康泰車仔麵

Open Now

Now Closed

一直都有幫襯開，雖然佢嘅碗仔翅真係不值一提，但我平時最鐘意食佢嘅煎釀三寶。最後一次去，我又叫咗煎釀三寶，個阿姐問我要唔要豉油，我已經答咗’唔駛‘，個阿姐大大聲再問我一次，態度好差！佢自己聽唔到，但要個客受罪？！真係下不為例！

每當諗唔到食乜，最多就係新港城車仔麵，價錢合理味道亦唔差，幫襯咁多年都好少失手。今日送完老婆搭車返工，一條友唔知食乜，又走咗去買車仔麵。油麵 韭菜 豬紅 牛筋 咖喱魷魚，姐姐淥完麵就定咗格，正好奇佢咩事，原來佢唔滿意另外一個姐姐整外賣單阻住佢，一碗平時四分鐘整好嘅車仔麵，要一倍時間才能完成🤣🤣合則兩利，但在咁狹少嘅空間一齊工作，磨擦好難避免，所以⋯明白嘅！亦可因為姐姐嬲嬲豬，今日咖喱魷魚比平時少🤣🤣🤣 ，而且唔記得落辣汁比我，都係嗰句，明嘅！明嘅！是日消費：油麵 韭菜 豬紅 牛筋 咖喱魷魚(外賣)共$50

前幾日嗌個煎釀三寶食，我明明就要12件，佢就黎6件俾我，但我想講你應該唔係俾錯掛（因為係户户送個選項到淨係可以嗌 5 8 12 16件，而冇6件）過份到每樣淨係比一件我之后我就向户户送反映佢嘅問題，户户送都話會同佢講嫁la到今日，唔知係咪前幾日我投訴完佢，佢宜家玩報復la，我真係唔明點解嗌個車仔麵可以冇湯都算，我嗌個3餸飯，豉汁蒸倉魚，佢竟然黎個魚頭仲要係未熟。我真係未見過一間野可以做到咁cheap。black list！！下次我經過一定話下呢間野，真係cheap到冇人有。

今日本身諗住去街市食牛腩粉，可惜去到嘅時候餐廳已經收工，唯有轉食其他嘢，所以就試咗呢檔車仔麵，呢檔之前都有食開佢嘅煎釀三寶，車仔麵就係第一次食，叫咗車仔麵同油菜。油菜 ($12) : 好抵食 👍🏻 無諗過咁大碗，下次返屋企可以倒哂啲水，再加腐乳食就更滋味。車仔麵比我想像中大碗，無論係米粉定餸，餸就叫咗兩份豬大腸同一份蘿蔔，豬大腸洗得好乾淨完全無異味，而且又肥又夠入味，蘿蔔亦幾清甜，同埋好易咬得開。👍🏻

我同男朋友一個去買野食, 一個睇住兩個背囊😂上次我買, 今次到男朋友去買。每次買車仔麵條隊都好長,都要排好耐隊先買到。今次太熱唔想食好多野, 就每人試左粢飯豆漿餐, 男朋友就叫多碗車仔麵。栥飯暖暖哋, 啲飯調左味就算冇餡都唔會難食, 但餡嘅份量真係有啲少。豆漿夠凍, 豆味濃, 唔會太甜👍🏻👍🏻😋男朋友叫左瀨粉, 啲瀨粉好快吸晒湯, 有個哥哥見到佢冇晒湯就幫佢加滿返一碗😂十蚊四件煎釀三寶真係好吸引,下次要試😍

平時放假都會黎呢間買車仔麵，每次都多人黎排隊。我每次都會點米粉，菜，豬大腸，豆卜及唔辣豬皮。加腩汁。（合共38元）豬大腸夠厚但好林，好有咬感。豆卜浸係湯度吸收左腩汁既味道。唔辣豬皮都已經入味。而菜就想健康點，所以先點。另外，有時候我都會買煎饟三寶黎食，18元有8件，抵唔抵就見仁見智。

呢家康泰車仔麵平平無其麵係賣下煎釀三寶，車仔麵，咁我平時都有食開。今次都食翻我既最愛—-碗仔翅！呢個碗仔翅$15好便碗仔翅加多兩蚊有埋魚肉。我今次因爲打算小小地咁食 ，食完之後仲要食第2餐。點知佢係超大兜！佢料超足 啖啖肉，唔肥既。仲要有腐竹 同埋基本既材料都有齊係裡面。正啊！！Mainpoint來了.... 佢入面我深信係無加味精！食完唔口乾😍呢家平平無奇無做宣傳既小店竟然有咁高既質素！正推！真心推介比大家 便令正

中午時分，街市人山人海，除了一批去買餸煮飯的顧客外，當然不少得一班搵食一族。今日來到康泰車仔麵，又引起我的車仔麵人。店舖少少，人龍長長，餐牌眼花撩亂。好在麵檔提供窩心的車仔麵配搭，正正有我最鍾意嘅蘿蔔朱紅和豬大腸，勉強了我左揀右揀的煩惱。加左辣汁同腩汁好好味， 三十一蚊外賣仲要唔使加一蚊外賣盒 ,蘿蔔四大舊，豬紅炆得入味，豬大腸略嫌皮薄吾夠爽，不過洗得好乾淨，一啲都唔腥。大大碗咁嘅價錢我覺得好抵食。其實仲想試埋佢嘅煎釀三寶， ＄16/8件我覺得OK喎。不過得我一個人都係唔好咁大食啦，下次再試！

在馬鞍山這個地區，想不到，商場連接商場，竟然會有一個街市，會讓客人在店舖門外，像揀橙一樣，自己挑選煎釀三寶😂？真是有趣，看見叔叔、姐姐、阿姨，都在興高采烈的挑選自己喜歡的寶藏😬。而這店的煎釀三寶，的確很多寶，除了一般的矮瓜、青椒、魚蛋、豆腐，還有蟹柳、韭菜餃、多春魚等等。店員亦都會不時將新鮮炸出來的，倒到出面的盆上，因此客人可能因為看見阿姐將新鮮的食物倒出來，而重新挑選，場面有趣。我亦都嘗試了多春魚，外皮較厚，但是非常香脆。除了普通豆腐之外，還有琵琶豆腐，真的特別，平日只會在叫小菜的時候，才能夠吃到琵琶豆腐，想不到街市的煎釀三寶，也可以做出琵琶豆腐。外皮不算太口，有點兒皺紋的感覺，與小菜吃到的琵琶豆腐，質素相差不大。還要，價錢不算昂貴，甚至乎，比起青衣賣的價錢還要便宜，＄15元8件，可說是便宜夾抵食，還有特別的款式。

呢篇係小弟的第一篇食評，如果寫得唔好，請多多見諒。不過唔記得影相。今日放假，自己一個人，出去餐廳食好難搵位，所以就買外賣。聽屋企人講呢間車仔麵好正，所以就是試下。可能係下午茶時間， 去到有六七個人排隊，不過都快手，因為有4個呀姐負責賣野。呢間車仔麵嘅餸款式好多，大路嘅魚皮餃、豬皮、豬紅、牛腩、丸類都有 。除左呢d，吉烈豬扒都有。而我就叫作牛腩、吉烈豬扒同豬腸。返到屋企已經急不及待要試，餸果然好多。豬腸: 好入味，完全沒有騷味，又煮得好淋。下次必叫吉烈豬扒: 好大塊，佢會同你剪開，可惜，佢將塊吉烈豬扒放埋落D湯度，搞到塊吉烈豬扒已經唔脆，如果脆的話一定好正。另外，豬扒唔係好夠味，要自己加返D七味粉，咁就正晒。牛腩: 呢樣就麻麻地，煮得唔淋，又冇乜味，所以下次一定會再叫牛腩。湯底:都算ok，唔會太鹹，加入湯裡面嘅腩汁超正。整體來講，都算好食，又夠大份，食完勁飽。

呢間車仔麵開咗好耐,某些繁忙時段人龍會去到隔離舖頭.都係因為佢啲餸有質素.今晚晚餐揀咗米粉,水魷魚,辣豬皮,豬腸水魷魚份量唔多,有少少"UN"辣豬皮夠辣,有"林"有爽豬腸好乾淨其實嗰度仲有好多唔同嘅餸都好好咪,牛腩,辣魚蛋,水餃,煎釀三寶...

車仔麵和餸逐項計的，樣皮價錢不同。麵底5元起。餸5元起。煎釀三寶6元四件。另外還有碗仔翅、生菜魚肉、炒麵等。幾款餸加大大碗車仔麵都是廿多元，算抵食。煎釀三寶是推介食品， 經常都有即炸出爐。夠大件，加上秘製豉油或甜醬更好味。車仔餸方面，好味之選包括:牛肚、咖喱魚蛋、豬皮、水餃。辣汁辣得來較鹹。可惜每次買完野食都成身油煙味，不過，好味就算啦。

星期六一個人出來馬鞍山, 搞好事情, 又到了可愛的食飯時間了. 馬鞍山街市呢一個彈丸地方不要小看, 一個完整街市應有既東西都有齊. 而其中一個最吸引人的, 就是熟食檔.此街市的熟食檔, 大部份都不是馬虎作業. 味道上, 人流上, 間間都咁好. 而是日, 我就選擇了呢度既其中一間人龍店, 排隊, 買車仔麵.通常都係三個餸, 為食的我竟然叫到成碗係. 叫了貴一點的伊麵之餘, 加了生菜, 牛腩, 豬紅, 生根, 牛肚, 出來的一碗麵, 要成$31. 我果然如齋妹常常對我的這樣說.....我冇得救架啦.拿了麵, 行去街市通道上的幾張共用的摺檯找位坐. 開始品嚐呢一碗有不少馬鞍山人叫好的車仔麵. 首先, 湯底好, 湯底味道濃, 夠鮮, 亦可能因為我叫了牛腩的關係, 加了了腩汁的湯, 令到碗底的味道更香. 牛腩, 雖然是一般車仔麵的平價碎腩, 但帶筋而且夠腍, 也是普遍中的不錯. 牛肚, 腍是最重要的一環, 味道好亦是重要的元素, 滑滑的豬紅同油料不多的生根, 再加上新鮮爽口的生菜. 所有食材新鮮, 入味, 而且衛生. 就是一間車仔都檔既成功之處.大碗麵, 我食得飽飽的, 再過旁邊的店買排骨飯回家

疲累的星期五晚，不需要享受食物，不願意排隊等位，只想隨隨便便吃個晚飯填飽肚子。一想便想到新港城街市的車仔麵。既然是街市，就談不上環境和服務。排隊落單後，需自行把食物拿到店方提供的摺枱進食。車仔麵是逐樣餸計的，要了丁麵底，配炸豬排，腸仔和炸雞亦。另加＄6四件煎釀三寶。 出前一丁 ﹣ 用上獨立包裝的麻油味出前一丁，即叫即煮。麵煮得不夠熟，需再浸1﹣2分鐘，當麵條吸了湯後，又覺得不夠湯。 炸豬排 ﹣ 豬排切開上，方便入口。豬排已一早炸好，放涼了有點硬。 香腸 ﹣ 平時吃慣了廚師腸，但這裡的香腸不知是什麼牌子，味道有點不習慣。由於又是一早弄好，已經放涼了。 炸雞亦 ﹣ 典型的千年油炸物，不過炸得香脆可口，不錯不錯。 煎釀三寶 ﹣ 我只試了麥樂雞。這是平生吃過最不能接受的麥樂雞；放了一整天，原本脆卜卜外皮變得又凍又韌。配合煎釀三寶的豉油，格格不入，完全錯配。幾款餸加起上來還算豐富，大大碗車仔麵廿多元，實在便宜。作為車仔麵愛好者，還會再來！

見不少人幫襯, d 三寶又係剛炸起,5蚊4 舊, 都一試喇.魚蛋幾多粉; 但勝在夠晒熱牛丸原來已係之前炸的, 已係凍的....另外的魚片+蟹柳又幾得意ok 噃.另好多人食車仔麵, 看也不錯, 可一試呢.