江記粥粉麵茶餐廳 (Closed)

** 此食肆的第三個笑**今日(20-4-2008 Sun)3:30pm肚餓,明知媽媽正在煲湯,但都係等唔到今晚食飯,於是落o黎食佢o地o既炸雞髀.到o黎時,人手唔夠,得一個樓面又收錢又落單等一腳踢.我叫o左雞髀沙律餐熱檸水,不一會,茶餐到o黎,依然咁大碟,今次趁唔多人就影返幅相.炸雞髀皮仍炸得好脆口,雞肉仍滑同唔乾,真係想用手拎住o黎食.沙律o既生果都係o個啲普通o野啦,我都唔係旨在食沙律.食完真係唔使食晚飯o架喇,叫o左媽媽今晚唔使煮我飯.

** 此食肆的第一個喊面**由於前日食o既o野都未落格,於是尋日朝(20-1-2008 Sun)同媽講我唔飲茶,點知佢提議食粥,啊,好啦.約10點落到o黎,張張枱都有人,我係未見過o既,好彩媽早啲落o黎有卡位坐,我叫o左$15.00 o既煎雙蛋,雙腸仔方包,熱杏霜.食物冇難度,冇乜問題,但今次o既熱杏霜就…..牛奶重o左,杏仁味淡o左.又係老闆娘o既傑作,如無記錯,我o係呢o度第一次(舊年12月27 日)飲到唔錯o既熱杏霜係水吧調較o既.之後o個次同呢次都係老闆娘暫替佢沖.唉!請老闆娘唔好再暫替水吧呢個位而拖垮水準喇.今次真係唔可以畀OK喇.

** 此食肆的第八個OK **又因尋日唔記得諗今日(10-1-2008 Thur)o既早餐,又諗起今個冬天未食燕麥做早餐,於是落o黎呢o度食啦.又係7點到o黎,只有幾個客,心諗應該唔駛等好耐o掛,睇吓有冇餐係有麥皮先.冇o既?只有$16.00o既牛奶麥皮同$12.00o既鮮奶麥皮,剛巧亞姐o係身邊等我order,於是問佢有冇餐,佢答有,包一杯o野飲,於是叫o左鮮奶麥皮加熱杏霜(唔想飲有咖啡因同朱古力呢啲比較提神同肥o既飲品).等o左幾分鐘,熱杏霜先到,杏仁味重;客人開始多喇,我等呀等,遲o黎o既客人個個都有得食,可能我呢啲唔係預先整定o既食品,所以要等啦,但真係等o左好耐,鮮奶麥皮至到,其實好驚食茶餐廳o既麥皮,因為細個時食,滑滑o既糊狀麥皮令我想嘔,o衣o家只係為o左吸走壞膽固醇而食而已.攪吓佢,見有燕麥o係裡面,咁都好啲,唔係只係一碗糊狀物體,由於o岩o岩整起,所以好熱.食落唔太杰,淡淡的,想落調味料,鹽?會唔會怪o左啲?糖?會更甜同更加難接受,唉!都係快快攪涼佢食埋走啦.而幸好燕麥唔算太少,不過我真係食o左好耐,今日有開微微o既冷氣,但都重係咁熱,我又趕時間,又食到我成頭汗.剩返

** 此食肆的第七個OK **27-12-2007 Thur放假,朝早又唔知食咩好,諗起呢o度$16.00 o既特別餐有腿蛋治,於是又o黎o勒.我要o左腿蛋治同熱杏仁奶霜.不久熱杏霜到o黎,好耐冇飲喇,唔記得駛唔駛加糖,於是先用鐵匙一啖啖咁試吓,唔知係咪喉嚨痛關係,唔覺得滑,不過知道唔駛加糖,等腿蛋治o黎到至再飲埋佢啦.腿蛋治o黎埋,蛋都算多,唔係全熟仍有蛋汁,但點解唔夠熱o既呢?係即叫即整o架啦,唔通啲蛋煎好後攤一攤至夾火腿同方包?而且啲蛋好似冇落鹽.飲埋杯杏霜先,啊,試真啲,飲到奶同杏仁味,係比例均勻至做到,唔錯o既.

** 此食肆的第六個OK **今(25-12-2007 Tue)早起身唔想去飲茶,因為唔知食咩點心好,諗起想食皮蛋瘦肉粥,於是向媽提議o黎呢o度食粥.落到o黎,覺得好焗,冷凍唔同以往咁凍.o岩o岩有卡位,我要o左$13.00o既皮蛋瘦肉粥,媽要艇仔粥,炸兩一齊食.好快,o野食到齊,粥好熱,我o既皮蛋瘦肉粥皮蛋唔多,瘦肉係一條條實o既,有醃過o既肉條,我都係鍾意食鬆鬆地o既肉絲多啲,不過咁樣就代表真材實料o既.粥都夠棉.而炸兩之前都講過,冇變到.環境:扣一分,因為真係好焗,食完成頭汗.

前日17-11-2007(Sat)媽又唔知做咩又咁想食艇仔粥,於是又同佢落o黎呢o度食早餐.9點左右到o黎,人客有4,5成滿,媽要o左艇仔粥加炒麵,呢個係’粥餐’,才$13.00,今次炒麵好大碟呢,不過依然係唔熱同冇味.而我就要o左個$18.00凍飲加$2.00 o既西式E餐,凍檸水,腸仔煎蛋米但改通粉.不久,凍檸水到來,冰好似唔多夠,而且好似唔夠甜.大大碟o既通粉都到o黎,但好似咸o左啲.到我再飲埋杯檸水時,才發現有條約2cm長o既頭髮呢.@@"小插曲:老闆開始認得我o地(鬼咩,呢排經常o黎).期間我發覺佢o地冇幫我o地寫單,媽就開聲叫老闆,佢走到o黎問我o地係咪一齊?我答係,佢就話咁寫貴啲啦,我望一望,原來佢寫o左$30.00,畀o左個九折我o地,多謝老闆.

今日(11-11-2007 Sun)晏晝,媽因朝早食得唔多,所以話要食粥.好吖.落到o黎,冷氣依然咁凍,媽要$10.00碗o既艇仔粥,今次我繼續要$20.00 o既沙律下午茶餐,要o既係吉列豬扖沙律,熱檸蜜.粥同微墨綠色o既熱檸蜜好快到.良久,吉列豬扖沙律都到o黎喇,嘩!雜菜沙律佔o左半個碟(個碟係載炒河o個啲長碟),豬扖亦唔細,外面都係用麵包糠包住,不過炸得燶o左啲,食落,外面脆卜卜,但內裡肉汁仍然豐富,冇問題.沙律內o既雜菜亦OK鮮,亦有少量椰果,食完都飽飽,飲埋變暖o既檸蜜,真係好足夠呢.

話說尋日發現新o野,於是今日(21-7-2007 Sun)o黎試作為捐血前o既準備,1:00pm同媽媽落o黎試,媽要o左火腿蛋薯條餐加熱檸水,我要雞髀薯條餐飲紅豆冰.一會,飲品先到,媽唔可以落糖飲熱檸水,於是叫佢只輕輕咁篤啲檸檬,免得過酸同過澀,但佢食完個餐後,又走去篤喎,佢話檸檬唔酸喎.我o既紅豆冰紅豆算夠淰,但奶唔多夠,因為都最後就算啲冰未溶晒都已經淡o左.過多陣,食物到喇,不過點解會畀叉同匙我o地o既?我話要刀至再攞o黎.食物係即叫即整,炸雞髀好大隻,皮亦夠脆,好味.而薯條,同麥當勞o既唔同,冇洒鹽花,但都夠味,OK啊.媽唔食火腿,於是要我幫佢食埋,好油.清晒兩碟,發覺我媽個碟有好多油,我o個碟冇乜,至驚覺原來佢o地o既薯條同炸雞髀都做得唔油,唔錯.

今日(20-7-2007 Sat)唔想食點心做早餐,天氣又涼涼的,於是想食諗起上海小館,9:00am左右o黎到,=.=”未開門,其他o既西餐廳又冇興趣食,於是都係o黎呢間,坐o係卡位,冷氣開得頗凍,一會後.叫o左牛肉粥,炒麵.好快,兩樣o野一齊到來.牛肉粥好熱,終於明白冷氣點解依然要開到咁大.粥夠綿,唔係好似酒樓o個啲米水咁.炒麵唔係平時食開咁大碟,不久我聽到老闆打電話order一斤炒麵@.@”賣晒嗎?炒麵係普通貨色,自己加芝麻就香口啲.呢o度除o左有原本o既飯餐外,新加o左沙律同薯條餐,呢個屋邨o既競爭真係咁大?

今(29-9-2007 Sat)想食通粉早餐,於是走o黎呢間.叫o左個$15.00 o既火腿煎蛋通粉餐,我轉炒蛋,另加$2.00 o既凍華田.好快,凍華田送到,味道係好濃郁o既.不久,通粉都到喇.好熱,通粉頗腍,鹹淡適中.服務:都幾好.衛生:好乾淨,地下唔會有好多垃圾.

呢排突然想食炸兩,7-6-07終於有機會喇,o個日7:10am到o左,叫o左白粥同炸兩,白粥先到,亞姐順口交代一聲炸兩要等多陣.不久,炸兩都到o左喇.一層淨腸粉包住油炸鬼,好脆,都唔太差啫.

屋村食店實在不宜太有期望；如此質素在十蚊一碗粥的大前提下，只可以話合理．炸兩，上午十一點之後就唔好叫，可以係咬唔開的．那些員工就好似一家人咁，服務都幾好．