江記粥粉麵茶餐廳 (Closed)

今日(13-4-2010 Tue)同男友起身後去食早餐,問男友想食咩o野?佢話呢間啦.好的.我要$18.00o既沙爹牛肉煎蛋麵,飲熱奶茶.男友都要$18.00o既五香肉丁麵,加$2.00飲凍檸茶.一會,所有o野都到齊,我o既沙爹牛肉麵有好多沙爹牛肉,蛋係煎雙蛋,半生熟o既.沙爹牛肉汁唔太多,香味都欠奉,但都可以接受o既,麵又唔太腍,o岩o岩好.不過差唔多食晒時,竟發現有一條罐頭鐵線.奶茶就都係一樣水準,有茶味但唔濃.而男友o既就冇咩評價,冇問題啦.

今日(23-3-2010 Tue)朝早同男友起身同佢出發上大陸拎o野,先o黎一個早餐,o黎到竟然新加多款$15.00o既多士餐,冇講供應時間,咁即係開舖到收舖都有得食.咁我就叫個奶油多加熱檸水.男友就要白粥同兩碟腸炒. Total$31.00.佢o既o野先到齊,之後到我o既,我o既奶油多有好多鍊奶,所以好夠咁好夠味,正.但檸水又好澀.男友o既腸粉食到米味,滑就唔算太滑.

今日(19-2-2010 Fri年初六)同男友起身後,要快快食早餐後佢要返工,我去睇中醫,天氣仍然寒冷,要食熱o野喇,就食粥啦.我叫$16.00o既牛肉粥加彤腸粉.男友就叫肉丸粥同腸粉,呢個要$26.00.腸粉先到,呢啲普普通通,不過不失.我o既牛肉粥到o黎,臭到好香粥味,碎牛都幾多,但好鹹,係味精太多.男友o既肉丸粥好耐好耐至到,我冇留意有幾多肉丸,只知佢話太重味精,食剩半碗就唔食.另外今次要講o既係服務,個老闆撞聾已經有前科,今日我o地坐低後,未諗到食咩o野,佢行開一陣係好正常,咁我o地諗到喇,我舉高手叫佢,佢係面各我,但冇啋我,好,我當佢睇唔到,咁我再舉,佢係睇到啦,點知借啲意整第二樣o野.我就唯有大聲叫唔該,佢至行埋o黎寫o野.而其實兩碗粥整好o左擺o係o度等人攞o既時間係好長,因為個老闆成日扮晒o野先執好枱至拎過o黎.見到佢條污糟到黑色o既圍裙就驚囉.

今日(12-1-2010 Tue)請半日假陪爸爸去覆診,天寒地凍,最好食咖哩牛腩喇.我負責買個$28.00o既咖哩牛腩飯返屋企同爸爸一齊當餸食,由於有飲品,我就叫杯熱檸水,不過外賣要加$1.00.返到屋企即刻打開睇,嘩!o個盒飯多到呢.睇睇咖哩,有青椒,洋蔥呢啲配料,好,食吓先,牛腩夠腍,咖哩唔太辣但夠,o岩我同爸爸唔食得辣但又想食o既人,雖然比阿龍咖哩味道多樣化,但佢都惹味,用o黎送飯,令食好少飯o既爸爸胃口大開,都食o左兩碗飯,而我都一樣.以呢個價算交足貨啦.

1-1-2010 Fri同男友起床後整呢整路都整到10:45am,食早餐不如食晏啦,我又想食少o野,去酒樓?唔….唔好,男友話君王,我話君王又貴又少o野食,於是o黎江記,男友話都好,又可以食粥.坐低後,我抬頭睇有咩炒o野,有好多選擇,令太耐冇食o既我一時間唔知食咩好,見到有$26.00o既味菜雞絲炒麵同味菜肉絲炒麵,問男友,男友話要後者.而佢又叫牛肉粥同腸粉,好,就叫呢幾樣啦.落單時,老闆話有杯o野飲,男友揀o左凍好立克,之後牛肉粥先到,今次碎牛好似多返啲,好立克都到o黎,唔係好多冰,o岩啦,咁凍天時飲乜鬼凍o野吖?呢杯味道較得o岩o岩好,唔太甜.我發覺唔使等o既腸粉重未到o黎,睇睇單,老闆寫o左11同26,睇吓價錢牌,牛肉粥加腸粉會係$15.00o既粥餐,即係個老闆冇落到腸粉.趁亞姐拎大大碟o既味菜肉絲炒麵同醒目地拎多個碗仔o黎時,順便同佢講要腸粉但冇落單,叫佢寫返$15.00.,亞姐好乖咁寫返同拎o黎.我先食炒麵,邊o個啲麵脆卜卜,中間o既好熱,肉絲大大條,味菜味道竟然偏淡.而腸粉都係咁啦.

今日(8-11-09 Sun),由於男友晏啲又要返工,於是同佢食個$22.00o既下午茶餐先.我帶佢o黎食呢個餐,點知佢有啲啲感冒,唔想食熱氣o野,於是我要雞髀沙律餐飲熱檸水,男友就要火腿蛋沙律餐,一樣飲熱檸水.好快,兩杯o野飲到o黎,之後係男友o既火腿蛋沙律,見到係煎蛋,男友就好失望,話早知叫炒蛋,而我覺得似係煎定o既.佢食蛋黃時,話重要係全熟添,唔係幾鍾意,佢就畀一隻蛋黃我食,果然係全熟,而且唔熱o既.而我o既雞髀沙律o黎喇,同上次舊年食o既size差唔多,食評: http://www.openrice.com/gourmet/reviews.htm?submittime=4/20/2008&userid=46226. o岩o岩炸返熱,味道同口感亦冇變,只係,感觸o衣o家媽媽已經唔o係o度.食完後,男友見到有炸兩,佢話想食,佢於是就叫,呢啲係一早整起,只係一直蒸住,所以油炸鬼已經唔係新鮮,腍同有少少韌lu.而呢個係$6.00.服務:可能唔多客,好悠喇,而且只畀刀叉同鐵匙各一隻,把刀又鈍,想點?

今(11-10-2009 Sun)朝同男友起身後,想食通粉,於是諗嚟呢間,重諗好咗要食沙爹牛肉通粉.落到嚟,我就叫呢個走蛋,飲熱檸水,男友要回鍋肉麵飲熱奶茶好快,飲品到嚟,然後係我嘅沙爹牛肉通粉,份量幾多,咁開心呀.食落,味道好啱自已口味,沙爹夠香,牛內夠腍,OK.男友嘅回鍋肉麵好耐至到,餸好少而味道呢,佢冇任何意見.

今(10-7-2009 Fri)朝起身,喉嚨唔係咁舒服,問男友食咩做早餐,佢答食粥.啊.咁落到o黎,都唔知食咩好,我記得亞姐成日提醒我,皮蛋瘦肉粥+腸粉,炒麵o個啲唔係餐,但我見餐牌係有寫皮蛋…+,啊,原來係淨皮蛋粥就係餐,咁我叫皮蛋粥+腸粉啦.而男友都叫同一樣o野.冇耐,皮蛋粥到o黎,少o左瘦肉,蛋就自然畀多啲,而今日o既粥都好棉同好多,唔錯喎,再食埋普通o既腸粉,都好夠飽.

今朝(28-6-2009 Sun)同男友食早餐,由於君王做o緊禮拜,暫時唔做生意,咁我o地就o黎呢間,我揀o左五香肉丁麵熱好立克,男友要沙爹牛肉麵凍檸茶,o黎到喇,開餐先,其實五香肉丁同沙爹牛肉都係o係水準中,唔差亦唔係太好,而麵就係用光麵,又幼又冇味,只係好在唔會太腍,$18.00一個餐同只有一個普通餸,比君王真係貴啲.

前日(23-5-2009Sat)同爸爸,男友一齊食個午飯,爸爸揀呢間.啊,好的.爸爸叫o左$26.00o既腿蛋飯,要熱檸水,男友要$22.00o既豆腐火腩飯,但亞叔話有火腩,肉片啦.啊,男友冇問題,佢要熱檸茶.我就想要田雞蒸水蛋,但冇田雞,咁我問有冇廈門炒米?佢答有,就廈門少米啦,要熱檸水,$26.00.一會,逐樣o野都依次序到o黎,爸爸o既飯好大碟,冇問佢味道,其實都唔使問啦,冇難度.之後到男友o既豆腐肉片飯,又係好大碟,有玻璃獻,我又冇試到亦冇問男友味道點.最後到我o既廈門炒米,一樣好大碟,粉橙色,料有叉燒絲,蕃茄同雞蛋.食落,係微酸,唔油膩,叉燒絲唔硬,鬆鬆地唔係死實,OK.不過檸檬好似出o左問題,澀o既.份量多到個個食唔晒,建議佢畀客人主動減少啲就收少啲.

今朝(30-3-2009 Mon)同男友o黎食早餐,我求祈要個腿蛋通同熱好立克,男友要白腸,牛肉腸同熱檸茶.我o個啲唔講啦,咁耐以o黎,我都冇o係o度食過有餡o既腸粉,今次男友叫o左,我又試吓先.佢o既牛肉份量好多,係成條都有,重要係脹卜卜,好勁.食落,係有牛味,但味道同酒樓o既一樣,不過人o地份量咁多,就已經羸o左酒樓呢.我o既早餐係$17.00,男友三樣加埋就$27.00

今朝(4-1-2008Sun)同男友o黎食早餐,大家都叫火腿煎蛋通,佢飲凍檸茶,我飲凍奶茶.飲品先到,我攪均o左飲落去,冇茶味o既?竟然可以差過大X樂o架,男友o個杯檸茶好少少,有多啲啲o既茶味囉,離晒譜.不過今次冰就冇上次咁多.而通粉都係咁喇,不過火腿絲明顯比以前少好多.而我驚男友好似唔夠,叫佢叫多樣o野食,佢本來想食腸粉,不過都係要多士,佢想食油占多,但我想食奶油多.我o地猜包剪鎚決定,我輸o左,就叫油占多啦.油占多$6.00件,o黎到,食吓,唔覺有牛油o既,jam好似冇咩味.,好一般啦.不過呢o度都開始令我失望喇.埋單:$44.00

13-12-08Sat,和男友到這兒吃早餐,我要牛肉粥油炸鬼,他要皮蛋瘦肉粥和蝦米腸,不過沒有後者,便要叉燒腸.到o黎喇,油炸鬼好大條,叉燒腸原來有好多叉燒粒,好飽肚.之後我口渴叫o野飲,我未飲過鴛鴦,於是貪得意叫杯凍鴛鴦,而男友就叫檸茶.我飲我o既凍鴛鴦,只有咖啡味,畀男友試吓,佢都話奶茶係太少,唉!最差就係杯o野有9成係冰,好唔低呀!埋單$62.00,好費呀!

** 此 食 肆 的 第 十 個 OK **今日(23-11-2008Sun)朝早,同尋晚被我捉o左o黎屋企o既男友食早餐,我想食粥,我同佢講呢o度都有西式早餐o既,佢就冇問題.我叫o左$15.00 o既牛肉粥同炸兩,佢叫$19.00o既餐蛋麵凍奶茶.我o既o黎到,攪吓啲粥,啊,免治牛明顯比以前少o左好多,味道就依然,炸兩仍然係咁多.佢o既都o黎o左,一眼睇到啲麵唔夠腍,佢話係,不過都冇所謂啦,佢話凍奶茶都滑o既,OK.

** 此食肆的第九個OK **今日(26-4-2008 Sat)朝早又唔想食點心做早餐,都唔知食乜好,落o黎至算.9:20am o黎到,都幾多人.我叫o左B餐,沙爹牛肉煎蛋麵,轉炒蛋通粉,飲熱奶茶.好快,所有o野到齊,奶茶唔滑但夠濃,炒蛋出色,沙爹辣辣地,牛肉OK.食完我懷疑自己short o左,做咩食沙爹牛肉?不過點解好似唔夠飽咁?我大食o左?