紅茶冰室

Open Now

Now Closed

放工同女朋友唔知食咩去，行行下就去左間茶記。門面都幾靚。 入去坐低，見到裝修到好似以前既冰室，坐位大部以卡位為主。 我叫左個咕嚕肉，肉炸得唔錯，即使淋左醬汁都仍然好鬆脆，唔會話冧晒。醬汁酸甜適中，食落好開胃。叫小菜可以加多15蚊升級成套餐，有飯有湯同飲品揀。湯可以揀白湯同紅湯。 佢既紅湯好濃味，真心唔錯。而女朋友就叫左個焗豬扒飯，豬扒好肥，又唔會焗到太乾。而個蕃茄汁對我黎講略為酸左少少，但送飯係幾開胃!如果諗唔到食咩或者想食下茶記，可以一試！

都知道佐敦要搵一間好食又乾淨既茶餐廳係好難由期本人在佐敦返工咁多年，食左咁多間有時想飲杯好飲既奶茶，坐得舒舒服服既茶記真係好難搵，你知啦，有D茶就連公仔麵都可以整得好難食........ 呢間茶記真係有水準，中午lunch 實爆，不過唔洗等好耐

是日同同事食早飯，十二點幾呢的時間無乜選擇底下去咗食紅茶冰室，諗住快靚正。見到午餐餐牌有滑蛋脆脆魚柳，我同同事兩個人都叫咗呢個，我就選擇咗跟薯菜，而同事就揀咗意粉。我哋兩個心目中嘅滑蛋脆脆魚柳都係炒蛋加吉列魚柳，點知嚟到係一碗芡汁中式粟米斑塊走粟米嘅餸，我哋兩個人頓時O咗咀，因為完全冇諗過係咁。我哋都問過其他朋友同事如果佢哋見到呢個餐牌，佢哋都會以為係我哋想像中嘅炒蛋炸魚，所以都覺得間餐廳有少少誤導顧客。個薯菜就冇乜誠意，白烚椰菜同加咗少少沙律醬同蔥粒嘅焗薯，個椰菜好硬，意粉就真係plain嘅意粉。餐湯都係普通茶餐廳貨色忌廉湯。其實$46嚟講都算係咁，只係理想同現實有出入，令到成件事有啲失望。

依間茶餐廳已經食過好多次，佢係識啲好基本嘅茶餐廳美食，但係佢嘅性價比高，同埋啲嘢食好有質素，所以好多時都要等一陣位。其實茶餐廳做到咁都算係幾成平凡中見真章，佢嘅沙嗲牛肉公仔麵好好食，最驚就係啲公仔麵浸到林晒先來，有時又會見到嗰碗公仔麵好似根本冇煮過，呢度係啱啱好。早餐炸魚柳令我喜出望外，佢嘅粉唔多，真材實料係好多魚肉，蛋同埋腸都係新鮮熱辣辣。其實佢嘅嘢食真係普通貨色，但係真係會令我不斷黎食，大大話話都識咗10幾次，最鍾意係嗌小菜，有一碟叫做薯仔牛肉粒，甜甜地送飯一流。總括嚟講，會再黎！

無意經過，見到呢間茶餐廳裝潢好似幾特別咁，就入去試下啦。隨意點左佢嘅午餐，包餐湯，主食，同飲料，52蚊都算幾抵。羅宋湯有驚喜，好濃番茄味又好足料。主食點左俄羅斯燴牛肉意粉，無咩特別，感覺就係一堆醬加好多牛肉咁。牛肉份量的確好足，但食落質素就麻麻地，感覺落左好多鬆肉粉去醃咁。不過以佢咁嘅價錢其實都算唔錯。奶茶就都幾香濃。臨走前突然聽到佢有菠蘿包新鮮出爐，忍唔住買左個。估唔到佢嘅菠蘿包咁好食，食落好香軟，好值得一試。

同一班朋友lunch time經開佐敦，佢地話有間茶餐廳嘅焗飯唔錯，反正諗唔到去邊間，就一齊去左紅茶冰室試下~我就叫左個蕃茄焗豬扒飯加奶茶😋奶茶茶味比較重，無乜澀味☕️豬扒飯一上枱熱辣辣，上面加左少少芝士去焗，豬扒都幾多，蕃茄汁略嫌咸左啲，但份量都算多👌🏻佢地仲有芝士同咖哩焗飯，下次有機會再試埋先~

連續返左兩個星期六，終於到左短週喇。難得有個星期六早上，一起身就決定嚟試一試早餐。其實呢度位置係有點唔方便，所以真係專登搭車嚟架。早餐簡單A至F餐，我揀左食B餐...招牌沙嗲牛肉麵，配香滑炒蛋，鮮油厚多士熱奶茶沙嗲牛真心濃，公仔麵既湯底，牛肉軟但好味，不過咸左DD，亦可以話真係好濃，但整體OK，炒蛋都幾好有蛋味，唔似其他茶餐廳咁好重牛油奶油味，單純蛋味，所以唔會好漏，牛油多士正常，奶茶好味呀！有機會會再嚟，早餐，午餐，晚餐都想試試。

#特餐 特餐即係沙嗲牛肉麵 火腿奄列同多士 包一杯熱飲 凍飲+$3紅茶冰室嘅沙嗲牛唔似其他茶餐廳咁淨係牛肉有沙嗲而係個湯底係好濃嘅沙嗲湯😍😍牛肉又淋 份量又多🤤多士烘得好脆 好正食曬成個餐真係會好飽🤣鐘意沙嗲牛肉麵嘅你 快啲去試下啦🤙🏻

最近好鐘意去冰室食滑蛋多士，今日去開佐敦，揾左好耐見冰室選擇唔多，經過就入左呢間試，本身見佢外觀好集團式，仲驚食物會好hea，但點知好好味啊！滑蛋好滑，食物好快到，價錢都好平，值得回來

平日食lunch，行到門口都見都人等位，我地兩個竟然唔洗等。我就叫左個午餐粟米魚柳薯菜+奶茶，因為繁忙時間，D餐大部分都等埋幾個一齊出，所以都要等等。終於到喇～～杯奶茶，可能今日唔多人叫呢個餐啦好！上枱喇，以今時今日$46有呢個數量嘅魚柳算幾多，係D汁杰左小小，其他不論魚味都正常「圖中魚柳已經食左2塊」有驚喜個薯菜係焗薯，唔記得影，茶餐廳格局比焗薯都立即加分，焗薯中間界開，有個cream，味道就好薯仔味，因為個cream唔多，到奶茶啦，都可以，但本人覺得茶味再濃小小就正。$46呢個質數可以再食。

成日都聽到d人講紅茶冰室d焗飯好食，今日終於有機會食。呢個焗淡黑椒牛扒飯真心正。好香好足料！佢有3塊牛扒，焗到好諗。d汁仲要超好食，冇得彈！個餐仲包埋餐湯同熱飲，超抵！

一心諗住嚟紅茶冰室食個下午茶 (因為佢唔係平, 同區佢算貴少少。), 都係為咗入佢杯奶茶。但佢地現時奶茶質素及服務員的態度, 都一次比一次差。依家杯<奶茶>係唔係咁好飲了: 冇乜茶味, 而且茶身好薄, 有啲似酒店奶茶。並且好細杯。<香炸雞翼番薯皇>炸雞翼ok, 薯皇亦都ok。<吉烈豬扒湯烏冬>吉烈豬扒ok, 但近骨嘅位置未炸熟, 生生地。烏冬ok, 有啲海帶喺度, 都幾得意, 而且健康。個湯底係平時早餐通粉嘅湯底, 好飲。(最值錢係呢個湯底嘅味道。)<凍朱古力 > ok。環境方面亦有投訴: 啲位置唔係冷氣機太大風, 就係冷氣機滴水。(*呢間嘢都係一年加幾次價。)

食左超過一年有多既茶餐廳，近排已經好少去！原因不是食物質素問題，而是員工質素！！好耐無去，今日就再去食下睇下有無改善，點知問題依舊......餐廳廚房既食物一向都有水準👍👍要講既都係樓面問題，經常落錯單，就算指住餐牌上既食物黎落單，都有機會錯，錯單機會率多過一半，有時見問題不大都照食。最大問題係員工自己落錯單，竟然覺得自己無問題反而覺得係客人既問題，重要話係聽你講食咩而唔係睇你指住個menu黎寫(其實我口講同指都係同一款食物），之後當然一句sorry都無，行開扮無事！而你選擇唔食佢落錯單既食物，更加會係廚房大聲話(個客話整錯wo!)真係火都黎埋！睇黎再去食既機會真係好少，食完一肚氣😡

平時次次都嚟呢度食下午茶，今晚就同老公黎試吓呢度嘅晚餐。原來晚餐選擇都幾多！我因為唔係太肚餓，淨係叫咗一個雞翼撈公仔麵。個雞翼撈公仔麵一黎到，比佢嗰個顏色嚇親！🙈以為係非常之鹹！但原來雞翼就夠夠味，但但汁撈落去個公仔面度嘅時候，就好淡口。老公食dinner set，係豬扒飯配雞串。平時好少食豬扒，但係呢度真係整得好好食！豬扒係外脆內軟架！👍🏻👍🏻👍🏻老公揀咗配薯仔，係一整個焗薯俾你嘅！雖然細細地但係都幾好味，好過食飯！難得有心嘅茶記！大家可以嚟到試吓下午茶或者晚餐！包你話正😋

自從開左呢間冰室，我無再去屋企樓下既茶記，因為野食好食d,又無咁污糟。我好鍾意食佢地既西式晚餐，有湯，多士（係厚多士），主菜每晚不同，我鍾意佢地既雞扒，煎得雞皮香脆，有時會有牛仔骨，豬扒或牛扒，$69可以有不錯既水準，食得過。前幾個月加左中式套餐，$70/1set ,下次要試試。