傷心酸辣粉私房菜 (Closed)

平時都有食開傷心酸辣粉，喺其他分店見到傷心酸辣粉私房菜宣傳海報，得悉傷心酸辣粉私房菜於2012年12月20日正式開張，於是一有時間咪約埋朋友去試囉。入到餐廳坐低，攞起餐牌，餐牌上面有私房菜及特色食品嘅簡介。跟住，我地點左招牌口水雞，個口水雞嘅賣相同味道都同其他分店嘅口水雞有唔同，私房菜招牌口水雞嘅賣相比起其他分店嘅靚，而味道方面，雞特別鮮味，麻辣程度亦恰到好處，味道真係唔錯。我地亦點左個正宗重慶烤全活魚，魚係桂花魚，肉質非常嫩滑，本來見到咁多辣椒以為會好辣，原來唔係，辣度恰到好處，唔係好辣，但真係好香好入味，好好味呀。最後仲點左手撕包菜，聽侍應講原來依個菜真係由廚師用手撕嘅，唔知係咪個包菜無接觸過鐵器，包菜真係特別鮮甜，加上微辣，好開胃呀。