瓊芳冰廳

Open Now

Now Closed

首先，店內衛生有待改善，用過的碗碟堆滿車仔，就咁擺係收銀處。近大快活的用餐處，多張台在食客用餐後無人執檯，碗碟紙巾就咁攤係度。第二，排隊時間不長，7成滿 （不計近大快活無咩人坐的位置），可惜店員服務態度認真麻麻，見人等位無理以無示意😐。 等到店員空閒，向一名長髮戴眼鏡瘦高女店員示意入座人數，2-3次都無回應，最後一次係你等下先，仲趕人出店鋪外等，話企去來好大壓迫感😇跟著有人企鋪外面等位時看電話，她大聲「喂！咪企係度玩」，個客最終有入座，都講了句「我都想有嘢玩」嗱，做生意的唔好知怪人不肯留港消費，咁趕客的態度，幾好食都不會回頭。 其實大家都仲好想支持本地飲食業，但服務態度搞到咁，好似搵氣受咁，何必！不追起5星級服務，合理正常的對話態度已經足夠，但連咁都做不到。

相信有喺ICC圓方九龍站附近度返過工嘅朋友仔，都應該知道附近冇乜好多選擇，如果想要揀返間香港嘅港式茶餐廳更加少之有少，瓊方冰廳基乎就係呢度唯一嘅選擇，所以今日就去左試試！粗略喺OpenRice度睇過有關佢嘅食評，大家都覺得佢嘅黯然銷魂飯，即係叉燒煎蛋飯並不出色，而且性價比唔高，甚至有被不少食評家foodie朋友評為劣食，所以我就叫咗一個比較穩陣啲嘅菜式-蕃茄意粉，而我朋友就叫咗一個咖喱雞扒飯。講多少少，有關佢嘅門面裝修都算係中規中矩，但係服務真係一般，入到去嘅時候差唔多全部枱都未執啲碗碟，我哋坐低咗一段時間都未有人serve我哋，去到我地用QRcode叫完嘢食先至有人執檯，而且啲餐都嚟得比較慢，唔怪得佢冇收服務費

開咗一直都唔知喺邊，大快活落扶手電梯見瓊芳，諗住試吓呢個冰室。見係原來太興集團，諗住嗌叉燒，就叫咗個黯然銷魂飯。上桌分量大。叉燒瘦同燶邊冇問題，但係佢超。級。乾。好似食緊擦子膠咁樣。 飯面嗰浸硬身，好似生米咁樣，但係裏面就糊口太多水。同一碗飯做到兩種口感真係好神奇。個煎蛋就合格嘅，粟米就正正常常。裝修OK乾淨靚仔，但係嘢食真係唔得。個叉燒同太興真係爭太遠。唔知係咪下午茶時間關係。。一舊水咁樣不如食隔離大快活。

係度食個早餐過隔離高鐵站都好方便。今次好好彩唔使等位，之前晏晝嘅時候經過都多人排隊😖😖同男朋友兩個人叫左沙嗲牛公仔麵同埋雞扒餐。沙嗲牛肉好過敏華，牛肉比較嫩冇咩渣。雞扒都OK煎得好食。呢度嘅凍檸茶都好飲，茶味啱啱好唔會好濃，檸檬又唔會好酸，不過少冰都係會有好多冰，少甜係啱啱好。炒滑蛋感覺好似無咩奶，唔係好滑不過我都覺得OK好食。餐包係厚身嗰隻，冇澳牛果隻咁好食，不過都ok，附送既牛油唔會係雪到硬一硬嗰隻，容易搽落塊麵包度。口痕再加多咗件蛋撻試下，酥皮鬆軟，口感都唔錯。整體都可以。係圓方依個商場黎講係good value🤓👍🏻

九龍圓方高級商場收成$80-$100嘅食物及熱飲全部唔熱，安排入坐超慢，明明有枱又唔安排入坐，某個員工全程黑面唔理人，去大家樂大快活起碼食物同熱飲都係熱，收咁嘅價錢比呢啲質素，一個字「差」！

以為開係圓方這個地方，起碼有返啲食物質素同服務態度，食完個餐飲品都未到，其實唔夠人點解唔開少一部份，呢間係太興集團，食物同大家樂冇分別，總之搭車去食茶餐廳好過、唔怪得香港人越嚟越少喺香港食嘢😤

✨紐西蘭西冷牛扒配黑椒汁意粉［晚餐］配：羅宋湯、熱朱古力羅宋湯真係好難飲，好似我小學飯盒嗰陣臭味😵😵‍💫不過牛扒好厚實但唔會好硬，有少少酒香(?)，同黑椒汁好配👍🏻🖤✨蔥油豬扒煎雙蛋飯［精選推薦］食落好似健康餐🤣🤣豉油同蔥油落好少，豬扒調味唔多，蛋唔算煎得好油膩🍳。豬扒唔算好厚切，係偏薄身，is ok👌🏻蛋就還可以啦 蛋黃仲係生 撈飯食都幾好食。

一行4人排隊排左好耐，但其實入面有好多空枱冇人執，最搞笑係坐低左，掃QR code，得常餐同叉燒蛋飯（黯然銷魂飯）係可以揀，其他都寫售罄，而當時係晚上7點15分左右。由於真係冇野食可以揀，所以再口頭問左收銀個店員「售罄」果啲係咪真係冇得，獲回覆係賣曬。最後點左餐，過左20分鐘左右，又聽到其他枱食客問同一個問題，結果另一個店員回覆係有得點其他餐，但要等好耐⋯⋯我再掃QR code，變返有得點其他餐，真係好無奈☹️

職員態度非常差，叫帶位好似欠咗佢咁，係差到反映到澳牛服務有幾好嗰種差，而且上菜速度非常慢，等成半個鐘先有份咖央多士。推薦去隔離大快活，抵食好多👍🏻無謂來呢度貼錢買難受

趁天氣好，想去西九龍行吓。所以喺圓方食咗嘢先慢慢行過去。打算食個快餐，所以搵咗間冰室。當到咗要排隊，大約等10分鐘。其實見到都有吉枱，不過職員好忙趕唔切執。我哋叫午餐，煎蛋免治牛肉意粉，厚切餐肉煎雙蛋飯。 意粉份量比較少，放一個平碟上，賣相麻麻地。餐肉煎蛋飯太少豉油汁，豉油落咗碗邊，賣相唔得。意粉同飯嘅味道正常，冇驚喜。

見食評唔錯，帶個外地遊客去試吓個早餐。一行三人都叫炒蛋多士加沙茶牛肉麵，點知食咗兩啖之後發現自己嗰碗有隻唔細嘅曱甴，係長過指甲（手指公），仲要已經食咗幾片牛肉，第一眼以為自己係睇錯，睇清楚之後成個人彈起，真係嚇到成個彈起，從來從來從來未見過咁大隻曱甴係自己嘅食物上面，仲要帶朋友去，嚇親兼且超尷尬味道方面，沙茶牛肉麵唔使講啦，炒蛋多士係正常嘅，但係個西多士勁油，一咬落去成口油唧晒出嚟，三個人每人食咗一啖就放棄咗

因為朝早要經圓方搭直通車北上，所以早到少少換完車飛，就係返商場揾間餐廳食早餐。咁就最方便！圓方地下嘅餐廳會係相對平民之選～今次就揀咗瓊華冰廳，食返個港式早餐先～叫咗套餐：忌廉雞湯火腿通粉 拼 雙腸 歐式軟多士 $44雞湯嘅雞味都幾出通粉彈牙火腿絲都有肉味雙腸係香草腸但係腸衣比較厚同硬多士係厚多士配Anchor牛油多士應該都係預先準備咗並唔係特別脆跟餐飲品叫咗熱鴛鴦口感唔會好濃稠咖啡同茶底味道適中最後，再叫埋個懷舊酥皮蛋撻 ($9) 試吓幾香蛋味～但係甜度稍微甜咗少少蛋漿都幾滑撻皮皮邊酥脆但係底層就比較實同埋撻皮嘅油味(唔知係咪酥油味)比較重整體嚟講，不過不失

圓方商場向來都係貴價商場，嘢食選擇唔多，唔知今次帶大家來到懷舊港式茶餐廳會有咩食呢😋成個鋪位裝修風格都幾和風，每張枱都有棧小黃燈，都幾有情調㗎~得意嘅係佢有分開三個用餐區，而且廚房送餐位係獨立商場另一邊，所以佢地為方便都係二維碼落單啦正常大路嘢呢呢度都會有嘅，不過單價偏高，如果大家來轉車站就地方便嘅話，都不妨一試下香港地道嘅味道。特別嘅係佢懷舊特飲都幾有心思，紅豆冰就見得多，但好少餐廳有忌廉溝鮮奶、菠蘿冰之類。見到佢個手拍荷皮老薑檸樂都真係幾吸引😍而且出面買都好少見，價錢都唔貴，我個人極度推薦！🔻1. 黯然銷魂叉燒蛋飯一上到枱，叉燒肥瘦適中大大舊，簡直就終極厚切燒豚肉😝我最喜歡就係切得大大舊嘅叉燒，出面有時D茶餐廳切得u n支咁細份真係唔過癮，但呢舊甜度烤度肥瘦都正中我下懷！佢嘅炒蛋都又滑又嫩，而且有得揀唔同嘅蛋，都幾貼心㗎🔻2. 星洲咖哩牛肋條飯今次牛肋條般般賣相啦，雖然個飯似學校飯堂，但比多少少耐心佢，食落都幾有驚喜。牛肋條煮得入味又滑，裡面哥薯仔唔係普通薯仔，而係炸薯角再浸落咖哩到。🔻3. 鮮牛奶/紅豆冰唔好話我夜晚飲咩牛奶，就係心血來潮，咁難得有餐廳餐飲做香港懷舊維記牛奶，仲只

和同事工作完打算進來快吃晚餐，晚上8點40分來到這間分店，餐廳仲有四成滿，仲有好多枱未收拾。誰知道多種食物已經賣完，唯有點個最簡單的炸雞翅米。聽餐廳經理和廚房說話，廚房已經準備下班。不知道是不是因為準備下班，所以免得煩，經理直接跟我說這個時間連米粉都沒有，要吃吃公仔面。其實就是不想回家吃公仔面，才想著來這裏快吃晚餐。什麽都沒有的情況下，最後唯有起身離開。經理勁開心，立即和廚房說最後一桌客人都不用做了可以收工了。其實一個茶餐廳連米粉都沒有真係匪夷所思，虧你好意思講。定係廚房趕著下班費事做？Elements租這麽貴，正常租戶應該吾會因為想為早點下班而縮短營業時間，偏偏這間茶餐廳就是這樣，雖然不知道賣多少個茶餐先夠俾租，偏偏就是嫌你單細不稀罕你幾個客，財大氣粗😆😆

恐怖嘅發霉黯然銷魂飯，嘢食方面比以前差。但係冇諗過個竹盤會發晒霉都照比客人。超級好唔衛生，真係好核突。仲係有嘢浮出來的。十分嘔心以後唔會再來光顧。簡直不知所謂!