牛霸小麵店 (Closed)

叫左蕃茄湯底牛肉麵同紅燒牛肉麵，麵質難食，完全唔係台灣麵，係煮過龍嘅上海麵，又淋又爛，到個湯底，又係出哂事，蕃茄湯底好淡，好似溝左好多水咁，完全冇味，相反紅燒湯底就咸到咩咁，好似一直加熱左好耐咁，重點係兩碗湯嚟嘅時候都唔熱嘅，俾啲誠意加熱佢都好呀，係真係唔知擺咗幾耐！唯一可以放入口嘅就係個牛肉，杯嘢飲又係出晒事，完全冇味極多冰極多水，佔咗個蜂蜜柚子，我淨係飲到小小小小柚子味，呢個價錢食呢個質素真係唔會返轉頭，台灣野黎講雖然佢算係平，但真係好難食。

未有得去台灣旅行，唯有食台灣菜止吓渴啦！最近又有新發現，牛霸呢間小店係隱藏咗在安樂里嘅巷仔入面，由鵝頸橋向灣仔方向沿電車路行5分鐵左右就到喇！午市套餐有飯+飲品，價位係60蚊左右，今次食台灣香灣滷肉飯配珍珠奶茶。台灣香灣甜甜哋帶點肥肉，食落有油脂，邪惡得嚟又幾好食喎！滷肉飯就略嫌唔夠熱，同埋滷肉汁可以多啲就好喇，但白飯底粒粒分明，質素係唔錯嘅！跟餐嘅珍珠奶茶就不過不失啦，茶味唔算好濃，珍珠有咬口，加分不少！另外小店裝修簡約，坐得好舒服，亦唔會有趕客走嘅情況，有機會會再去試試其他嘢食👍🏼

放工諗唔到食咩，隨便係openrice search下，見到呢間台灣野，感覺唔錯，就一於試下！估唔到有驚喜喎😯2個人叫左2份主食，1份小食，1杯野飲，total $182，價錢算合理。1）牛肚牛腩麵 - 呢個味道正常，牛的份量不算少，但湯底未到好好味！2）鹽酥排骨乾拌麵 - 呢個唔錯，最正係個排骨炸得好脆，正宗台式炸法！由於個人鍾意豪大大個隻質感，佢正正係呢隻脆漿！😋3）小食拼盤，最出色係個炸豆腐，做法好特別，外層有啲似木魚碎溝埋一齊炸，口感特別，台灣腸都幾香，不過不失！4）冬瓜茶 - 正常水平，唔算太甜以呢個價錢黎講，我覺得滿意🙂

灣仔雖然係舊區，但正正因為舊樓多，地舖至容易多食肆，今次就介紹一間位於後巷，隱世既台灣菜。正值係Lunch hour都好多上班族👨‍💼係度等位，都要等大約5-10分鐘至入得。呢間舖既落單程序都幾方便，係要自己用QR code 落order，同朋友食飯唔洗幾個人一齊share個餐牌。我要讚一讚呢個肉燥麵，整得幾好味！👍🏻👍🏻鹽酥雞大小適中，一兩啖就食完！另外，佢個外皮都炸得脆，雖然同豪大大比，無咁重口味，但都香，以台式餐廳嚟講算唔差！佢個麵對我嚟講都幾有驚喜，肉粒都多，都幾有味，而個肉燥醬食落麵幾溫和，我都唔知點形容好😅，可能呢D就係台灣人口中既「古早味」。將成碗麵撈勻哂後，麵食落都唔太腍，青瓜較有口感🥰，而成個醬食落暖暖地咁，有種好岩冬天食既感覺😂😂！ 係灣仔試到一D高質同算優惠既午餐，我覺得CP值都高，嚟開灣仔可以試試👍🏻！不過午市可能比較忙，可能會漏單嗯！

Merry豬覓食在港島  Merry豬外賣記 這間在灣仔的台灣麵店是一間隱世店，在W Sqaure後方，要經過一條窄巷，在報紙檔後轉入。門面很容易看見，也頗特別，有個小草地在室外地方。❗️午市也可以同享用entertainer 的75折優惠❗️merry豬點了一碗紅燒牛肉麵加$3，配台式奶茶。牛肉份量好多，新鮮，可惜有筋，會攝牙縫。湯底沒有味精，但味道略淡。麵條煮得很不錯，爽口不會太稔。台式奶茶奶味偏重也偏甜，如果茶味更出就好了 。~~結帳時用了entertainer 75折優惠，盛惠54元，還算化算。

肉肉便當🍱套餐$68送湯送飲品豬軟骨同牛腩都好入味，豬軟骨唔硬好淋身，不過牛腩有少少硬，台灣腸都好味。飲品方面蘋果西打味道正常，台式珍珠奶茶就麻麻，珍珠偏少奶茶味偏淡，得甜味。

有日咁岩search緊台式餐廳，竟然見到灣仔依間，平時完全唔知原來有間咁嘅鋪。去到一睇發現位置都幾隱蔽下，喺啲巷裡面，如果我無search過，平時應該唔會留意到。我weekend中午大概1點黎到，竟然都無咩人(可能因為疫情啦)。間鋪裡面算幾大而且位置頗多，一坐底侍應就攞左張QR code單黎，原來依度係scan QR code落order，有咩特別要求都可以順便揀埋，都幾方便。另外like fb仲有送小食，送左碟鹽酥雞軟骨，細細粒。我今次叫左鹽酥雞肉燥麵($57)，再加$6珍珠奶茶。落單嘅時候有得揀湯麵或者拌麵，我揀左拌麵。我都幾中意食依款麵條，肉燥同汁嘅分量都ok，撈勻之後啲麵掛左啲汁都夠入味。鹽酥雞就一般般啦，正常但唔係話特別好食。食完覺得間餐廳普通啦，正常但係唔會特別令我印象深刻(可能我黎之前expectation高左啲)。不過勝在唔洗加一，而且店內有wifi用。

見到食評咁多個好評，一個負評都冇就黎試下，地點都唔係大街有啲難搵。叫咗一個牛肉麵和鹽酥雞拌麵，哇個牛肉麵麵又少又林好似超時煮咗好耐，個湯超鹹完全唔想飲多啖，牛肉又好難咬，同網上食評講啲面好彈口完全兩回事，真心好難食，未食過咁難食嘅牛肉麵。個鹽酥雞已經好鞋好乾口，個拌麵超乾又冇乜味，真係唔知自己食緊啲咩，杯凍奶茶溝粉嘅啲粉仲留係杯度，廚房真係連用手搞拌下都無做...依個質素仲要成$70一個主食唔包飲品，飲品仲要加$7！粉都唔搞拌下，真係唔會再上想黎食，直情要blacklist!

今日lunch time同朋友去灣仔搵野食～發現公園入面居然有間神祕台灣小店🤣裝修有少少無印文青風嘅感覺🌱應該係新開左冇耐 聽講上一手係日本菜🍣.於是我哋叫咗個 #紅燒牛肉麵🐮 $62配 #台式珍珠奶茶🍼 +$6碗面嘅湯底幾濃郁好味而麵條就係扁身果隻 掛湯都唔錯😁但就唔似某連鎖台灣餐廳 疑似刀削麵嘅版本🔪可惜expected既牛肉變成咗半筋半肉甚至筋更多過肉 我個人唔特別喜歡太多牛筋既🤧而且唔算煮得好入味 總括嚟講不過不失.而珍珠奶茶 應該係用咗苿香奶茶底而製成聞落都幾香😚 I like it😚雖然朋友話太甜 但係嗜甜既我覺得完全冇問題😍但係珍珠就少左d喎🙊🙊.另外據我所知個有手機Scan QR Code點餐功能居然仲有個手機點單特別套餐 (可惡蝦人唔識用🤣🤣) 1。麻辣花枝丸乾拌麵套餐配貢丸湯同麻醬青菜2。寶寶鮮蕃茄湯麵套餐配小食但就貴d $78 但包左個小食同飲品☺️

隨著天氣漸涼，這時候來碗暖心暖胃的牛肉麵，肯定是人生一大享受，讓人度過暖呼呼的晚上。朋友推薦我去嚐牛霸小麵店的牛三寶牛肉麵，這可是她的心頭好，她說保證我一吃便迷上。魚酥皮蛋豆腐絕對是牛霸小麵店必吃小食，魚酥皮蛋豆腐口感變化多端，香酥的魚酥搭配滑彈的皮蛋，光聞這香氣已讓人受不了。這裡的炸物同樣有口碑，朋友的滷肉盬酥雞便當簡直是色香味俱備。便當除了包含滷肉和鹽酥雞外，還有蘿蔔，黃蘿蔔，生菜及滷蛋，營養均衡。鹽酥雞金黃的色澤相當漂亮，表皮乾脆不油，十分可口，雞肉軟嫩，一口咬下肉汁表露無遺。看見朋友吃滷蛋吃得這麼滿足，我也要點來吃。滷蛋非常厲害，蛋白部份由白色滷至褐色，整隻雞蛋已吸飽醬汁，一口咬下滷香在口中噴發，滷蛋超棒。凍珍珠奶茶好喝無比，奶香濃郁滑順，鮮奶與茶完美結合，口感柔滑不膩口。珍珠給得不手軟，滿足了愛吃珍珠的朋友，彈牙的珍珠令奶茶更有嚼感樂趣。凍冬瓜檸檬純天然熬煮，故冬瓜風味明顯突出，甜度會較低，加上檸檬微微酸香，使凍冬瓜檸檬更為清新，滿合的味兒，解渴滋潤。牛三寶牛肉麵霸氣得很，鋪滿牛筋，牛腩和牛，上桌時有一股濃烈牛味。湯底甘甜富層次感，牛香在鼻腔吞尖繚繞，微妙的湯頭令人一口接一

嚟間台灣麵店真係名副其實嘅隱世店，位置係要經過一條窄巷，係報紙檔轉入。‼️有學生優惠‼️ (唔肯定係咪💛店 但感覺上似係）❗️entertainer 優惠❗️(25% off)lunch 會平少少 (<$10) 包飲，都幾底。尤其用 entertainer coupon 後 <$50. 灣仔嚟講好低。紅燒牛肉麵 (lunch set) $62麵質剛剛好 👍🏻湯底唔重味精 👍🏻台式奶茶奶味過重但有 TW 茶味 😋🥰👍🏻 服務非常好。好有禮貌

灣仔鬧市商店林立，特別係電車路一帶，集中唔少餐廳。今日我哋行入少少，尋找灣仔嘅側面，試吓啲小店，路過呢間牛霸小麵店，佢嘅設計加入咗好多文青感覺，咁今日就同A姐食台灣菜啦。鹽酥雞我哋食台灣嘢嘅小食首選一定係鹽酥雞，因為我哋最鍾意嗰種脆口鹹香味！而牛霸小麵店嘅鹽酥雞，炸得好好香口，而雞肉仲keep到好juicy。紅燒牛肉便當同A姐一人一個便當，我就揀咗紅燒牛肉便當，便當除咗包飲品，配菜仲有埋鹵蛋、焯菜同四季豆。而主角嘅牛腩好軟腍，而牛肉味係極之香濃！而墊底嘅蘿蔔就更驚喜，非常入味。香酥排骨便當A姐就揀咗香酥排骨便當，佢一食個排骨就讚不絕口，因為個椒鹽好惹味！而排骨厚薄度適中，唔會炸到乾身，夠香口又好有口感。荔枝玉露、珍珠奶茶好耐無飲荔枝玉露喇，唔會太甜而荔枝味好香，仲有好多椰果，好有口感；而珍珠奶茶嘅茶味都好突出。（記住Like同Share畀朋友）By A姐M佬 玩樂日記

今晚突然想食牛肉麵，一問之下原來公司附近有間牛霸，因為係後街所以唔顯眼。牛霸用QR code落單，如果搞唔掂嘅都可以照舊入紙啊。第一次黎當然要試下最馳名嘅牛肉麵啦，因為貪心嘅關係，我揀左牛三寶牛肉麵，裹面有牛筋、牛展、牛腩，麵條幼細無得揀，但可以加錢轉湯底 ：) 朋友就叫左碗肉燥香蔥排骨乾伴麵，排骨炸得好香脆！除左正餐當然唔少得叫啲小食share啦！因為太多選擇，所以最後都係揀左小食併盤，有台灣香腸豆腐、鹽酥雞、花枝丸，全部小食多滋味加埋2杯台式飲品，都只係$200，仲要無加一，抵食啦！

台灣美食在香港也不難發現，這間在灣仔的牛霸小麵店，外面是個籃球場，可以打完波來食補充體力。洛神花茶，凍檸檬綠茶值得一讚的是這裡的洛神花茶可以選擇走甜的，因為現在的人很注重自己健康，而且沒有糖份更能感受到洛神花的幽香。凍檸茶平日在港式茶餐廳飲得多，凍檸檬綠茶也是點了走甜，能嚐到新鮮檸檬的酸味。滷蛋滷蛋醃得不錯，頗為入味，而且還在上面灑上肉燥，豐富了層次感。紅燒牛肉麵牛肉份量充足，吸收了湯底的精華，肉質很鮮嫩，而且湯底沒有味精，健康又好味。麵條都煮得爽口，不會太稔。紅燒牛筋牛肉腩米粉貪心一點的朋友還可以叫個雙拼，牛筋很滑嫩，米粉很幼身，掛湯力一流。招牌芋泥芋圓冰最後當然要吃個芋圓當甜品才算美滿，芋泥富有香芋味但不會太甜，芋圓很堅韌口感不俗。

一間用QRcode落餐既餐廳，感覺幾新穎同舒服，而且幫餐廳減低左成本。有麻辣湯底嘅台灣牛肉麵餐廳真係唔多，可惜依度麻辣湯底做得唔出色，湯底嘅辣雖然係有麻辣嘅感覺，但係太油啦，而且係原湯加上辣椒醬或者辣椒油嘅感覺。麵粉更加係交貨質素，麵粉味好重。牛腩係入味，不過入口嘅味道只有味精，牛肚更加係韌口，要有一定牙力先可以咬得開。排骨滷肉飯正正常常，但係隻滷蛋就非常冰凍同好硬，就好似啱啱喺冰櫃拎出嚟咁。台灣餐廳嘅珍珠奶茶竟然難飲，無茶味仲有小小怪味，跟餐叫仲要加$6，唔值得。炸雞小食，質素參差太大，食第一件係非常乾，但係到第二啲又去返正常炸雞，整體來講係一半炸雞好食一半炸雞難食。如果純粹為咗填飽肚餓感覺，又要要求唔貴嘅，係灣仔區來講呢間可以係一個選擇。