品臻 (太子藍馬之城) (Closed)

啲鹽酥雞係個皮勁硬，跟住位小姐仲要落咗勁多鹽，本身已經唔好食重要變得勁鹹，個兩條 台灣腸勁乾囉，過咗龍冇啲汁水😅，跟住個兩杯奶茶我印象中係勁淡冇乜奶味，D紫米一嚿嚿，好似收乾左水嘅飯咁，啲芋圓都好硬，完全零推薦

今日有事到太子，正行到身水身汗，心諗最好有啲凍嘢飲，咁啱就俾我睇到呢間品臻，望一望餐牌，原來係賣台灣嘢的。肚唔餓，淨係想飲嘢，所以就專注搵啲特別啲嘢飲。台灣飲品來來去去都係嗰啲嘢，本來想要杯白桃冰沙，跟住俾我睇到呢個從來未飲過嘅藍蝶花荔枝汁，咁就決定試一試佢喇！因為唔係食飯時間，冇人等外賣，所以幾分鐘後就攞到我杯飲品。睇落去賣相非常之靚，加埋啲爆珠，好睇又好飲。唯一問題係唔記得問可唔可以調校甜度，個人嚟講覺得啲荔枝汁甜咗少少，但係可以接受。下次有機會經過會繼續試佢其他的飲品或小食。

34度天氣下真係要飲杯凍飲@品臻茶珍珠奶茶：夠茶味唔會太甜珍珠好好味，煙韌夠咬口！推薦果茶系列：茶底味香濃，果味十足酸酸甜甜，好解渴. 有驚喜行經太子旺角，品臻茶值得去試

食物真係極度難食，我真係好耐無試過食唔哂要掉左去咁浪費，Nutella榛子格仔餅塊野口感差到爆,好似食緊紙皮咁，仲要無蛋味，味道同口感都有待改善，醬又唔算少但係無咩味的，見到好評好潮，無諗過係咁嘅味！另外叫左個仙草芋圓甜到過份，真係食兩啖都會糖尿病，我真係食唔落，俾好甜嘅朋友食佢都係食兩啖就食唔落嫌太甜，唉，總之陣味又怪總之難食！至於台式拼盤味道正正常咁，好食就稱唔上，但係份量真係偏少，唔值呢個價，CP值係零！我打咁多字唔係想唱衰間野，只係我都想佢地可以改善，因為我都想食到有質素嘅食物，我相信咁多間分店係有原因嘅，希望可以改善食物質素！

質素非常一般…….鹽酥雞味道唔夠重 雞肉完全唔好食 太軟又唔香杯野飲要$40一杯 諗住試下無妨 點知出到嚟佢只係一杯鮮奶+芋圓+芋泥嘅混合物 唔知佢係點樣做到鮮奶同芋圓都冇味(係真係冇味 冇誇張化…..)成杯野淨係得芋泥有味 但芋泥個味都係好淡埋單用左$66 但我用呢個價錢可以買到好食過佢好多嘅豪大大同賞茶 仲要有找😬平時都唔寫食評 但今次呢間真係大伏 所以勸大家都係唔好去試了

去緊巴士站既中途發現有間台式手搖店，34度緊係入去睇下啦，有黑糖，珍珠，奶蓋，冬瓜茶，沙冰⋯乜都有，雞蛋仔格仔餅都有，竟然連鹽酥雞同魷魚鬚都有添！但炸野店員話要等10分鐘，因為係即炸，咁唯有下次先試下啦。下次去搭車都可以買一杯嘆～正！

最近先知原來太子新開左間品臻，味道唔錯，又多小食，啱晒我同朋友既胃口。本來行街行到攰又口喝口痕，路經發現呢間就入去睇下，飲飲食食完就好似即刻幫自己充返電咁，繼續同朋友行街shopping，下次附近行街識得黎呢度了

啱啱係呢間分店買咗一杯香芋珍珠奶綠，全程我在場睇住佢沖，果陣唔忙得我一杯後面冇其他單，沖嘅過程係度不停同其他人吹水，又講唔知上網買咗乜嘢又呢樣果樣，有個女人唔知係咪之後我就問佢係咪落咗三匙粉，之後佢又好似唔肯定咁樣話係呀沖果陣果糖份量落錯咗，佢同事細細聲提佢佢都扮冇嘢照岀俾我。。。。。結果岀黎係一杯香芋甜奶水！完😩

之前見佢有優惠諗住去買，俾錢前問係咪優惠左先講完左。好都算，一望佢有出優惠卷但同你講下次再黎幫襯可以用....（真心感覺好無誠意）然後叫啦…一共叫左3杯第一杯細杯 茉莉綠茶+小芋圓+3Q果 $24（結果話無3Q果）第二杯大杯 蜂蜜檸檬蘆薈綠茶+珍珠 $34（呢杯就無出事）第三杯大杯 蜂蜜蘆薈菊花茶+小芋圓 $33（出晒事）第三杯叫大杯變左細杯都算，仲要話我無講過要大杯，然後蘆薈消失左....加6蚊小芋圓得十幾粒，超慳料好似俾多少少都蝕俾人咁。出飲品慢都算，料又少又貴，仲會偷風減料蘆薈都消失埋。做客仲要受氣，職員話咁要唔要做返大杯呀？不過過等其他出晒先喎! 真係燥左.....

上星期經過開已經好想試嘅新店，終於比我試到啦！叫咗一碗綜合芋圓黑糖同味配料有九份芋圓、仙草同薏仁，綜合芋圓份量剛剛好又唔會太甜。同埋叫咗一杯芒果紅茶加仙草500cc，呢間仙草味道覺得幾好店員好細心又好禮貌之後會繼續幫襯間店仲有台式小食、雞蛋仔、格仔餅同剉冰下次再試吓先

經過太子見到佢新開張有優惠到3月31為止有買一送一！即刻試吓佢先！選擇都有好多由奶茶🥤咖啡☕️純茶🍵奶蓋🍼乜都有我就俾佢個期間限定吸引左🍯蜂蜜檸檬蘆薈綠茶 $30值得一讚嘅係蜂蜜味好重所以唔驚檸檬太過酸入面仲有好多蘆薈 整體味道幾夾💙藍蝶花荔枝汁 $34呢個打卡一流有兩層顏色幾colourful藍紫色同白色影完相先有溝埋一齊呀初頭以為剩係得荔枝汁入邊原來仲有啲椰果豐富番個口感有少少似荔枝玉露嗰陣味📍品臻 (太子藍馬之城) (太子)太子彌敦道761號太子藍馬之城地下1號舖