頭嘅黑糖麻糬軟糯煙靭，焦糖香蕉煎到金黃色，配埋雪糕一齊食都唔錯🤓食嗰時發生咗一段小插曲，店員唔小心倒瀉咗糖水，連埋我有4-5個人都比糖水彈到腳，但係店員竟然淨係掛住拖地，冇講過唔好意思或者問下我哋需唔需要紙巾😮‍💨自助落單再加咁嘅服務都要收加一服務費就有啲過分😅Overall rating (5粒⭐️為滿分)味道：⭐️⭐️⭐️⭐️服務：⭐️⭐️環境：⭐️⭐️⭐️性價比：⭐️⭐️⭐️

新開嘅仙滿堂主打食仙草+各類配料，仲有雪糕、嘢飲等等。最低消費一人叫一樣野，有加一收費，所以都係偏貴嘅糖水選擇。平日夜晚都好多人食，星期五、假日都可能要排下隊。*招牌仙草 $55仙草帶微微甘甜，質感水嫩動L，係一個好仙草凍。芋圓有大約十粒，屬於粉多嘅芋圓，彈牙軟軟地。顏色偏淡，芋圓蕃薯味好淡。薏仁、紅豆都係微微甜，薏仁有咬口，紅豆口感綿綿，有顆粒感，兩者配仙草都好夾。白玉質感似湯圓，煙煙韌韌，我好喜歡。

外賣🥡招牌仙草真係好大碗，好足料😋啲芋丸真材實料😆好煙韌，唔會好粉，紅豆好大粒，飽滿，仙草份量都頗多，唔會太甜，大推。紅豆湯1號 有桃膠，仙草，大量紅豆，仲有芋泥，樣樣都好食好足料🥰

知道新城市廣場新開呢間台式甜品店，特登過嚟試，週末晏晝3點唔使排隊。芋圓1號薏仁紅豆芋圓小白玉 仙草佢嘅仙草係非常彈牙，Q彈，用匙羹畢都會滑走😂唔會過甜紅豆都係綿密，小白玉非常有咬口成碗野都幾好食，但係敗筆竟然喺芋圓度芋圓完全冇味，唔知點解佢冇比芋圓我，淨係俾咗地瓜圓同埋紫薯圓(見到同隔籬枱嗰啲唔同)煙韌口感足夠，但完全冇味，同鮮芋仙仲差少少距離😂抹茶白玉丸子非常煙靭，抹茶粉夠香，加上甜而不膩嘅奶蓋，都幾夾。比我想像中飽，建議多幾個人食。另外，仲嗌咗大紅袍珍珠奶茶男朋友話覺得奶茶冇奶味，茶味亦都唔夠我自己就覺得佢啲珍珠太淋，冇味總括嚟講經過唔使排隊都可以試吓，不過入面座位都幾迫，坐得好唔舒服。

我哋叫咗個麻糬熱Croffle 同一杯黑糖珍珠奶茶，黑糖珍珠奶茶只有甜美係甜到漏嗰隻甜！croffle 要等20分鐘，點知完全係凍嘅，嗰劈麻薯認真未食過咁難食嘅。可以用鼻涕嚟形容！仲要留咗我個焦糖布丁，個焦糖布丁形狀，味道都好似啫喱，仲要一滴焦糖都冇。店舖細度店員收台可以打到我。餐具也污糟，根本未洗過就上枱，店員自己睇到有主動換。中伏！

呢日食完晚餐去食呢間沙田新開嘅糖水舖，主要係食仙草同芋圓，仲有啲窩夫。我地叫左個仙草唔知幾多號，有紅豆，薏米，芋頭蓉，小丸子，仙草，牛奶雪糕，超級好食！所有食材都好夾好好食！值得一讚係佢個雪糕，牛奶味好濃！好正！跟住叫左Oreo 麻糬窩夫，又幾好食！個牛奶麻糬又同個窩夫幾夾，幾好味！ 黑糖麻糬香蕉窩夫配雪糕，呢個窩夫係牛角包窩夫黎，幾好食，好鬆軟，架上個黑糖麻糬同香蕉，仲有超好食嘅牛奶雪糕，一流！必食！

職員完全唔識帶位，拎左飛6位完全唔識或覺得需要留櫈，有d櫈又無執，只識放人入座，之後問門口職員，佢重問返我幾多位，同佢講拎左飛，佢先發現完全無留過櫈，叫我等之前坐低既食客食完清返d櫈出黎，調下客位都唔識，員工完全缺乏經驗和不懂對答及處理，老闆請著真係倒米