寧波麵食

Open Now

Now Closed

又是到灣仔開會的時候, 但因完會時間已很接近午市。搵位難, 搵好食而有位的難上加難。一路惆悵, 轉到一人流稀少的“L”形後巷, 見有家開宗明義寫明是寧波麵食, 便入內看看。餐廳半開放式, 但有冷氣供應, 不過一邊吃依然一邊出汗。餐廳簡單, 選擇及所有配搭約二三十款, 以麵食為主。看見牆上報導有關東坡肉麵, 而且牆上貼著也是“招牌東坡肉麵”, 所以根本沒有什麽考慮。東坡肉用上鹵水, 醬汁, 醋, 糖等調味, 經半炆燉形式處理。這個東坡肉是入口鬆化, 肉質組織已做得軟綿。瘦肉易散開, 但依舊保持些嚼勁質感, 肥肉就入口溶化, 豬皮部分有少少粘口而香, 算是不錯。可是經湯水沖過, 口味減了不少, 而且江浙式的濃味就沒有了。至於麵條方面, 用的是外省地方幼拉麵條, 水煮時間略長, 麵身滑但是較淋。偏黃色但沒有蛋味, 可是極可能是麵條預先煮好, 放在碗中, 並一個一個叠起。如要上桌才沖湯進去, 令麵條一餅餅的, 需用筷子一邊食一邊鬆開。麵條不韌, 容易鬆斷。麵條上, 絕對是最大阻礙去令其拿個笑面, 問題不是麵的來貨, 而是操作上的問題。但見前面客人不停盛讚餐廳自家製的粗麵, 而餐廳當天又沒有供應

紅燒肋骨麵唔值 33蚊囉 22都比多佢先說湯底: 好像豉油加水再加熱咁紅燒肋骨: 味道過咸，還有比得2件洗唔洗咁古寒丫...33蚊丫...雖然唔多都唔好咁馬虎啦... 麵: 反而正常 普通上海麵，可是份量少左d!!!: 服務態度: 沒特別，可以接受 總結: 吃了後唔飽，又要我出去買麵包填飽返肚，個麵 冇道理咁貴同唔值這價我一定唔會返頭吃

原本想去巷仔食車仔面,但行行下見到一呢間疑似「隱世」麵店,諗住一試無妨, 點知就中伏喇,封筆咁耐都忍唔住要寫下,一上 openrice 見到一大堆劣評,真係後悔莫及。環境只係同屋邨車仔面店冇分別,但價錢絕對唔屋邨,點左一個「紅燒助骨上海麵」, 一個「醉雞飯」。先講麵, 個麵其實 ok 爽滑, 但到此為止,湯底係豉油加味精, 食完口乾,個「紅燒助骨」得幾件細細件, 個味似係豉油加味精煲爛,基本上係同湯底一樣味但一咬就散,同「紅燒」完全扯唔上任何關係, 很差勁,盛惠 $33 (唔包野飲)醉雞係預先一兜兜雪左既,雞係雪雞, 只有少許酒味但全無酒香,好難食到咁差既「醉雞」,home-made 既都好食過佢,而且份量亦十分少, 賣相更不討好,$38 (唔包野飲) 完全唔值。冇品質冇環境冇服務價錢貴,難怪佢係灣仔既午市都可以咁冷清。

在大道東的其中一條內街內, 沒有車行的, 以為發現寶藏, 原來是碎料, 下午2時半左右, 一個客都無, 兩位阿姐食著個人煲仔飯, 好似好味咁噃… 但係沒有的, 要了一碗淨雲吞, 來了… 吓….寧波雲吞係咁既??? 用廣東雲吞皮包上海雲吞餡, 整得好食本無問題, 但餡內基本上是, 九成菜一成肉, 非常健康!!! 問題是, 要健康唔使嚟搵你呀!! 好彩都十分夠熱, 另一杯凍豆漿, 算不錯了, 小許豆味啦… 不出眾的食肆,

一條友食飯, 走到這家寧波麵館, 好後悔...點了一個酸辣湯麵，湯底好稀，似豉油水，又冇乜料，得幾條雲耳絲，一頓吃不飽的午餐，盛惠$25，臨走前細看餐牌, 菜肉雲吞麵$25, 但係雲吞酸辣麵就要收$45, 好唔明白佢幾隻雲吞憑咩野收多人$20, 不過亦唔會考究，因為之後都唔諗住再幫襯~

一個人無無聊聊逛街，正值吃飯時間，於是在灣仔街上逛著，忽然間發現大街裡的其中一條巷子，有一間名叫寧波麵食的店舖，眼睛不斷盯著店舖外貼著的雜誌介紹，心裡充滿好奇，眼見店內客人不多，可以一試，因為不想走下去。店內空間不大，只有幾張桌子，走進去便發現牆上貼了一張舊舊的紙，上面寫著：招牌東坡肉湯麵。於是我便點了一個東坡肉湯麵，不得不提醒大家，這兒點菜後是先付款，而且大額鈔款恕不找續，這一點要注意唷。東坡肉湯麵：湯底還可以，蠻甜，但較多油，我都不想飲。麵的份量好少，配以少量菜，東坡肉的件數更少，只有五六塊左右，肉質都可以，但沒驚喜可言。倘若閣下需要減肥，這個份量是可以接受，否則平常人吃完一碗麵都不會有飽肚感覺。一碗招牌東坡肉湯麵，要$30一碗，但我吃不飽，男士去吃的話，我會建議吃菜飯，剛巧在隔離枱，有一男三女一起吃飯，她們全都點了菜飯，但菜飯本身不是用普通碗去裝著，而是用缽來裝，而且份量都好少，一個東坡肉菜飯，要$35一個，連一碗好細碗的菜湯；是否物有所值，這個很難評估，但單看食物份量來計，我覺得不太化算，味道又不算出色，下次我都不會再去了。

這是我近來經常去的麫檔，斷斷續續去了兩星期，心想一定要寫篇食評推介，點知……原來這麼多人劣評！！首先，我要先講我只試過3款菜色，最愛的是擔擔麫，而且必叫幼麫，我沒有試過正宗寧波菜，對她的正宗與否，不方便講，只覺得沒有其他人說得不好吃1.)擔擔麫，我試過好多間擔擔麫，最好吃當然是詠黎園，其次是紅磡喬家柵，試過有好多連入口都難，而這間正品有其獨特風味，儘管有人劣評，但我偏偏愛吃。的確花生味.不夠重，味道不太辣，但也很香口，愛其幼麵因為很滑，而且有新鮮麵條感覺，很細膩。2.)東坡肉麵，很多人是咸，我反而覺得太甜，雖然說是招牌麵，但我卻嫌太甜，尤其湯底，像飲湯水麫，怪怪的，東坡肉半肥瘦但不太香口，味道單調3.) 醉雞麵，我沒吃咸雞麫，因我每次來吃都叫其他人點醉雞，明白其他人劣評雞肉賣相差，皮包骨，我都覺得這家店太孤寒，不著重賣相，其實醉雞味道清香，酒味濃，只要選好少少雞，已經大大不同，只怪店主不懂做生意總括黎講，每個人口味唔同，有時見到有捧場客，今時今日競爭太大，一間食店除左食物味道要好，仲要包裝食物，選材要好，老實說價錢有點貴，一碗醉雞麫$32但皮包骨，客人當然唔滿意，只要選材好少少，雞肉肥

我想和大家講真係要試下呢間野, 食完之後你就發現呢個世界無難食o既野了。明明中午十二點半, 都可以得一兩個人食, 完全係違反左平時灣仔d食肆排隊人龍的原則, 感覺已經有問題。 我叫了一個菜肉雲吞麵外賣之後,我話可唔可以加豬扒, 佢又係度黑面話叫豬扒要$45.. 唔係化?? $45蚊咪重貴過味千?? 咩豬扒呀??外賣個海報擺明係呃人的, 大家千萬別信。 回到公司後,開始食!! 嘩! 碗野真係好難食!! 我只係有3分鐘距離而且, 碗野已經變左好似糊咁, 個雲吞根本就係廣東雲吞o既包法, 完全唔係上海雲吞黎, 而且d料極難食, 係有一種苦味的, 十分嘔心!! 重有個湯係d奇怪o既豉油水, 麵好似發左10年咁樣.. 成碗野都差到不得了!! 我可以肯定和大家說, 這是我第一次吃到最難食的上海雲吞麵。大家要珍惜所有食物, 因為都會比呢間野好食。

好嬲自己去咗lee間嘢食. 公司喺會展開會,唔知去邊刀食lunch. 老婆話之前行過lee間舖頭, 見門口貼咗d雜誌食評,稔住係好嘢, 於是特登由會展行去試吓.....點知.....老婆話想試咸雞麫, take order阿姐話因為d咸雞係凍嘅,如果分上無咁好食, 建議同碗麫一齊上. (我心稔咸雞唔係凍食嘅咩? 不過老婆信阿姐嘅建議,咁就一齊上喇)我自以為好醒, 行埋場"蠟"下份食評先order, "蠟"到上面話咸雞水準一般(!!!), 不過就大大幅相影住碗肋骨麫, 於是同阿姐order 咗肋骨麫.咸雞麫一上枱就知唔妥. 麫小, 湯多, 得一兩條芫茜咁幼嘅菜. 最大鑊係啲咸雞, 得五六 (唔可以用件計), 仲要係皮包骨.... 我同老婆講"俾d咁嘅餸俾客人食, 唔怪得佢唔想分開上喇!) 我覺得lee啲咸雞粒根本就係佢地做小菜嗰碟咸雞切出嚟嘅頭頭尾尾. 勁無良心.到我碗肋骨麫上, 同一命運. 麫小, 湯多, 得幾粒皮包骨.飲啖湯, 得個咸味. 成碗麫混然天稱成, 由湯至麫到餸都係得個咸字. 佩服食得好嬲, 因為以間舖嘅地點+格局+裝收, 三十幾蚊一碗麫講真都幾貴. 但好明顯佢哋跟本唔專

其實2年前食過"鎮江骨"唔太好食但今日唔知食咩之際, 又經過呢間鋪, 諗住可能有改善啩食左個菜肉雲吞面, 成$25, 個面同雲吞都係同一隻味-----就係"咸"!唉, 其實個地點幾正, 幾隱蔽, 唔會太多人行出行入, 坐得算舒服~可惜可惜!

唔知咩叫寧波麵, 好奇怪係12:45PM冇咩人幫襯,心知唔方好食,但都想試一下,叫豬軟骨...冇. 唯有叫左豬扒麵...嘩件豬扒細唔在講.麵都好小呀.D湯淡淡的唔係好夠味.朋友叫左個糖醋排骨麵.呢個好小小.同樣麵都好小,但糖醋排骨勝在個味道剛好,唔太酸.我地食完要去買麵飽做下午茶....真係一次都唔應該幫襯

我幾鐘意食上海野，這間食店經過好多次，今日終於去試下。間食店冇門，用膠擋冷氣。估唔到d價錢唔平。麵$25-35，菜飯$35，叫左朱扒，用煲上，勁多獻，但得一塊豬扒，豬扒鞋過腳板底，硬過我條命。菜飯仲衰，我從未食過d菜黃色的菜飯，冇味好唔新鮮。春園街有間差不多size的上海舖，平過佢，好食過佢，仲有湯或豆漿送。怪只怪自己冇睇過openrice食評先去食。下次試新野一定要先看食評。好難食

1. 酸辣淨雲吞 $46 酸辣湯無味, 得個辣字, 無料, 雲吞又無料, 食完好似無食嘢咁, 價錢亦相當貴!!2. 排骨麵 $31 湯同排骨一啲味都無, 排骨好難咬開, 就好似煲完湯嘅豬骨, 麵太 lum3. 態度勁差, 行入去時, 好似好 nice 咁, 一叫完嘢, 佢講個價錢出嚟, 我即刻 "嘩" 一聲, 個女人即刻黑面, 之後當我地透明咁 唔會再去!!!

一早到灣仔做野. 搞到11點多, 早餐又未食. 路過寧波, 咦一聲, 昨晚寧波了, 今日又來個寧波, 小小地食碗仔麵, 再行返公司. 相信是剛剛開門, 只我一人在鋪. 阿姐細心地幫我落完order之後. 我選了東坡肉扁麵. 不一會, 熱辣辣的一碗麵, 端在我眼前. 打此食評時, 看見好友也給予此店一個非常劣評. 雖不覺得奇怪, 但我今次的感受. 完全不同, 或許, 亦是最重要的原因, 我是當日當時唯一的食客. 東玻肉, 味道甜美. 麵條爽口. 說得出是這裡招牌. 果然有返咁上下. 食麵用既時間不多, 咬落鮮甜而肥肉不多的東玻肉, 加點菜. 正宗一碗上海麵質素. 是人多令服務變成求其吧. 今次獨我一人用麵. 感覺幾好. 我俾得出一個笑面喎!!!!!!

今日心血來潮，走一段平日不會走的路，為自己帶來點點新鮮感，也同時換來失望。正正不知吃什麼之時，有咁偏食咁偏，行呀行到一條後巷，好奇心又起，最後都坐低了。寧波菜到底是什麼，自己真的不知道，見到餐牌，一張是麵一張是飯，麵的由二十五到四十元，飯的都是三十五元。說了要試一試，見到有我喜愛的担担麵，就要了一碗，點的是幼麵。原來要收了錢才可以吃的。一上碟，就知道不對勁，這真是担担麵嗎? 担担麵是淨麵沒有送的，心知一定不夠飽，不過如果湯底好也可以吧，何必要令我又失望呢，本身太淡的湯底用了小量的炸菜和冬菇，要了少辣，只有辣味，沒有任何香味。麵和湯其實是|分開的，要的是幼麵但其實不幼，有一般意大利粉的粗，即是一般担担麵的粗幼，麵質一般，如果粗一定更難食。其實是寧波菜的問題，還是這店的問題，還是自己點錯了?快吃完時見到其他抬投訴，他吃的也是担担麵，他口中吐出了紙，碗也有，要求換一碗，可見衛生真有點問題，自己的吃不下去了。本來想行多次虎山，試一試飯，他們好像出名吃東坡肉呀，見到其他人的食評，再一次打消念頭。算吧.....肚又在打鼓了