京都薈 (Closed)

平時好少去青衣，多數都係去青衣城行，不過朋友話最近長發多左好多野食，除左有青街之外，仲多左好多餐廳，所以就一於試下啦！呢間雖說係一間中式酒樓，不過單看牌都感受到並唔係咁傳統式的。而且酒樓都好大，好多街坊客都會嚟幫襯呀！加上酒樓都有好多平價套餐，真係好吸引呀！夏日炎炎，最岩就係飲啖湯清清地。呢個冬瓜盎真係又清涼又消暑，而且份量都好大，真係飲多幾碗已經飽晒。店員會幫我地裝好一碗碗，見到有好多瓜同料，證明冬瓜盎真係足料的。冬瓜色澤透明，而且瓜肉超厚，絕對係抵食，份量唔少，都可以食到好多瓜，而且都好多湯係入面，唔會愈食愈無水。點了一份生炒骨，生炒骨最難做到就係粒粒骨都可以沾到汁，而且好難做到色澤均衡，而且生炒骨酸酸甜甜，所以都好開胃。而今晚嘅主角係就係呢個黑椒豬手啦！豬手係原隻上而唔係斬晒件，感覺非常大份，而且仲有洋蔥係底。切開少少，倒入黑椒汁令豬手可以更入味。而洋蔥又可以吸晒黑椒汁的味道，真心正呀！識食一定係將洋蔥拌出，令洋蔥可以吸下豬手嘅油膩。切了一舊拌飯，真心好大舊好厚肉，絕對係正又入味，拌飯一流。

星期日鍾意同屋企人去酒樓飲茶，嘆一盅兩件~~大點小點中點特點咩都點哂，大家開心就好~~ 青衣的京都薈新開張，全新面貌，環境更為優雅，所有食品即叫即做，需時約20分鐘… 熱騰騰的包，流出金黃的奶皇，甜中帶點微微的鹹，太好吃啦！！！！！  咬下去仍是熱熱辣辣，鬆軟的面皮，請務必記得趁熱享用! 吃起來鹹鹹地又QQ軟軟地，非常脆口仲有豐富的餡料.... 一款香口炸物~~吃的時候，大口吃就好，十分鬆脆!! 包括鹹魚粒，鷄粒，翠瓜煮成就是又香又惹味的炒飯... 飲茶，總有你愛吃的一款，給你好心情。^^。

工作關係，偶然要同同事去青衣嗰邊，尋日去長發村揾食，先知道有間新開酒樓，咁我哋一行4人就拉大隊午膳時間去食下！ 估唔到入面勁大，勁多位，應該可以擺到40-50 圍酒，我哋12點前嚟到，都要等一陣位，晏d仲多人！酒樓提供既選擇都幾多，一般常見既點心都應有盡有，而且都有一d特色既款式同特價套餐選擇！我就先叫左個特價既燒肉飯食，唔駛$30 ,酒樓嚟講算唔錯， 燒肉皮燒得香脆， 份量都ok! 之後有香煎蘿蔔糕同煎釀虎皮尖椒，蘿蔔糕用料十足，外皮煎得啱啱好，夾落無散，有甜甜既蘿蔔味！至於好大隻既釀虎皮尖椒，就仲足料，啖啖魚肉，而尖椒又爽口，幾好味！跟住落嚟呢4 樣相信大家都成日食，分別係叉燒包，鳳爪，燒賣，叉燒包個餡做得幾好，都幾多肉，個包都做得鬆軟，而燒賣都幾足料，食得出有鮮豬肉既甜味，無咩肥肉，最特別係個鮮蝦菜苗餃，清新嫩滑既菜苗加上有咬口既大蝦，相信喺其他酒樓唔係咁易食到！而今日最特別既菜式，非呢個原籠金蒜斑腩蒸飯莫屬，份量大不在話下！一打開個籠香蒜味噴晒出嚟，d飯都係炒過帶d蛋花既金黃色，有d鑊氣，夾埋d蒜蓉嚟食仲惹味！而班腩就起晒骨，啖啖肉，非常嫩滑！最後我哋食晒d點心同飯都意猶未盡

終於過了個peak season,可以約埋同事食番個點心lunch，relax 一番食餐好。近日見到有間茶樓新開，一於嘆番一盅兩件。入內的裝潢又不錯，牆身又有電視又夠光猛。脆皮腩仔飯（$29.8），都幾抵食，腩仔好夠脆，份量都ok.蟹籽燒賣皇（$27.8），非常大粒，豬肉蝦蛟比例剛好，非常有口感及鮮蝦味道，正呀！香煎蘿蔔糕（$19.8），是即煎所以香脆，臘味不算多，但蘿蔔非常足料。鮮蝦菜苗餃（$23.8），我就無試過佢味道，同事們都說不錯。煎釀虎皮尖($23.8)，不過不失。講到最好食，莫過於原籠金蒜斑腩蒸飯（$98），真係好美味，炒飯底魚精華落到飯底。斑腩不少，有雲耳點綴，四個人食不曬。叫了二款甜品，分別熱（薑汁糕$18）及涷（桂花糕$18）冷熱交替又不太甜，不錯。我見到晚市做緊火鍋$148 二小時包埋野飲，食海鮮都係加多$40，不貴可一試。

酒樓新開張冇耐，華麗又夠寬敞，枱又唔會太貼。點心有好多選擇先提一提呢個兜,而家好多酒樓都冇呢個兜。先來一碟滷水鴨舌，滷水汁好香濃， 有原隻嘅下巴連舌位，好難有呢一啲咁嘅嘢食㗎喇， 味道不錯。 春卷好脆 燒腩仔個皮都脆，不過肉嘅質地就一般。 呢一款都算新款呀!通常都係食胡麻茄子，但呢款用鮮淮山，啲淮山爽脆呀! 好足料，啖湯好清甜，唔會淨係得一隻肉餃。 蝦餃放凍咗之後，個皮都唔會韌嘅，蝦都彈牙。 用雞公碗盛載豆腐花可見其特色，份量都幾大下。 呢個滷水汁唔夠鴨舌滷水汁香， 啲豬腳仔都好肥美，唔會淨係得骨。 夏天食涼瓜最好，清熱解毒，涼瓜唔會苦澀， 又有好重嘅胡椒味。星期天可以同屋企人一齊飲茶，說說笑笑，真係人生一大快事!飲到人地派下午茶紙,好難得星期天都有下午茶,下次一定會試!

今天第一次試呢間飲茶， 等點心等得好耐👎， 點心送到枱時賣相完全唔吸引😨， 蝦芝士春捲同普通春捲個樣一樣 ，與圖片不符合賣成特點但味道一般；迷綱金剛腸..非常失望.. 咬落口成劈嘢咁... 難食到嘔😱；皇牌流沙奶皇包... 仲驚... 包皮厚個奶黃,而奶黃就實到一嚿嘢咁😡； 燒賣 最穩陣 但冇驚喜； 最後 食埋個蛋散..... 嘩😤隔夜灰色淋身蛋散😤x%zy&x😤😤..... 究竟食咗啲咩落肚 ？？.. 我個仔話最正常就係杯茶， 我情願行返去灝景灣飲茶， 味道賣相實在太差 ，不會再嚟 。#評分 -100 負5星星

聽講青衣開左間新嘅酒樓，黎到見到有火鍋放題，所以就同屋企人試下。我地選了$188套餐，比$148多左好多選擇，本身我最期待係蜆，但唔知點解全晚都無黎到，下次黎食嘅朋友仔可以問清楚先。火鍋包了任飲飲品，因為妹妹唔係太舒服，所以問下職員有無唔凍嘅，職員好好，轉頭拿了幾罐唔凍嘅飲品俾佢蔬菜同醬汁係自助嘅，不得不讚嘅係蔬菜好新鮮，選擇都算多，常見嘅生菜娃娃菜通菜粟米冬瓜當然有，比較少見嘅皇帝菜白菜都有，岩曬鍾意食菜嘅我。一坐低無耐職員就送上海蝦，仲識郁嘅，非常生猛新鮮！跟住食物陸續上黎，每碟份量唔會好多，可以每樣都試下再reorder，非常好。豚肉牛肉都好新鮮，丸類同餛飩餃子就正常。我好鍾意食蜂巢豆腐，放入湯底後吸曬D湯汁最得爸爸歡心嘅右手邊嘅生蠔（唔記得影單獨相）佢叫左三轉，佢話好少火鍋店有生蠔，而且仲要好新鮮推介！最後食埋雪糕就滿足離場👏🏻整體黎講，食物新鮮，職員雖然年紀比較大D，都服務態度都好好。唯一嘅遺憾係無得食蜆，唔知係咪賣曬呢？決定下次再黎試下佢。

小妹認為一間粵菜茶樓對一個屋苑屋村嚟講係好重要，可以成為一家人與長輩聚聚的好地方，熱熱鬧鬧大伙兒的談天說笑，大至新聞時事到閒話家常，整個開心熱鬧的氣氛成為每個家庭假日必做的事。當然小妹對茶樓的食物質素亦相當有要求，今次同家人嚟到青衣一間新開張不夠兩個月的粵菜酒樓”京都薈”,位置於青衣市中心長發商場的頂樓。由於是市中心，交通非常方便，若坐地鐵到青衣站只需步行15分鐘便可到達。今日雖然是平日，但晚市亦相當旺場，熱鬧非常。燈光光猛充足，裝修以金色白色為主，感覺高尚，整潔。晚市餐廳有必食推介及皇牌之選，價值大眾化。但小妹家人不太愛海鮮，那就試試小菜吧。紅燒乳鴿 $42外皮乾爽，肉質軟嫩多汁，再沾上淮鹽鹹香提升乳鴿肉香。一隻乳鴿只需$42，抵食。咸排骨大芥菜煲 $78清熱氣之選，有黃豆，芥菜，糊椒，咸排骨。唔好睇少呢道菜，小妹喜歡到不得了，記得記得要飲湯，湯才是靈魂所在。芥菜的鮮甜味，以鹽醃製排骨味道配上微辣的糊椒的香味，滋味得很！份量足夠4位大人，整煲都給小妹清了！鮑魚野菌雞煲 $168大大隻鮮鮑魚，厚厚的肉身，爽口彈牙，完全吸收雞的味道，鮮味十足。雞件肉質鮮嫩，配上野菌有雞脾菇，草菇，滿口鮮

一直住係青衣，星期六日間唔中都會同家人去飲茶，前排呢個位既兩間酒樓都裝修，雖然唔係好平同好食，但就反老人家都會間中去食，勝左夠近。月頭見開反，同家人一於試下，睇下有無驚喜。裝修係令左，所有野都好乾淨，無論茶壺，杯，碗定碟，都華麗左好多。睇下餐牌，一點都無變，下午茶時段既點心同組合都同之前果間一樣，變既係價錢，貴左🤷🏿‍♀️果度既服務員都無變，所以服務質素一樣都無變，都係成日當人無到，態度差。食物方面，叫左個福建炒飯，馬拉糕。福建炒飯好濕，食落好淡口，食左一碗已唔想食馬拉糕就稍為好d，算係香同鬆軟，會令人想食多舊整體來說，無論價錢，食物質素，服務質素，都唔理想。呢次既大裝修只不過係換湯唔換藥，寧願行多步路去灝景灣食

啱啱同呀姨去咗佢屋企附近嗰間茶樓飲茶。 初初有小小驚因為啱啱開張， 各方便未必做得咁好。 但因為諗住近近哋就去試吓啦！ 俾以前嗰兩間，靚好多， 感覺上大啲，光猛啲。都好多人等位， 唔想搭枱所以等咗半個鐘先有位。入到裏邊，真係set咗好多張枱， 好多人。 如果唔set 咁多張枱確實有可能要等多成個鐘。 兩邊變一間， 要服務街坊， 都明白的。坐好後叫咗籠蝦餃， 麻蓉包，雞扎， 糯米雞。 都好大件， 買相OK bor, 味道唔錯啦！唔係人哋講到咁差wor! 好食過之前果兩間啦! 啲街坊都係咁講，不錯啦！ 畢竟我見到佢哋落單有啲亂，啲姐姐都有禮貌。 屋村酒樓算係咁啦！去了佢哋個廁所， 都好乾淨！

一班朋友打完羽毛球.有一間酒樓啱啱開，上去試一試.有好多人等位，服務員有禮貌，我們等了15分鐘才有位。點心價格唔算貴合理. 點心有好多選擇炒粉麵都有特色.叫了點心品種：蝦餃：蝦大隻有汁新鮮燒賣：好香冬菇味肉質新鮮鯪魚球：有果皮，鯪魚肉鮮美潮州粉果：好多花生香煎虎皮椒：汁好味，虎皮椒香口鮮蝦腐皮卷：不油膩整體點心出得好快唔使15分鐘👏👏👏服務員對客人有禮貌，好有笑容.買單要櫃面買可以唔俾貼士🤭我會再返嚟飲茶✅

剛剛開的新酒樓。早餐試一試佢. 入到間酒樓人山人海好有香港人情味因為唔同客人都會搭枱同打招呼.聽面侍應同街坊客人都好熱情.叫了一個早晨孖寶排骨飯同潮州粉果，唔使8分鐘就到出得都好快. 排骨飯同潮州粉果都好熱。🤩味道：鳳爪排骨飯，排骨新鮮，鳳爪夠味，豉油味道唔會太鹹唔會太甜味道啱啱好加上豉油係暖的所以唔會影響飯底潮州粉果花生好香口，好足料飲茶最重要係需要係水要滾，茶枼要靚.知道我比85分上班一族，想飲個快靚正早茶可以試試👍

今日同兩個老人家去樓下試下新開嘅茶樓，叫咗個豬腳薑，未試過啲豬腳咬都咬唔到，最過分都係隻雞蛋，個皮硬到唔知放咗幾耐咁！碗野仲要四十幾蚊，唔知叫人點食！跟住個山竹牛肉球都真係唔多好食，又係實一實，用筷子一叉落去都差啲叉唔入，好少會食左啲咁實嘅牛肉球仲有醬汁鳳爪同芒果布甸，呢兩樣都終於算係正常少少，一般酒樓咁啦仲叫咗個燒腩仔，算係不過不失啦，不過下次真係唔敢再嚟食！難怪唔少街坊都彈佢啲食物質素唔多掂啦

長發終於開返酒樓喇！比起以前既酒樓靚左好多仲見返唔少以前啲職員好有親切感去到門口先知原來可以用電話攞飛下次就可以早啲拎定飛唔洗等咁耐喇因為都幾多人等位架食物方面同普通酒樓都大同小異我地叫左既食物都好快上唔洗等太耐第一樣黎到既係鮮蝦腸粉份量都唔算好少不過蝦既數量每條都唔同另外我地仲叫左一碗叉燒飯飯同叉燒係分開上的叉燒唔會太多肥肉 肥瘦適中不過如果有多啲汁可以用黎送飯就更好喇因為驚一個飯唔夠飽所以我地又叫左個奶黃包熱辣辣好好味我地食到咁上下差唔多到下午餐時段姐姐就開始派下午茶紙價錢都平唔少由於呢層有一邊仲圍封緊所以得一條電梯上 係無電梯落想落返去只可以等升降機走同等位既人都係同一個位所以門口都有比較多人聚集希望另一邊電梯可以快啲開返喇

樓下裝修咗咁耐，酒樓終於開張呀！ 親戚先去攞位，我地2點左右去到落點心，等咗超過半個鐘都未有野食，但眼見旁邊每圍都上菜了，於是我地叫職員 check check, 佢嘅回覆係無記錄，亦即無落單！！！大佬呀，一句對唔住都無，咩服務呀？！其實我地向職員查詢時，旁邊亦有人投訴漏單嘅情況，可見情況真係好混亂。服務唔完善之餘，食物品質亦唔見得好好，我今次未有機會試到，但我親耳聽到隔離枱向職員表示蘿蔔糕太凍，需要翻熱。開張4日後都咁樣，事實再一次證明，新開幕的餐廳係試唔過嘅！