樂天冰室 (安華樓)

Open Now

Now Closed

瑤柱蛋白炒飯😃份量有D小，但飯粒粒粒分明有鑊氣唔太油膩。燒鵝 拼 燒腩仔 雙拼😀燒鵝係脾位同幾件胸位。燒腩仔好多肥，但個皮係香脆可口。2款燒味溫度微暖，性價比一般香菇雲耳蒸滑雞❤好食，雞件較肥美，入口唔嚡仲有D嫩，味道唔死咸。蜜椒薯仔一口牛🥲蜜糖味好怪，死甜，唔太建議叫XO醬西蘭花炒龍躉球❤好食好惹味，如果份量再大D就更好瑞士雞翼🥰黎到出哂煙，好夠味，好食。日式照燒鰻魚雞扒 跟大焗薯 餐包 白湯😀鰻魚好細件，唔建議叫，雞扒好厚好大塊，香煎過。配上大焗薯，味道正常。紅豆冰❤好大杯，好味!

食物質素對得住價錢，整體似乎係向翠X致敬，亦可能似係旗下品牌，呢方面要由其他人解答，不過服務態度真係好唔掂，由開始座低10分鐘內，叫侍應落單，中途叫過5個侍應，都係回答 “好啊，等等轉頭過嚟”，不過10分鐘都係冇人轉頭過嚟，又冇qr code落單，冇辦法之下就起身叫咗一個之前叫過冇轉頭過嚟，而家回頭返緊去厨房既侍應，佢好唔耐煩咁幫我落個晚餐，當中主菜，意粉，飲品我都即刻同佢講怕會浪費佢時間，佢最後大聲話我 ”你飲乜呀你唔諗定先” ，我就話 ”我咪講咗要熱咖啡” ，佢就話我 “係問你飲乜湯呀，你唔係睇清楚咩” ，我話 “張餐牌只係寫是日餐湯，你哋新開張冇耐我又第一次嚟，我唔知你哋規矩喎，咁你哋有冇白湯” , 呢一part服務真係扣晒分，最後，雖然門面同食物係向翠X致敬，但只收現金冇八達通電子支付呢樣就冇同人哋致敬，只可以講句，冇下次

我個日食左小菜$83蜜椒薯仔一口牛，味道還可以，但係性價比低同埋份量唔係好不合理(附上圖片)。價錢已經唔包飯同飲品，所以係有點失望。希望其他顧客見到這個post唔好中伏。

是日午餐香煎脆皮雞扒配日式蔥花照燒汁白飯加羅宋湯加茶記熱奶茶。今日見自己一個人食午餐不用排隊等太耐，便來一個一人樂天熱鬧午餐（因為全堂滿座）。第一次嚟食，原本打算叫焗芝士豬扒飯，一問店員之下，店員推介雞扒餐。這份雞扒餐比想像中大份夾好食，羅宋湯有料好味，雞扒煎得香脆惹味，類似中學時期的學生雞扒餐👍🏻可以encore。見佢出爐燒味好似幾正，下次打算試吓。美中不足是全堂坐滿人比較擠迫，仲要搭枱😅只合適快餐食快食。埋單時發現必須要交現金沒有其他支付方式，食客要注意一下。

下午茶特別鍾意食炸雞髀同炸薯條今次就試吓佢！黎到既時候，見到隻雞髀奀奀哋，（影相睇落ok大）食落去覺得啲肉唔多或者係偏乾？！薯條份量多大概係咁，下次試下食其他野

新開張嚟試吓佢哋嘅早餐，叫咗沙嗲牛通粉炒蛋加多士，好味喎！沙嗲牛做得好足，味道濃，醬料充足，大概有五塊牛（食過兩次都係）。一次通粉，一次麵，麵都好食，唔會唸。啡啡並唔係我鍾意嘅味道，但一般茶餐廳都係呢啲咖啡。套餐裏面嗰塊包正！熱辣辣，又鬆軟，總之正啦！炒蛋都好味！第一次去，食到一半叫我轉枱，感覺麻麻地。第二次去，正常，服務態度都好，係要提佢俾杯熱水。總括都好好，希望可以保持一直咁乾淨同水準，會再黎！仲有一次食下午茶，要睇吓搵唔搵到張相先出post。