PAUL LAFAYET (新都會廣場)

Open Now

Now Closed

今日來到葵芳，見到呢間甜品鋪，知道個焦糖燉蛋好出名，就買左一個試下！店員同我地講30分鐘內要食，如果唔係個焦糖會溶，大家記得預返時間講返味道😋，焦糖燉蛋加左新鮮忌廉和馬達加斯雲呢拿籽，配上金黃香脆的焦糖，好味！如果係整完即刻食，個糖霜因熱結成硬塊，而下層燉蛋冰涼軟滑，應該會更加好味😋價錢都好抵，$50仲送埋個陶瓷容器，好有心意店員仲比左張宣傳單，買10張禮卷可以半價食焦糖燉蛋，鍾意食既朋友可以考慮下

消費券網上訂購有得$300-$100，加上屋企人生日，終於試左呢間舖嘅蛋糕，居然係好甜同好漏，相當失望。唔係我想像中充滿伯爵茶味嘅蛋糕，而係芝士蛋糕夾住伯爵茶味嘅啫喱。因為我自己主張大時大節先會買完整嘅大蛋糕食，所以一有人生日先會買自己好想試嘅味🤣，期待左好耐，唔知係咪希望越大失望越大呢。

係好耐之前，係paul lafayet 個官網免費登記做會員，今年生日優惠有25% off, 真係超級開心。佢個discount 仲可以買乜都得，所以就藉着今次個機會想買幾多就幾多。macaron 本來$24粒，而家$18, 蛋糕同cream burlee 就由$50減到$3x. 好抵食。本身已經鐘意佢d macaron, 心水推介係熱情果同cappuccino. 而蛋糕方面，其實我覺得一般，但佢個tiramisu 好好好食，大推！！！

慶祝母親節又怎能少了蛋糕的環節呢？由於揀了法國餐廳用膳，而且方便大家吃用！所以就買了這個品牌的蛋糕囉！因為6個人每個人的口味都不同，所以就揀了廿種不同的蛋糕！每件都係$50！1.Yuzu Mandarin Mango Cake - Artisanal Pastries 造型像個柑仔，但吃落是啖啖的芒果味2.Royal Chocolate Cake - Artisanal Pastries黑朱古力愛好者一定很喜歡！3.Tiramisu - Artisanal Pastries芝士餅味道濃郁，而且吃完還可以用小瓶子盛裝其他東西！4.Crème Brûlée Cake - Artisanal Pastries雲呢拿與焦糖的配搭，適合喜歡清淡味道的食家！5.Crème Brûlée這個品牌無人不曉的甜品！香脆可口的焦糖配上滑漏漏的燉蛋！好味😋

本來想買cream brulee，可惜職員話外賣既話，最好要半小時內食，所以唯有轉買cake食算。我覺得tiramisu好味，但食多兩啖就真係好甜，要飲啖水先得。另外，個柚子橙味都好特別。不過，要$50一件，覺得有啲貴。

第一次食哩間嘅焦糖燉蛋，個大小都好合理唔會好似糖水舖個啲咁細。個燉蛋一食落口真係好驚艷😍個蛋真係滑到好似豆腐花咁，好香雲呢拿味但又唔會死甜，上面脆卜卜嘅焦糖同下面凍凍地嘅燉蛋真係好夾。大家食完個陶瓷碗記得唔好掉，可以拎返去回收架，每3個碗可以換一個馬卡龍😝😝如此類推，買多換多😎不過記得洗乾淨先🤣

久聞Paul Lafayet🇫🇷嘅Creme Brûlée法式蕉糖燉蛋非常出色😎 三星米芝蓮法國🇫🇷大廚嘅製作，梗係要留返👦🏻媽媽生日嘅大日子比佢品賞品賞😌 佢對呢款法式甜品嘅評語係: 「非常滿意💯👍🏻」😌😌😌1️⃣ Creme Brûlée 法式蕉糖燉蛋💰$50 > $25 (半價劵)Creme Brûlée可以揀即場由店員「燒焦」，又或者好似👦🏻咁拎返屋企「燒焦」亦得😆 店員會幫手入起d焦糖～ 記住1.5小時內要雪返入雪櫃😉 仲有最遲第二日就要食架喇😃好滑好滑好滑～ 燉蛋放入口嘅感覺就係好滑～ 質感有d似食緊Cream但又唔會好膩😳 面頭自家燒嘅焦糖好香🥰 部分溶溶地、亦有部分保持粒粒狀脆脆地好好咬😬 大推！拎走嘅紙袋同黑色包裝盒真係勁靚😍 木色系嘅瓦容器仲係👦🏻嘅至愛😍 成件事太靚了吧♥️ $50/個真係唔捨得買🥺 期待每年嘅半價優惠再臨🥰喺度再次同👦🏻媽媽講聲: 「生日快樂🎊🎉 생일 축하합니다🎂😚」

估唔到咁大個人仲收到媽咪買既生日蛋糕個樣都幾靚既！簡簡單單但味道就太甜啦個蛋糕其實好細ga jaaaa, 不過最後我地4個人都食唔曬個蛋糕不過點都好多謝媽咪特登去買個蛋糕俾我生日

買了一個大的焦糖燉蛋，店員在你面前倒上糖，再即場用火槍燒😊😊但原來要45分鐘內要食 , 是朋友閒談中告訴我，但店員並沒有告知了。不過.....都真係幾快溶，食唔到燉蛋面脆卜卜的滋味了，焦糖燉蛋還是要即食才最好味吧！😁😁😁😁

某日在 葵芳 新都會廣場 行逛 ,發覺有 Paul Lafayet 店舖 我們都一段時間沒吃過其招牌出品 Crème Brulee , 於是就買了3個 , 外帶回家給女兒們享用 ~店員如常把 Crème Brulee 火炙 .... 並叮囑 Crème Brulee 最好在 45 mins 內享用 ~ Crème Brulee $ 48 : Crème Brulee 用一個小缽盛載著 , 賣相依舊很吸引 , 焦糖燒得香脆金黃 , 燉蛋的質感幼滑細嫩 , 滿口蛋香 , 也吃得出有雲呢嗱籽 , 水準不錯 , 好吃 ~ 本篇完 ~

以前都食過幾次呢度既creme brulee, 覺得好好味， 雲哩那籽既香， 忌廉既滑， 總令人念念不忘。剛好手上有2張creme brulee贈券， 去了葵芳店準備拿外賣想俾屋企人試下。 去到有人買緊cake, 我無出過聲係後面拿住2張券等， 唔知係咪人地用cash我用券睇落cheap d, 佢完美地serve完買cake個客就掛住執佢d display, 完全任由我等， 終於等到佢執完啦， 我就話唔該2個creme brulee, 佢竟然黑住面咁收左我2 張券， 黑住面咁燒焦糖， 就係咁， d焦糖真係燒焦左…比平時多左d濃味。 雖然如此，佢最後遞盒野俾我我都好聲好氣咁講左聲唔該， 點知佢全程一個字都無講過…算， 講番個creme brulee, 我拿到返屋企都雪左陣先食， 唔知點解仲係水汪汪咁， 雲哩那籽又少到食唔出， 雖然仲係好滑， 但整體同以前也差太遠了吧！服務同味道都强差人意， 無下次。

開到成行成市嘅法國甜品店Paul Lafayet， 唔經唔覺已經有九間分店。行開新都會廣場，見到有佢間popup store，忍唔住要幫襯。Paul Lafayet 出品嘅creme brulee 一向都係心頭愛，所以唔駛諗都係揀佢黎食，而且有出earl grey嘅新味，不過都係鐘意食原味多啲。不過呢間沒有設堂食位置，要買走，而且最好45分鐘內食用，好在幾步之距就有商場設立嘅座位，買完可以坐喺個度即刻享用。買完之後，店員即席加糖用火槍燒嘅焦糖面，金黃而且香脆，燉蛋仍然好香好幼滑，水準仍然保持到，當中嘅雲尼拿籽當然功不可抹啦！食完個陶瓷兜可以擰返屋企裝醬油都幾好又環保！

同老公一直好想試晒佢地既馬卡龍，可惜價格唔算親民，一盒24粒都要$5XX，平時都係食一兩粒過下口癮（$20/1）到最近老公生日...終於有借口買一盒唔同味既返去同佢分享啦😝😝😝個日去到，得一個staff，但係見好多人黎換cream brûlée，可能做緊promotion~見個女仔做到踢晒腳但都好好笑容，抵讚👍我三心兩意望左好耐，佢知我係送俾人既，就同我解釋咩味岩咩人，有咩最受歡迎等等，好nice~本身淨係想買12粒，最尾俾佢搞到我咩味都想食，就豪一次！買24粒啦😋返到屋企老公都好驚喜，無諗過我會買俾佢！我最鍾意食紅桑子同朱古力味，覺得佢都唔會一味得個甜字而我老爸就最鍾意食玫瑰味，貪佢有陣陣花香，又唔會係香精味最衰唔記得問佢叫咩名，淨係記得佢平陰帶眼鏡，如果下次經過都會想再幫襯下個個staff~佢真係笑容滿分，令我覺得買得好開心😊👍

今個月係本人生日，早前收到smartone 通知會送生日禮物比我，就係呢度嘅焦糖布甸，今日黎葵芳覓食就順便黎拎埋。比起平時嘅份量細少少，但用一個好精緻嘅盒裝住，收到心情都好d。剛剛燒起嘅焦糖夠哂脆，仲微暖，入面嘅布甸係凍，形成強烈對比。個底仲見到好多雲尼拿籽，所以有好香嘅雲尼拿味，布甸又好滑，真係一流！為今日畫上一個完美句號。

去咗Paul Lafayet買甜品嚟食,揀咗Oolong味嘅馬卡龍,即係烏龍茶味嚟. 灰黑色嘅造型,單睇外表嘅話應該會以為係芝麻味,中間夾心部份就係泥黃色.佢同一般馬卡龍一樣都係偏甜,同埋唔太食到有烏龍茶嘅味道,不過佢嘅質感就幾鬆脆同帶少少煙韌,唔會一咬即散.另外仲有Blueberry Cheesecake,面層用鮮藍莓同單邊馬卡龍點綴.底層嘅芝士蛋糕用咗比較輕盈嘅忌廉芝士,內層同底層就分別有藍莓醬同牛油餅底,口感就係杯裝版嘅紐約芝士蛋糕咁,酸甜有致又唔會太膩.