慶相逢喜讌 (Closed)

星期日想找個地方飲茶 就隨便入左間酒樓-慶相逢喜讌等左10分鐘就有位 通常3歲小朋友都不計茶位 但是問左經理佢話坐係度就計 咁就計囉咁大間酒樓 得2個經理係度幫手 佢地好忙 而且好暴燥 我坐近的是入單位 就飽受燥音 其實星期日同家人飲茶都係想放鬆下 傾下計 但環境嘈到心情都差埋 仲要係咁聽到D暴燥的說話 自己都差埋點菜後想請待應收洗杯盆 可能佢地太忙 完全沒有人能回應 應左話黎都沒有黎 或者有些員工話唔係佢跟...另外 點心餐牌選擇較少 沒有流沙奶黃包 也沒有炒米粉 呢D基本款 想點生滾粥 又賣哂... 真係唔知點咩先岩叫左大約7款點心 味道都還可以 鮮蝦菜苗餃夠大隻都幾好食 鳳爪太咸 牛肚D黑椒好辣 燒賣超細粒  不過服務同態度真係要改善下

商場得呢間酒樓選擇雖然知道食物味道一般 但甘岩想飲茶就入去午市12點入去坐低 茶水都好快手有人拎過嚟但劃完單想叫人落單 個場甘大得兩個經理同數個員工 知道可能未必夠人手 但都等左10分鐘都冇人跟進落單 有員工經過都扮睇唔到選擇左4樣食物 第一樣食物等左15分鐘先到明白唔係快餐 所以繼續等 最後半個鐘都未有食物到 其中一樣係燒腩仔 難道燒腩仔係即燒🤔終於叫到個員工幫手跟一跟單 原來4樣食物只係入左兩樣機 白等左半個鐘已經完全唔想再食 個員工話入番單要再等多20-25分鐘員工完全覺得入漏左一半食物單冇問題甘而負責入單果兩位員工都係掛住傾計反映番入漏單事件 仲問番我想點 都冇得指望可以有咩跟進只係想開開心心飲個茶就真係齋飲茶而冇食物落肚👎🏻👎🏻👎🏻冇下次

唉😮‍💨～今時今日，飲個茶都最好上網查一查各食客的食評。200字以上的食評不易寫，需要一定的動力，重力來源不外乎興趣，太好食想分享，太伏提醒大衆別浪費了血汗錢。這間情況如何請自行分辨，用餐體驗如下：去食下午茶，坐置多多，卻硬要安排你坐在放食物殘餘收集處附近，說要走，才安排你坐正常位，但卻說要搭枱的，我就見其他枱都係一樣大和兩個人，就表示要搭都未到我這邊，鬼知道佢哋玩野，一有新客就安排我這邊枱，明顯故意嘔心食客，態度極之惡劣，我問他們為什麼不安排另外那處先，他們就當聽唔到。食物方面一般，能入口。這間已被我列入永不再光顧名單。

難食，服務態度差，叫了幾個點心，排骨飯，生滾粥，千層糕，炸雲吞，蝦腸粉，全部縮水，蝦腸蝦吾新鮮，粉超厚，食落一舊舊粉，碗粥好似水 ，魚片得2片！屋村酒樓但收得貴，問下d阿姐野，仲要阿姐態度又差，去幫襯仲要比人鬧，食完一肚氣，以後吾會再去，寧願去遠少少飲！

四大三小食晚飯出品好差，d雞肉無口感 ，小炒王炒到好似蒸咁，成枱餸菜，得條魚叫食得下，全部都好難食。瑤柱蛋白炒飯蛋白包紙巾比客人食，同經理講返，個經理當無野，再叫管理層處理，竟然唔夠膽面對 ，只係逃避冇責任 ，衛生不可接受。疫情期間，張紙巾係用過，整得實一實係個飯入面撈埋蛋白，實在太令人嘔心。

《一家人幸福盛宴》早幾晚與家人大團年飯，在慶相逢喜讌共三圍，我們吃得開心及滿意！燒鹅正，外皮脆香而鵝肉淋香，汁味也剛好，超正！雲腿螺頭豬㬹燉烏雞，食材料足又夠火路，濃料但湯清香甜，一入口已來讚，連飲两大碗，重要是之無味精！好!瑤柱花膠海参炆大鵝掌，看出厨房用心做，而份量也足，材料上乘，我們家人也笑說此豪餐團年好開心！另特別訂了龍虾、大班两味、也超水準，非常出色，而其他鲜蝦荷葉飯，伊麵，甜品也叫好，尤其奶黄煎堆仔令人愛不惜手！我們一家在慶相逢喜讌吃這钣局，環境又好，家人三圍人都說要再來大聚會，及值得推薦的酒家！

呢間酒樓我食過真係好多好多次～～～～每次馮節日或者見婆婆都會過嚟呢度食～～～～～～～～今次食咗個龍蝦焗伊面所以想放上黎比大家睇下～～～一般喺酒樓都唔期望太多㗎啦，但係呢個伊面又煮得幾好食，啲龍蝦非常非常之大隻～～～我執都唔會太鹹好適合老人家或者小朋友一齊食～～～～～不過個伊面份量就少咗啲囉，每人食咗幾啖就冇晒啦⋯⋯但係呢度啲職員都幾好人嘅，另外提一提呢度啲冷氣都幾大架～所以每次你都要帶番件外套～～～

唔知係轉左幾次手定改咗幾次名，呢間酒樓終於有正常返嘅一日。試咗幾次夜晚嘅小菜，除咗俾人感覺碟碟都有翠玉瓜之外，質素都算正常。調味OK，啲料有正常，最多係覺得有少少貴。

今天約了舊同學交換手信,為了方便有兩個小朋友既同學所以去了她家附近商場相聚聊天,所以大家一見面就決定到商場中的酒樓,因為可以長時間聊天又不怕被人叫買單,我們是1點左右去到所以係正價午市入去,一打開點心紙立即比一個叫沙窩避風塘蝦餃所吸引...又特別又未試過所以二話不說立即落單,另外又叫了一些平常飲茶都會叫既點心,例如蝦餃,鳳爪,奶皇包,牛肉腸等等,味道真係好一般無咩特別,係牛腸比較好夠曬滑,反而係個避風塘蝦餃令我失望....因為個皮比個沙窩搞到爤曬...又放太多黑椒,,辣到本來既味都食唔出

上兩個星期，女朋友既爸爸生日。係依間酒樓擺左一圍，親戚朋友一起相聚慶祝食飯。話哂第一次出席，當然有d 緊張。但最重要既係，間酒樓d 食物幾好味， 比出面大集團既酒樓更有質素。 這頓晚餐意義重大，終於的起心肝花筆墨記下來-當晚菜餚一道接一道，樣樣都好味先黎「脆皮乳豬」, 賣相靚剛剛燒好皮夠熱夠脆！ 「龍蝦伊麵」份量多，龍蝦夠哂爽彈鮮甜「芥末炸蝦球」蝦球大大粒有，炸粉夠薄！ 烤合桃夠脆口。 「酥炸蟹鉗」 蟹鉗係每次去飲宴都最期待的！ 啖啖肉，口感爽彈，雖然是炸物，油澀得夠乾不膩「雞燉翅」嘩！十分足料！湯底濃郁，足料矜貴。 原隻鮮雞去燉！ 雞肉好嫩好鬆化，輕輕一撥就骨肉分離。「脆皮炸子雞」如賣相般，既吸引又好味，又唔會偏咸，皮夠脆口「炆鮑魚鵝掌」夠入味，鮑魚好有咬口，底部生菜都夠清甜還有嫩滑蒸魚、炒粉麵飯等等最後還有壽包同生果拼盤！好滿足！

這天放工後，朋友帶我來到這間位於秀茂坪商塲的任食火鍋酒樓，放題的定價也延合理，食物的種類也不少，店內環境很寬敞和清潔衛生新鮮彈牙的魚皮餃，軟彈煙韌的香菰貢丸，新鮮生蠔，海水味比較淡，人們較容易接受，肥牛份量很多，質素不錯，新鮮的蝦，沙嗲湯底比較淡，沙嗲味並不突出整體來說，火鍋食物的選擇多，火鍋的用料新鮮，食物的質素可以接受，火鍋的定價可以接受，店員有良好的服務態度，所以我認為這間餐廳可以再去惠顧

今日去左秀茂坪酒樓到飲下午茶。差唔多14:00黎到，唔洗等位。👍🏻👍🏻👍🏻假日下午茶☕️14:00-16:00小點$15中點$18.5大點$20.5特點$26.5腐皮卷，個皮小小脆，入面多汁，足料。流心奶黃包，似係普通奶黃包，唔覺有流心既口感。😭😭燒賣都幾大粒。⭐️點心🥧都唔算話等左好耐⭐️服務態度一般，未至於好好，但又未話好差⭐️如果下午茶有點心套餐會更加好。(e.g: 拼盤套餐)

難得一日放假，所以去左搵婆婆飲茶，但因為婆婆屋企附近只係得一間酒樓，唔想佢行得太遠，所以一定係去呢一間飲。朝早時七點到11點3有d精選優惠。例如佢有d孖寶優惠，但其中一款一定要揀飯、粥或者炒米炒。雖然係抵食，但因為唔會叫咁多飯或者粥食，所以都唔會叫太多孖寶😅😅仲有另一張正價點心紙，雖然無優惠，但選擇都叫做多既。3個人叫左6樣點心,▶️燒賣黎到已經散哂 ，雖然面頭有d蟹籽，但都只係好普通既燒賣▶️流沙奶黃包，一d流沙都無，只係一個普通既奶皇包▶️菜苗餃，味精味好重▶️鼓汁蒸鳳瓜係最好味，雞腳好入味，而且好易就骨皮分離不過有得揀我都唔會再幫襯。因為食物質數真係好一般

我哋今日去咗秀茂坪商場，因為裏面淨係得一間茶樓，所以我哋就決定喺呢度食飯，仲有成個鐘先至到下午茶時間 ，但我哋已經好肚餓，所以就係晏晝嘅時候入咗去，呢度基本上都唔需要搭枱，等五分鐘已經入咗喇 。我哋睇咗個餐牌 價錢一般，有啲貴，所以我哋嗌咗個金菰肥牛炒河，再加兩，三個點心，等咗差唔多20分鐘，終於有嘢上枱，炒河嘅份量都夠2-3人食，內味啱啱好 但係啲粉就有啲過濕，麵同麵之間好難夾起，炒得唔係咁好，我另外嗌咗個皮蛋瘦肉粥，有啲過鹹，味道一般，皮蛋就小咗啲。小籠包汁多，夠熱，整體上嘅食物都唔錯。

星期日同屋企人去飲茶，飲茶嘅人真係好多，應該大部分都係住附近嘅居民。等左15分鐘左右，就有位啦。我地叫左一般點心，好似蝦餃、燒賣、排骨、牛肉球、奶黃包、叉燒包、馬拉糕、腸粉、蘿蔔糕，味道唔算好好食，但以屋邨酒樓黎講，算係不過不失最後埋單要400幾，感覺依家飲茶真係好貴