大快活

Open Now

Now Closed

見鄰舖大家樂多人到暈，就決定行多幾步去大快活。一個人，唔知食乜好，見有我至鍾意鮮蜆意粉(前幾日先Te食過)，心諗大快活好耐之前sell呢個意粉廣告sell到咁行不過自己又未試過，所以就叫一客。意粉煮得好，非常唔錯；蜆同Te一樣都係十五隻，不過就好瘦；碟頭唔算好大(不過三十蚊...算啦，一個女仔我覺得夠食)；個汁就比較鹹，同埋食唔出乜味，冇蒜味冇海蜆味)。不過總括講，以三十蚊唔包飲有個蜆意粉，今餐我好滿意。

近日好忙，累到有點呆呆地。有人說，狀態不佳時，切勿約會。於是，我單拖到這兒吃晚餐。晚上八點鐘，位於商廈的這間「阿活」都有四成滿，算係咁啦！原本想吃阿活咖哩，但見近日唔夠‘訓’，都係熱氣停賽一次。翻抄阿活肉醬意粉！（廣東人就係會計算熱氣唔熱氣呢籠野…）晚餐（$30）：有「火龍果沙拉」（份量唔少，都幾好味）、「阿活肉醬意粉（輕盈版）」（肉醬味道濃郁，但唔會勁口渴，好好味）、「凍蜂蜜綠茶」（味頗清淡，幾好！）絕對有下次。另：相當喜歡這店的裝修新設，陳幼堅先生果然係翻幾道散手！咁多年都仲係新意不絕，好！

週五下午，到金鐘開會後到這吃個茶餐，才回公司。我要了份「下午茶餐」（$15；圖示）。有原隻燒雞翼、玉米杯，飲品選了熱鴛鴦。另「楊枝甘露布丁」（換購價$5）。原隻燒雞翼好苗條，但燒得幾香脆，塗上糖水的外皮略見香脆味道口感。玉米杯好甜美，好好味。熱鴛鴦係錯誤選擇！因為這兒以「即磨咖啡」撞港式茶膽，不倫不類！要求少奶，變成多奶，唉！楊枝甘露布丁：好好味！雖然魚膠粉下得兇，但算多‘楊枝甘露’料。marginal cost 才$5，好抵！

本人在今天下午惠顧了獅子頭菜飯,不過有酸味怪味,大快活的食物品質一成不變,都係咁差,請貴公司不如執左佢以免害人害物

(6/7/06)遠東金融中心,好舒服的店。阿活比以前好食左好多,所以一有o岩我口味的新攪作都會試。意粉熟度o岩o岩好,汁而言,芝士味重過蜆味,蜆仍有ok的鮮味,所以這個pass。配埋唔過涷的綠茶,好滿足喇。

大快活由原本好差逐漸改善，之後停滯不前，到依家打回原形！中午食咗個set：牛扒雞寶火腿扒飯($27)，好唔掂！咁簡單嘅快餐都可以攪到牛扒韌，雞肉鞋，飯又濕，得塊唔駛整嘅火腿扒同杯奶茶OK。重要唔覺唔覺加哂價，就算味道唔係咁差都唔抵食。重有一樣嘢氣頂：上個月買咗部Motorola手機，送咗一疊共15張coupons，喺大快活食嘢送「紅豆什果杏仁奶凍」，5月31日先至到期，居然我最近前後幫襯咗兩次(連埋今次)，一午一晚，都係話無，一張coupon都用唔到！唔係好恨食甜品，不過送coupon乜唔係為咗宣傳同想人試吓佢啲新嘢嘅咩？！點做生意架！

週四晚上，女友心情不好，說想吃點辛辣的食品。便拉了我到大快活吃「阿活咖哩」。晚上七點，僅三成滿。可以坐在窗邊的坐位，向天馬艦方向望去，見到漂亮維港，好漂亮。我們都點了「阿活咖哩牛腩飯」（$25）。此店服務不俗，付款後，把收據交到櫃檯，店員便禮貌地這我們埋位等。不消三分鐘，服務員便把食物送到我們跟前，好一間半自助快餐店。我不知道「阿活咖哩」是那一派功夫，但只知道對口味！料多濃郁惹味，可謂色香味美。有牛腩牛筋，又滑又無渣。香辛，但不會吃到流汗面紅。=============================================題外話：為了安慰沮喪的女友，以九秒九跑到附近的「黑麥」，買了個藍芝士黑椒法包，偷運到這兒。讓女友用來沾阿活咖啡汁食用。的她雖沒說什麼，但看得出她有點感動。兩個人一起，互相扶持是相處之道。

我個次食叉燒賴粉外賣，佢地好好咁將叉燒賴粉同湯分開兩碗。等我可以返到公司自己加湯食，D粉唔會林曬。讚呀!

一早出site,時間尚早,食個早餐晒時間.試個新野,美國鮮嫩滑蛋早餐.擺明sell滑蛋,果然好食,一隻咁普通o既蛋唔知點解做得咁滑,係炒蛋上仍然留有蛋汁,但係應該幾油膩.配件扒,牛油餐飽,麥皮,飲品.雞扒唔掂,太硬同"的式",牛油餐比佢咁樣攪法,真係無從入手,無辦法查得渾,唯有硬食牛油,諗起都牙煙.麥皮淡茂茂,本人比較喜歡甜o既麥皮.$19,抵唔扺見人見智.

24/8 （Wed）Breakfast晚晚咁夜放工，除0左係唔夠訓，其次就係每朝都要0係出面食早餐！龍蝦炒蛋（個名好聽到...）+火腿+一件不知名0既包，腿米，熱啡；個炒蛋無論如何都睇/食唔出同龍蝦有咩關係，腿米勝在個湯夠熱辣辣，件包-唔識形容，個口感好尷尬，咬落去似包又似蛋糕，個人0黎講唔係咁欣賞，熱啡唔使講一路都係我心頭好。唯一等位真係好煩好煩∼有時買0左0野先搵位0既話，唔到位果刻真係企左0係度唔知點算好∼

17/8 （Wed）Dinner晏0左放工，屋企無飯食，好彩見到大快活，真係好鬼有親切感（「大」曾經係我0既獨家飯堂咁滯）睇完一輪揀0左咖哩雞扒飯﹣一貫香濃惹味咖哩、一貫肉質脆嫩有緻既雞扒、一貫百份百滿足！如果唔係已經晚黑10點幾，我實隊埋個即磨熱咖啡，咁仲唔一次過滿足晒3個願望？！

大快活實在進步左好多好多. 早排一支公叫左個輕盈午餐: 阿活肉醬意粉( small portion) + 原茄和風沙律+ 低糖綠茶. 佢地個肉醬真係夠鮮茄香.肉質夠彈牙. Small portion 夠女仔食喇. 欣賞佢地唔用錫紙盒載住. 雖則保溫否則個pasta會太淋.原茄沙律配芝麻汁配合得好. 對於我呢個愛茄之人真係嘗心樂事也. 據聞個別分店沙律隔水功夫做得不足. 真係要注意~

我去的是銅鑼灣分店。地方非常闊落，位子算舒適。早餐很豐富，一個餐包括即煎雙蛋火腿同厚多士，並配麥皮。即磨咖啡算幾香濃。大快活果然有進步。服務仲很好！另有一個厚多士配咖啡嘅早餐，只是十元便有交易，多士仲係即烘嘅，正！不過這個餐星期一至五才供應，星期六日係冇嘅。

雖然大快活改革後d食物係改善，但係就唔知點解燒味重係唔得。早兩日食佢三寶飯，d 叉燒瘦得滯，好似柴皮！

依家響添美道中信大廈開左間新鋪, 本身諗住去大家樂食下午茶, 點知佢唔知裝修定執笠, 黎左依到食.下午茶好多野食揀比大家樂多, 叫左叉燒出前一丁同低糖綠茶.另外total嗌左6個餐.可能d人都好新下都幾混亂, 仲漏左我地一個麵.佢d出前一丁係續個續個煮因為煮完一個要等三分鐘先有另一個出.咁樣都幾好感覺好食d^^不過我就因為等埋另外個人先食我個麵就凍左喇><但係神奇既事就係個麵竟然冇發漲, 師傅好勁.我舊叉燒都幾un其他人話燒鵝都un.但碗出前一丁真係好好食(可能冇食晏晝太肚餓喇), 麻油仲係自己落架添另外我杯所謂低糖綠茶好鬼死甜, 味道好似道地既蜂蜜綠茶, 但我記得佢唔係低糖.再要講既係仍然都係班新人啦, 佢地真係要配合得好d呀,因為好多張單包括我地其中一個下午荼餐,買完埋到去先話冇依樣冇果樣要轉其他野.再係咁遲早俾人投訴