龍皇酒家 (Mikiki) (Closed)

星期六突然既假期難得同屋企人飲茶🫖2個人叫得唔多咁我地下午茶☕️時段先去首先講一講服務就麻麻地啦😔佢地理自己既熟客仔先，我地被忽略，要叫幾次先理我地😔(特價）香煎臘味蘿蔔糕 $19.8唔好食😭臘味太小啦，好似爭係係到食蘿蔔咁🥹(特價)和風豆腐 $33炸到金黃色，皮薄👍🏻好好食😋香煎鮮蝦腐皮卷 $36一般般，唔太喜歡北茹燒賣 $36唔好食😭冰燒三層肉 $118呢個正呀，超級好食😋，個皮又夠脆👍🏻XO醬炒腸粉 $53XO醬太少，唔夠入味茶位 $12/位2個人連加一 $351.8整體⭐️⭐️⭐️龍皇酒家 (Mikiki) (新蒲崗)📍地址：新蒲崗太子道東638號Mikiki 1樓110舖

2020.04.152:48pm入座，3:30pm要離座，太肚餓啦，照食！ 原來呢間冇下午茶時段，不過入座時有下午茶紙仔，大概10款，唔記得影低✅蝦餃，比想像中出色，皮都好好食夠薄，蝦都好足料燒賣，比蝦餃差少少，因為豬肉好實冇咩咬口...叉燒腸，唔錯和風豆腐，即係炸一粒粒豆腐，係特價時段點心，都好好食！不過呢間冇炸雲吞，冇碗計燒味飯/麵， 冇蒸盅飯，所以2人食好難叫一大碟飯

约左朋友過年相聚，朋友話好耐冇飲茶😄所以book咗新蒲崗Mikiki龍皇飲茶，其實疫情都唔洗book位，去到大把位。哩度點心價都唔算好貴，質素唔差喎，好欣賞 七味鱿魚，係粗身魷魚，咬落好爽口彈牙，蝦餃大大粒蝦，係新鮮彈牙的，XO醬炒腸粉夠惹味，仲有紅棗糕，新鮮即叫即蒸味道好濃😍另外想讚酒樓香片茶葉，真係好香，應該係靚茶葉。呢度食物都算高質，地方都寬敞，不過樓面有2位應該比較高级啲店員就態度麻麻， 說話好晦氣，反而傳菜姐姐仲好好態度又好笑容。一間好既食店，如有果幾位西面又語氣態度差嘅店員，真係大打節扣囉……

近排同朋友參加咗瑜伽課程，喺新蒲崗啲工廠大廈，今日做完瑜伽就過嚟mikiki行下，見到下午茶有優惠，所以入咗嚟食，叫咗個鮑汁鳳爪同埋蝦餃！佢個包汁鳳爪炆得好入味又唔會淋到爛晒，真係值得一讚，然後佢都有啲花生配料幾好，食鳳爪最緊要嗰個汁，雖然應該都唔係新鮮鮑魚整，但係唔會死鹹，都幾夠鮮味！☺️☺️另外健康啲就帶咗個翡翠蝦餃，不過不失啲蝦餃入面啲蝦都幾大粒，最衰依度冇XO醬不過都有豆瓣醬，配埋一齊真係好好食😋😋😋強烈推介可以附送XO醬🤣🤣🤣

疫情期間, 好耐冇同D舊同學敘一敘. 上網搵到龍皇係D類食肆, 一枱可以坐12個, 我二話不說就book左. 早幾日去食完, 我地8個人, 個個都食到捧住個肚走. 我地見天氣凍凍地, 叫左個羊腩煲暖下身, 都炆得幾入味. 最值得推介係半肥瘦蜜叉, 淋之如仲有少少燶邊, 超香口, 下次去一定會再叫! 我地仲叫左乳鴿, 炸蟹鉗, 翡翠炒球同瑤柱蛋白炒飯都發揮得唔錯, 係略嫌個翡翠炒球份量太少. 價錢都合理, 推薦大家試!

利申熟客，趁疫情冇生意自卑就扮高級，其身不正重要叫人等一個鐘，入邊根本就有位，冇學歷冇料到蒸蝦餃隔夜隔到爛晒仲有面皮俾食客，位置古怪又污糟，一生見過最差嘅酒樓，不知所謂！

前一個月老豆同細佬好忙，今日終於有時間齊人食餐飯。啊媽就約咗我地琴日落樓下食晏就。真係好耐冇試過齊人。啊媽見老豆同細佬鐘意食叉燒就專登嗌一份俾佢。而我同啊媽就嗌咗份蝦餃同炒麵（净係影左呢張相）。平日個叉燒都算淋，今日嗰d就有d咬口，不過水準都keep到。份炒麵就唔會太油同太鹹，算好食。不過啊爸後日又要趕工，希望可以快d再齊人食飯

今日晏晝嚟到mikiki龍皇食晏，難得唔使返工，當然就要對自己好啲啦，所以喺佢個love sake menu就叫咗碟$168龍醬炒日本帆立貝慰勞吓自己。一上到嚟靚到wow一聲，下面滿滿嘅西蘭花襯托着柔軟有彈性嘅日本帆立貝，而且精美到用貝殼來做半碟，佢嘅龍醬帶咗少少海鮮味道，微辣得黎十分惹味！撈埋落飯立貝上面食，中和左佢嘅鮮甜味。另外叫多枝$268嘅川波 吟釀清酒，中菜配日本酒真係比較少見嘅配搭，但今次同海鮮又真係幾夾，而且店員服務好細心，間唔中會check吓枝酒夠唔夠冰凍，sake完美地平衡返咸同辣嘅味道，不錯不錯，可惜嘅係佢冇一杯杯叫，恰我呢d獨獨。

出色嘅酒，係可以帶出食物嘅鮮味，紅酒，一般配紅肉；白酒，一般配海鮮，而清酒，應該都算係白酒嘅一種，所以佢同海鮮係特別夾嘅，而家嘅餐廳都會以佢哋嘅招牌菜同酒去做一個pairing，等客人嘗試唔同嘅配搭食出唔同嘅風味。好酒之人我去到mikiki見到個優惠價menu真係會忍唔住，直接叫左枝池龜純米吟釀，特價$288，而海鮮就揀咗佢配搭嘅砵酒焗石蠔，石蠔嘅size好大隻，大隻都起碼要分三啖食，肉又肥美多汁，而且炸漿薄薄一層，一咬落去真係會爆汁！第一啖你會俾炸焗蠔本身嘅醬汁同埋面頭嘅椒蔥粒驚艷到，但當你飲完一啖米香十足嘅清酒之後，酒體通夠豐富出蠔嘅味道，又會有另一番滋味，值得一試

疫情之中我諗最受影響嘅可以算得上係酒樓😖平時每星期都一定會同家人飲返餐茶，但呢一年已經唔同晒了！依家叫做受控左啲，同家人飲茶聚會又可以開始返~餐廳都有唔同形式、各種各樣嘅宣傳手段及活動！今次飲茶之餘，就叫埋佢哋呢個seafood loves sake活動！呢份淮陽浸海虎杉斑大盤且氣勢十足！$268/份香濃嘅鮮雞湯浸海虎杉斑，湯濃郁又香又鮮🤤淨係飲湯都飲飽。海虎杉斑先炸後浸，但魚肉仲係好鮮嫩！🐟🐟配埋sake一齊食又幾唔錯，鮮味更加突出，又帶有一點餘韻。其他點心都唔錯，店員都殷勤有禮，上菜速度都快👍🏻

九龍城中菜嘅選擇唔多，想飲茶嘅多數都諗起Mikiki嘅龍皇！今日難得番晏，約埋個同事食個lunch先返公司😚😚12點鐘入到餐廳人未算好多，我哋叫咗啲點心食，同事話唔夠喉，咁啱見到餐廳搞緊promotion，就叫左一set黎食！呢個活動係講海鮮配上sake，兩者相輔相成，唔係淨係日本菜嘅專利🤣龍醬炒日本帆立貝$168日本帆立貝都幾大粒，但係最好食嘅係佢個醬汁，撈埋西蘭花一齊食非常入味，真心正，就咁食都唔錯，加埋清酒又會點呢？餐牌上就建議配搭呢支川波吟釀$268入口有少少甜，算易入口，同醬汁嘅微辣味道幾夾，提升返帆立貝嘅鮮味，話咁快就清晒成碟😂😂食飽晒先返工，人都零舍精神🤩

近排發覺自己肥咗好多，出街都唔夠膽食咁多嘢，所以都淨係可以嗌個秋葵食，都好彩唔係白圾水煮嗰啲，唔係真係淡而無味！😅😅😅佢個醬汁勁好食，好似有啲XO醬又有啲辣椒醬但又唔係好辣嘅感覺，我唔知點形容佢個醬汁，配埋秋葵嗰種特別嘅口感，好鬼夾😋😋😋希望今次真係會減肥成功，多菜少肉少飯！因為年尾要做姊妹，我唔希望我肥到隻豬咁😭😭😭而家見到自己嘅身形真係好想哭，大家有冇嚟到酒樓可以食得健康啲嘅方法推介下我？😅😅😅

唔知點解覺得而家係出邊嘅糖水舖好難食到好好食嘅楊枝甘露，一係就太甜一係就太小料，所以都係幫襯返食開嘅最有信心。自從上次同屋企人食過依間嘅楊枝甘露之後，就一直都幫襯，佢楊枝甘露真係好鬼多餡料，芒果又好大，勁鍾意❤️如果得閒嘅話都想自己喺屋企整，可惜而家返工日日都勁忙，都係放假先可以過嚟食，不過平時收工經過都可以買個外賣嘅😅😅😅

最近揾到份新工，咁啱上星期日又係父親節，一於做個乖女上網search左呢間野想嘆返個靚茶，多謝下爸爸我地照例飲平時飲開既鐵觀音，野食味道唔錯，我地一家四個人都叫左唔少野食，食得好飽最鍾意既就係紅棗糕，係我每次飲茶必叫，真係好好味甜甜地又唔會太甜，就算唔係太鍾意紅棗陣味可能都會鍾意食可能我地比較早到啦，等位都幾快，人唔算好多，總之對於呢餐父親節飯我地都好滿意

以前都食開, 不過水準跌了, 都不是重點, 服務越來越差! 過時過節都book 佢啦, 今年諗住母親節再幫襯下! 早一個月Openrice Book枱食, 電話confirm 埋訂位, 跟住一星期前打來話時間問題, 你只得1個鐘食! 心諗都唔知係咪趕客! 明白疫情關係想搵多啲, 平日Lunch 食午飯就話Jai. 母親節叫啲老人家點食得咁快, 仲要冇時間book 第二間! 取消啦! 點知之後幾日, 每日都打來話Confirm booking. 心諗前枱做咩? 有抄底架咩? 不會再幫襯!