潮州合成甜品

Open Now

Now Closed

今日下午四點幾，店內只有一枱客人，本來打算買紅豆沙清心丸，但店員說沒有清心丸並推介綠豆邊薏米馬蹄沙，於是叫了一碗綠豆邊薏米馬蹄沙和一碗椰汁黑糯米，埋單83蚊，我比100蚊，找番$17，當下記得椰汁黑糯米只係32，33蚊，但由於趕時間所以果刻冇諗咁多，上 OP 睇完餐牌，果然真係收多咗錢 😲😲😲，所以，以後出街買嘢食飯，會記得喺比錢之前一定要自己計好條數 😞😞😞

和朋友去了九龍城行一轉，經過合成甜品，入去食了碗傳統潮州糖水。我叫了一碗馬蹄爽（熱），朋友叫了一碗綠豆百合清心丸（熱）。馬蹄爽好濃郁，清甜入心，每啖都有馬蹄粒，好爽口。飲晒全碗甜而不膩！

三個女人一個墟，總有聊不完嘅話題。去完朋友婚禮，自己安排下一場去食甜品，飲糖水。大家都拎住好多嘢，老闆特意安排卡位俾我們，人很好。員工熟讀所有糖水的編號,倒背如流，為之驚嘆❗️ 馬蹄水的確唔錯，加埋湯圓10分美味！ 但是雪耳蓮子木瓜就一般，但足料，都值得比個like!

合成糖水嘅款式越來越多，每一次都要揀好耐，凌晨十二點幾到，撞正清心丸賣晒，唯有揀其他。普遍嚟講合成糖水嘅價錢越來越貴，一般都要三十幾蚊起，但係水準依然。冰花蓮子意米百合，$35，好足料，每一種料都好新鮮好有口感，冰嘅份量更多嘅話更正。

位於九龍城龍崗道既老字號潮州合成糖水；往往在宵夜時段座無虛席，尤其星期五、六！係咪真係咁好食呢...就真係要試過先知𡃤！我同朋友分別叫咗一碗紅豆沙湯圓、同蓮子百合雪耳薑汁糖水。坦白講，碗紅豆沙味道真係好一般。湯圓就大大粒...有四粒！餡料係用咗我最鐘意食既芝麻...可惜湯圓皮做得太厚，口感麻麻！相反碗蓮子雪耳薑汁糖水就比較就優勝...而且薑味濃！同其他中式糖水舖相比之下，我覺得合成既收費就較貴.....

近排覺有點熱氣，去呢度食最愛的綠豆爽淸心丸，甜度岩岩好，綠豆份量都唔少，食落口感腍中帶有咬囗，有埋清心丸嘅煙韌度，彈牙咬囗，好味道！兩者配合好岩數，食完都幾飽肚，無論身心都感到滿足，難怪咁多人排隊幫襯！下次再試其他！

終於明白點解合成糖水會叫合成，因為所有糖水都係自我組合，任你點溝都得。呢晚我就叫咗一碗：蓮子綠豆邊清心丸薑汁糖水，本來想要埋馬蹄沙，但係姐姐話馬蹄沙同薑汁唔夾，最後我都係揀咗薑汁，因為秋天已經到啦。呢碗糖水夠薑味，清心丸亦都好好咬口，而蓮子同綠豆邊都係粉粉地非常之好食。成碗糖水唔會過甜老實講真係幾唔錯。而同伴就叫左一碗：椰汁芒果馬蹄沙。呢碗有好多冰，食到最尾真係水汪汪。睇芒果個樣都係非常之熟應該好甜，但係馬蹄沙就冇無話啖啖馬蹄，比較稀。最後埋單都係幾十蚊，飯後吃一碗真係唔錯，唔想食啲Fusion嘅甜品，呢間都係可以一試。

提起九龍城，除左泰國菜，糖水甜品都好出色！最老字號既，應該係有兩層高既合成糖水！人地問，合成有咩出名！我一定會話"清心丸"！潮州清心丸唔係度度有！入黎之前我再次問老闆有冇清心丸我先入去～：P潮州綠豆邊清心丸熱的綠豆邊感覺好溫暖，豆多，胃都覺得好充實！甜度適中，好食！芒果果凍加奶即是JELLY, 朋友說好舊式風味！腐竹薏米清心丸我就最鐘意腐竹薏米清心丸！清清甜甜，雖然一陣風咁好快食曬，不過仍然覺得佢係最好食！清心丸雖然冇味，不過口感上實在令人一試難忘！煙煙韌韌！冰花腐竹雪耳清心丸多了雪耳，是另一款風味！雪耳蓮子白合傳統的味道！擂沙湯丸這個熱辣辣很好吃！！！外面花生碎很多裡面的芝麻蓉更多！食一粒道好滿足！糯米外層很有咬口！勁！蓮子綠豆邊薏米馬蹄沙這是上了報紙推介的糖水！

天氣熱，係九龍城食左熱氣野，燥熱但唔想飲涼茶，食清熱既傳統糖水最啱我。呢間平平地，重要兩層，一定易搵位過其他。一入到去每次睇個餐版就眼花花，樣樣都想食，好在今次目標為本，即叫凍百合綠豆沙清一清先。食落十年如一，好食。

香港人食完飯總要食碗糖水既,今日黎到九龍城龍崗道既「合成潮州糖水」呢間糖水歷史悠久，主打中式既潮洲糖水，天氣開始轉秋天，想滋潤下一定要黎呢度!我叫左一個雪耳蕙米馬蹄沙($36)外賣糖水非常足料，雪耳大大舊，好爽口!另外再有薏米同馬蹄，每一淡都食到。糖水質地偏濃稠，可能呢個就係潮州糖水既特色!

去九龍城食完飯再整個甜品是常識吧😂細個每次都係揀西式甜品，人大左反而鍾意食返中式糖水，有甜野食之餘又可以養下生合成既糖水真係好令人花多眼亂，如果menu上既配答唔岩心水都唔怕，因為只要佢有既野你講出尼都可以混答嫁我最愛既配答就係綠豆邊腐竹薏米清心丸，清熱袪濕一流呀！合成打正旗號做潮式糖水舖，所以依度既清心丸同綠豆邊都係寧舍好食

星期六食完晚飯，同友遊遊下車河落左九龍城，突然佢想食甜品，女友鍾意食懷舊野，咁梗係食合成啦...九龍城甜品店都幾多，不過懷舊糖水依然係合成做得最好...不過太夜到差唔多收工既關係 （幾乎1點先到），好多款都已經賣完，咁求其叫左個紅豆沙清心丸，熱食轉個頭紅豆沙由姐姐立即送上，十年如一日的好味道，清心丸口感超得！紅豆沙以落單時另加錢要蓮子（$10），視乎個人喜好咋喳係女友推介之選，可惜今次食唔到，下次再叫

九龍城真係有好多正的中式甜品舖食過咁多甜品此終鐘情中式的糖水又健康又好味今次黎呢間老字號潮洲合成甜品梗係要叫佢最有名的馬蹄沙同清心丸試下啦！記得以前細細個酒樓會有馬蹄露食，到左而家可能成本高已經買少見少，最鐘意馬蹄沙有爽口馬蹄，一路食一路有野咬下，增加口感。呢碗馬蹄沙熱食好好味，有雪耳薏米加埋馬蹄真係三重口感！味道唔會太甜啱啱好，好清甜的感覺，食哂都唔會漏。好鐘意呀！😋另一碗就叫左冰凍的雪耳腐竹清心丸，好冰涼夏天飲啱哂！有雪耳好清爽，糖水底係腐竹糖水的味，好清甜度啱啱好。主角係佢的清心丸，口感一流！有啲似椰果但爽啲，半椰果半啫喱的質感，真係食上癮呀！佢本身冇味，但配糖水一齊食就夠哂好味！強烈推薦！

每次經過九龍城, 都必定幫襯這間合成糖水 .... 或許, 某些朋友會認為這店的出品每況愈下, 已不及往昔 ~怎樣也好, 始終這店的甜品在外間很難吃得到, 所以每次經過, 還是甘心情願入內幫襯的 ~Menu ~冰凍菠蘿馬蹄沙 $ 35 : 這個是在坊間比較少見的糖水, 糖水內有蛋花、馬蹄、菠蘿粒、也有些小碎冰, 馬蹄夠爽口, 味道清甜; 還真的沒想過普通的馬蹄沙加上了菠蘿之後, 味道會變得如此美妙, 再加上因為夠冰凍的關係, 在這炎熱的夏天吃過後就是透心涼 ~本篇完 ~

完全中伏了 ！見到貼晒雜誌報紙訪問，舖入面又坐住咁多人， 諗住一定無死啦，點知真係千揀萬揀.....凍綠豆糖水：淡而無味，綠豆係綠豆味，水係水味，味道分離，之後唔知係gimmick 野定係傳統野嘅關係，加咗d小冰粒係碗糖水入面，感覺硬係奇奇怪怪咁，食食下要吐返d 冰粒出黎，擺耐咗d冰溶埋令碗糖水仲淡，真係算我不懂欣賞！椰汁西米黑糯米湯丸一樣失望, 味淡，味道同樣分離，完全mix 唔到一齊，湯丸皮厚，餡又少，而且價錢貴。