美倫餐廳 (Closed)

當初嚟到荃灣生活，因為見到門口餐牌手字好靚（係老闆娘嘅手筆！），吸引咗我入去食，就係咁一食就食咗幾年。我喺荃灣咗耐，就食足美倫咗耐，當一個月食一次，計返我都食咗幾十次。如今美倫唔做了，要榮休了，我好傷心，冇諗過美倫會先我一步離開荃灣。美倫嘢食味道唔算頂級超卓，近年奶茶淡過以前，但係整體都係好食，而且風味同個性十足，有舊式卡位，又有個粉麵區。唔似近年好興嗰啲新派冰室咁一式一樣咁悶。最吸引到我長期食嘅係人情味，老闆、老闆娘、樓面姐姐都好好人，對我好好。食得多佢哋認得我，每次我路過舖頭門口，佢哋都會同我打招呼，但係冇壓力嘅，唔係say完hi就一定要幫襯，我都成日hi完就直行直過，佢哋都冇乜嘢，真係純粹街坊式咁打招呼。個人最愛煎肉餅飯，份量唔多，但係厚度適中，皮脆肉香。咕嚕雞球飯，唔係咁多茶記嘅午市快餐有咕嚕雞，通常呢啲係晚市小菜先有架嘛。美果雞扒腸仔飯，美果即係有啲雜果咁解，幾有趣福建炒飯大大碟，啲汁閃令令咗賣相好吸引（雖然粒蟹柳係cheap貨，不過茶記係咁架啦，仲想點啊？），我食到一粒飯都冇剩雖然好唔捨得美倫，不過可以開心退休都係好大嘅福氣，祝老闆一家健康快樂💞

知道美倫做埋今個月～拿拿聲要去食多幾次我最鍾意喺度据扒～好味夠經濟～又唔洗點等位～個羅宋湯去親必定要飲，加啲辣椒仔落去，真係好好味架啲晚餐都好底食～份量夠晒～各式各樣都有好多選擇，加$3蚊仲可以level up杯嘢飲添～岩晒我哋呢啲草根～雖然裝修舊式啲，但最緊要佢整體啲嘢食都好味。喺荃灣區屹立28真係唔容易～食埋呢個月就要拜拜啦呢區又少咗一間老店啦～真可惜唔好睇啲亞姐個樣咁惡，其實都有風趣一面～好唔捨得呀

今天星期六週末又來到這裏吃過早餐後才出外跑步兼晨運，但見老闆於收銀處貼出31/8 榮休，結朿其28 年經營的餐廳，有點愕然，我搬來荃灣短短2年，食過好多餐廳，美倫不是最好，但是每次見到老闆，老闆娘，太子爺都好好客，好有禮貌，每天都精神奕奕落力地招呼客人，傾吓閑計，吃過就好想再回頭，今天雖然有點好可惜，以後不可以來此餐廳吃餐，但都戥老闆高興可以在身體還是健康的時候退休，享受人生之後多姿多彩嘅退休生活，可喜可賀。

一間有人情味的港式茶餐廳。讚！進入餐廳後第一個感覺就是老闆及店員，非常非之有禮貌，價錢公道座位舒適。令我最難忘的就是有一位茶客，他應該忘記帶銀包，付款有點尷尬，但是老闆跟客人說，下次付下次付不用急。這就是香港70.80年代茶餐廳的人情味的感覺，今天重新再現了！加油呀！支持香港原味道！

咁啱去朋友去屋企經過，又鐘意試d比較懷舊嘅茶餐廳，所以就揀咗呢間野試一試。牛腩同牛筋係做番傳統茶餐廳既味道，好耐無食過！牛筋有入口即溶既感覺😋😋會再過黎食。

坐位迫刧 食物一般 比較好飲的是 羅宋湯 和忌廉湯堂。 下午茶 價錢 完全不合常理，唸住下午茶會平點。點知都要30尾至50元，下午茶的價錢，上次叫左個 雞亦沙律餐飲埋凍飲都要40幾元，好貴。仲要係得一隻雞中亦。。太過份喇!坐位又迫，我指中間既位，希望能改善。隔離富x以前都唔喜歡，但近來裝修後，食物水準好了少少。食身份量又夠飽。真係要學隔離改善一下。(我發誓唔係富x既人)只係覺得，大家隔離食既野差不多。我只是作個比較。其實都沒咩野。。 啱啱食就去唔啱食咪走，好簡單。。。仲之嬲嬲地。

係荃灣見完工人生路不熟就周圍行下揾野食行行下見到個滑蛋牛肉飯幾吸引就入去食成個餐有一個湯一杯飲品一個飯湯有中湯、白湯、紅湯可以揀紅湯有小小微辣👍🏽幾好飲個飯比較硬,好彩多汁浸軟個飯個飯黎得好快唔洗3分鐘成碟飯加個湯就出現係您面前😂

衛生極差，今日4月21日同男友食下午茶，男友點肉醬意粉， 當食完時見碟底有蟑螂，我們通知伙記， 她們笑笑口想即收碟，沒有說對不起！ 到埋單時，我同收銀姐講如我地肚痛就報食環，但收銀姐好無禮貌話咩呀（扮野） ，咩蟑螂？我絕對唔會再幫襯此茶餐廳

行行下經過見到哩間餐廳個沙嗲脆豬扒飽下午茶好吸引，個肚仔又打鼓，上碟後賣相已經贏左，味道都好好食，沙嗲汁滲入個包到，拍得住澳門果d，果然冇揀錯，差完電又可以行街。

同一位都是食素的朋友去荃灣吹水。諗住使蛋食個羅漢齋飯，點知有得食焗意粉。名叫焗芝士鮮疏意粉。一開始個待應拎盤意粉出黎，已經放心，因為都算大碟，點都飽。之後再拎埋個四蔬出黎，就覺得唔寫食評唔得。有棷菜, 磨菇, 蕃茄, 西蘭花, 鮮冬菇。 已經是意料之外。仲要香，濃郁的芝士汁，誇張D講句，同意粉屋，PIZZA HUT 既素食粉差不多，當然這裡平好多。

今日一家三口出動到荃灣，離開荃灣西站，到附近餐廳吃早餐。美倫餐廳鄰近荃灣廣場，吃完早餐再逛逛商場，非常方便。牛油餐包餐包新鮮焗製，質感軟棉棉。火腿奄列奄列煎得剛剛好，內裡有蛋汁溢出，而火腿切成條狀，與奄列一起吃，豐富了口感。沙嗲牛肉公仔麵公仔麵略嫌過硬，不夠淋，煮耐少少會更好。牛肉太韌，沙嗲味不算濃，令這碗麵有點失色。熱奶茶奶茶香滑，茶味濃，加少少糖，有助提升其味道。整體來講，尚算不過不失，畢竟只是30元，實在不能奢求太多。

晚飯臨看戲前和朋友隨便來食個飯，價錢還可以　$58有老火靚湯及飲品送，老火湯幾入味份量都不錯，材料有菜粒、肉粒、磨菇和蝦仁等，豐富之餘，醬汁也出色。將所有食材與炒飯一起食，當然是口感豐富，而且米飯粒粒分明。仲有好濃嘅雞肉及菇味不錯的一餐。

朕今日龍體違和，瞓到日上三杆，個肚空空地，個口又淡淡地，於是就出街行一行，食個下午茶，行個呢間美倫餐廳，見有下午粉麵餐，於是就叫左個牛腩雲吞双拼麵。牛腩煮到香稔軟嫩，雲吞用蝦肉制成，但係粗麵既鹼味幾重。唔係咁啱我口味！

今晚突然好想食小菜飯餐，仲要係夠地道，同埋茶餐廳果種，於是乎就黎左呢間茶餐廳。鄰近荃灣廣場，餐廳內都有好幾枱自由行嘅客人。原本想叫鐵板餐, 不過怕熱氣,所以最後叫左小菜套餐和煲仔套餐各一餐湯-羅宋湯大大碗，有蕃茄，洋蔥，牛味不太明顯，不過個湯令我好開胃蠔油生菜味道淡，不過其實呢個係最健康嘅煮菜方法，就係烚菜魚香茄子班腩煲-熱辣辣，色香味俱全, 茄子口感恰到好處, 送飯一流粟米石班-石班夠大件，無雪藏味，粟米蛋汁好濃，again,送飯一流每個餐跟一碗白飯，不過白飯比較細碗，你睇我呢雙女人嘅手都拎得哂就知道碗飯有幾大碗啦，我Honey加左7蚊叫多碗飯餐飲-涷檸茶-我叫左杯少甜少冰，估唔到佢地嘅紅茶係足料，所以我當晚好精神，好難先入睡

選擇這店一來是因為下午茶時段是由下午二至六, 二來就是左右食店都貌似滿座(沒有細心查察)。由於此店有丸類湯粉麵供應, 而且從玻璃牆上貼有「魚扎」二字, 頓時心也開了, 不過細問下原來已很久也沒有向供應商入「魚扎」, 只因為沒有太多客人懂得欣賞兼且討厭魚扎內的「紅蘿蔔條」。廈門炒米粉 $36 送熱飲, 米粉炒得爽口也沒糊爛, 不過茄汁就沒炒均勻, 米粉的一邊是比另外一邊來得酸；廈門炒米最好味的地方就是加入糖瓜, 可惜此店卻棄糖瓜用鹹酸菜。  至於餸料就俾得好豐富: 蝦仁、叉燒條、火腿條、蛋片等等, 連洋蔥條、青蔥條也疊得高高。熱咖啡味香濃, 飲落不酸也不澀, 淡奶味道與咖啡都能相融, 連不落糖也能喝得下來。