甜甜咖啡 (Closed)

真係有咁既老板就有咁既侍應!!開始落order時個女侍應已經串串共咁, 都算喇. 當食緊個鴛鴦扒時, 塊西冷扒超多根. 咁諗住同個侍應反應啦. 得到既答覆係 :侍應:「西冷梗係有根架啦!」我: 「我都知西冷有根, 但唔係多成咁囉」侍應:「你都已經食左好多啦」我: 「我只係食左兩舊咁大把」個侍應走左去叫老板,點知個老板一樣咁串:「西冷梗係有根架啦, 好正常啫!」我唔係要佢地換, 但使唔使咁既態度對個客先. 可以婉轉d回覆囉. 以前耐唔中都會去下, 但經過今次就以後都唔會再去!!

晌甜甜食飯好幾次，印象一向唔差。但今晚食完就唔係好想再幫襯。先是羅宋湯，只是微溫，一d都唔熱。waitress話出晒煙，唔堅持都唔打算換/加熱。上菜速度非常慢。隔離檯叫老細跟跟d野食，老細問叫左乜，佢地話羊架。老細答：羊架要焗，係耐d。我地亦都等左好耐(最後個餐等左差不多成個鍾)，「幫我睇下個吉烈豬排整成點」「整緊架喇」。 成個過程佢無了解過客人等左幾耐(佢中途上班)，無入過廚房(係開放式廚房，伸個頭入去問下都無)，亦無打算跟，只係茶餐廳式例牌答案：整緊。再問就話因為"即叫即做，係耐d"。 唔知佢係咪真係認為咁都講得通，根本問題就係：少人、少爐、或者對佢黎講-客多得濟。一般待應咁樣對客都算，但揸旗嗰個都係咁，真係好難有興趣再去。食評內既"推介美食"、"餐廳特色"，我真係揀唔落(個牛角包幾好食既)。

考完試都兩點幾, 本來想去法國雪山咖啡食甜品, 不過去到, 法國廚師說六時先開門, 失望;(後來跟同學在街上相遇, 她們說去食午餐(三點喇喎, 係咪high大咗)我提議, 不如食甜甜咖啡, OK, 出事了！進到去, 沒有其他客人女店員指定我們去坐到某張放著『reserved』牌子的枱, (=,=)點吃的, 女店員給我們非常hea的感覺, 非筆墨能形容的hea...先上飲品, 走酒, 沒甚麼特別。然後我的new york cheese cake來了, 我呆咗囉！細件到！！！係攝牙罅既size！！！吃著吃著, 竟然有蛋殼！！！我叫女店員過來跟她說了, 她..............她竟說：『errrr, 咁有蛋殼都好正常啫, 芝士係雞蛋整架嘛, 因為啲蛋糕我哋係喺出面買返嚟既, 你想點丫？』『哦, 好囉, 我繼續食囉』(既然你教曉我芝士係用雞蛋整既.....我都爆炸啦)唉唉唉, 太佩服她啦！朋友的吉列魚柳沙律好好味, 好後悔冇叫, 仲要食蛋殼, 仲要有人俾我聽埋啲歪理坐了好久, 廚房有個女人一直啤我哋, 態度非常不友善

呢日有時間，可以陪家人黎呢度食個午餐。呢日所見，可能時間尚早，所以都唔算太多人既。我地都係一人一個餐啦。忌廉湯、牛角包忌廉湯個味好濃，料又算幾足既，味道唔錯既。而個牛角包新鮮焗既，好香好正。檸檬汁龍柳個檸檬汁既味道好似食緊芝士蛋糕咁既，我覺得個檸檬味可以淡小小。個龍柳煎得唔錯，好大條同好入味。蒜蓉汁牛扒可惜既係，呢日無黑椒汁，所以就要蒜蓉汁。個汁無黑椒汁咁好食。而個牛扒就差左小小，無乜肉味。紅酒汁牛呢個就幾好食，牛係幾淋架。而個汁同牛係好夾既。呢餐都唔錯既，始終都無乜機會黎呢度食，實有下次既。

都好一段日子冇嚟過甜甜食 lunch 喇, 今日嚟好彩有位!牛角包同忌廉湯唔洗多介紹了, 保持水準Main course 叫了:西冷牛扒 - 牛的肉質唔錯, 不是一味的林, 反而有點彈牙的感覺, 唔錯!不過黑椒汁的味道不太黑椒, 有點奇怪, 薯菜是薯仔, 但不能炸得外皮脆的效果, 還是寧願吃薯條好了!牛仔骨 - 肉質比牛扒滑, 跟意粉如果多一點汁會更好~即磨咖啡 - 今日好像淡了點整體都算唔錯, 還是最愛這裡的環境, 寧寧靜靜的吃個午餐, 賞心樂事也~

見到咁多個食評.完全都係個一,2個人寫.好有造"媒"成份.所以專登食完補番個食評.唔好等的人咁易上當~西冷扒- 差!.仲要lunch set 都賣hk$50.哇..搶呀真係..唔明點解會話肉質嫩.好明顯就係加左"食粉".等的肉"淋"身的.但.無晒肉質...失望!!!!!!茄汁肉醬意粉:酸字一個..無咩料都算.但食唔好其它味.就係酸味..好酸既茄汁咩...不過意粉算係咁..唔算太"林",算hk$35.(下午茶set).都點..不過我諗連鎖店都好食過佢 @@以咁既價.再加咁既質素..一定無下次...想去既.真係自己諗清楚...

好耐好耐之前，呢間舖係有忌廉汁天使麵架。不過唔知點解後來又無左啦，直之最近又有番。咁我當然試下啦，咁好食既。忌廉湯依舊咁好飲，又夠滑同夠香。忌廉味又夠，加舊新鮮熱辣既牛角包就更好食啦。忌廉汁三文魚天使麵同以前既味道差唔多，不過我都係覺得以前既味道會濃d好味d。但我覺得而家既味道都唔差既，個麵唔會太dry就好好架啦。三文魚同以前一樣新鮮，不過都係即刻食好d，唔係熟左就唔好味啦。黑椒牛扒個味道同之前食既都係咁上下，牛扒都算幾大舊。肉質鮮嫩同好juicy。黑椒汁好惹味，新鮮炸既薯仔好好食。雖然價錢係貴d，不過好食就得啦。

都有半年無黎過呢度食啦，呢度既野食真係唔錯。雖則係貴左。呢個下午黎左呢度食，人都唔算太多，都坐得好舒服。忌廉湯即叫即整，等左一陣啦。而個湯算幾重忌廉味，個湯算幾多料，好香同好滑。而跟湯既牛角包新鮮熱辣，脆口相當。真係好正既配搭。黑椒牛扒都係咁大塊，牛扒好有肉味，煙韌可口。又夠juicy，真係好正。而個黑椒汁唔會太濃，都唔錯既。蜆肉天使麵蜆肉都好多，又幾新鮮呀！而個天使麵好彈牙，好有咬口。不過今次個白酒落得重手左小小，食到好濃既白酒味。牛味道唔錯，牛好有咬口。凍朱古力好好飲，杯野又夠凍。野食算唔錯，不過我都係鍾意食忌廉汁天使麵。呢個真係好正，忌廉汁好濃。唔係邊度都食到。但係，呢個麵已經唔見左好耐啦。

週六與老公在新居稍作打掃，又鎖定水龍頭目標後，來了這裡吃飯補充體力。一點多的小店也有八成滿，原來午餐選擇眾多，而且全部食物即叫即煮，難怪多人幫襯!　選好心水後，與老公就慢慢等對食。不知平日是否如此，總之當日只得一位小妹獨自忙，所以送水、送餐稍有延慢，也不會介意。約10分鐘時光，熱暖帶脆的牛角包上檯了，質素仍然令人滿意；餐湯則另外5分鐘後才上檯，幸而那時牛角包仍未攤凍。先讚餐湯熱度十足，老公選的羅宋湯味酸開胃，但湯質較稀；其實我的忌廉湯也一樣不濃，但加入脆多士及蜆肉，幾足料增添了滋味，配以牛角包更是美味，以餐湯計是超額完成了!　針無兩頭利，新鮮即叫即煮味道較佳，但等待時間也會較長。享用完餐湯，再次來到漫長的等待，由收起湯碗至再上主菜，至少20分鐘時光，難怪小店悉心準備不少雜誌供食客取閱!主菜終於上場，老公的森林巴西豬扒肉質豐腴，配飯幾好吃，只嫌醬汁稍甜了點；我選的意式豬肉醬焗意粉配煎蛋賣相悅目，熱度十足，第一印象很好；捲起意粉嗜嗜，芝士味不算重濃，但勝蕃茄醬及甜椒配料組合清新，意粉又彈牙有口感，味道不錯!而面層巨型太陽蛋非常嫩口，既熱又流心，是個極之美好的點綴!　餐後，作病的二人分別要了

一入去坐低,環境唔錯.但係唔知點解要播哥哥d歌-.-好唔夾講返正題2個人叫左1個鴛鴦排(牛仔骨+牛排),1個西冷排天使麵牛角包同湯都唔錯我叫既鴛鴦排先到,味道唔錯,肉都夠林既,薯菜有點辣友人叫既西冷排天使麵後到,見個賣相唔錯,諗住都ok啦,但係個2舊牛排雖然係6成熟,但係d牛係咬都咬唔開,極度"un"囉!!!不過見我食個個都算唔錯,可能係廚師一時失手啦...甜品我叫左蛋糕,冇得揀...揀款加5蚊,不過我咩蛋糕都食既..咁就叫蛋糕比佢揀比我啦,友人叫左木康布甸,再終我個個蛋糕係藍莓芝士先講我個個,好細件,味道普通,如果要我比錢買既話我唔會買木康布甸味道ok,但係太多餅碎啦總捨泥講普普通通啦

最近又去番呢間食，呢日所見都唔算太多人。我地三個人就一人一個餐，餐湯係三碗忌廉湯。忌廉湯次次都好飲既，忌廉味好濃。牛角包新鮮焗既，所以好脆口，味道唔錯。龍柳好大條，魚都算幾滑，唔鞋口。而個檸檬汁，酸酸地幾開胃架。牛扒份量好大，肉質鮮嫩，次次黎都會食。黑椒汁又唔會太辣，唔錯。牛唔算太韌，算幾新鮮既。感覺上會無牛扒咁滯。食物一向都保持到水準，而服務都算唔錯。當我地入黎，佢地都會好大聲講歡迎光臨同講再見架。

一心諗住輕鬆食個tea嘆咖啡, 見到呢間講到好用心咁, 所以去試下...下午o既5點10分, 冇客, 得1檯o係度, 好明顯係老闆同佢d frd, 拎部camera出黎o係咁影相拍片, 仲要影埋我, 我已經好唔鍾意, 仲要細聲講大聲笑, 完全唔理有冇客o係度, 加上好似冇開燈, 一心等做晚市咁, 今時今日咁o既服務態度真係....都算啦~ tea set有cake set, 諗住叫啦, 點之佢話冇cake番, oh~咁即係佢d cake全部係外面買唔係home-made啦... 又算, 叫左個白汁什菌意粉($32), 白汁勁稀, 冇味架wo, so called什菌, 原來係幾條 "菇絲" 同 "菇碎"... 佢又唔provide筷子, 我用叉係叉唔到又'畢'唔起囉....最激氣都係杯iced mocha, 特登加錢, 諗住會係一杯'有心' 同'有質素' o既咖啡, 點之原來係一杯普通o既凍啡再加朱古力粉, 你係可以完全飲到朱古力粉o既味囉, 咁樣就收多我$8....唯一好處係唔使加一, 但係我唔會再去....

呢間雖然唔係成日去食，但每次都俾都我好好既印象。都十二點半，但唔算太多人。真係太好啦，都係叫番牛扒同炒天使麵。因為呢兩樣好好食架。忌廉湯真係好香濃，忌廉味好夠。同出面所謂既"忌廉湯"真係無得比。出面果根本就係麵粉湯。牛角包暖暖地又好脆口，牛油味好香。一流，依家好小有餐廳餐包會供應牛角包。黑椒牛扒牛扒好好味，肉質鮮嫩。黑椒汁辣辣地好惹味。而且有好多伴菜，相當健康。仲會用蒜蓉炒香佢，而炸薯仔好有薯味。脆卜卜，呢薯仔應該係自已切架。蜆肉炒天使麵天使麵好爽口，而蜆肉就幾新鮮。個麵雖然唔係好多料，但俾蒜蓉炒香佢就好好食。不過我都係鍾意食個忌廉汁天使麵，個忌廉汁好濃。凍檸茶算幾大杯，但茶味唔夠濃。呢間既服務態度同食物都咁好，肯定有好多個下次。

睇到 Openrice 中有10 個好評, 而一個劣評都冇, 急不及待要去試試呢間餐廳西餐 Set Lunch 有十多個選擇, 小小的店子只有廿多個座位, 但都差不多坐滿人,好寧靜的環境, 有點陽光從窗外透入, 加上輕鬆的音樂, 好悠閒的感覺~點了兩個 Set Lunch, 先來了濃濃的魚蓉忌廉湯, 睇賣相已經唔係隨手畢俾你就算,還有兩個暖暖的牛角包, 又香又脆, 單是湯和包已經好滿意了!主菜全是即叫即製 (睇到廚師即刻做的), 絕對唔係大量煮熟再翻叮之作!熱和脆的薯條可以一口氣吃完, 拌碟的蔬菜有四種之多, 好夠健康,我的雞扒煎得皮脆肉嫩, 絕對唔係茶餐廳乾硬貨色, 下面仲有惹味的什菇,太大份, 但又好味得要吃個清光! 另一個主菜係黑椒牛扒意粉, 黑椒汁好似濃咗些少, 牛肉肉得好靚, 意粉就唔係烚熟就算, 應該係有加調味料再炒炒的, 正呀!最後還有即磨咖啡, 入口香醇的感覺, 知道我們今日真的沒去錯地方!唯一係枱同座位都較窄, 如果係肥人會坐得好辛苦

都成三個月冇黎呢度食，今日機緣巧合之下去左呢度食午餐。去到都仲有早餐食，但我地都係食午餐。點知佢地話要煲湯，等四個字到。不過無乜問題既，耐小小都值得去等。我地叫左個天使麵同牛扒。牛角包新鮮整好，好脆口，又唔算太油。好好食，有無多舊比我食呀？忌廉湯佢地要即刻煲，所以好新鮮。個湯好濃，完全同出面果既無得比。我最鍾意食面頭既麵包粒，新鮮炸好，夠哂金黃黑椒牛扒個汁好夠辣，牛扒好大件。肉味又夠，唔多落肉粉，果然係塊靚牛扒。而薯菜係炸薯仔，個皮好脆口，配上紅椒粉，認真一流。蒜蓉蜆肉天使麵呢隻係炒天使麵，麵好爽口彈牙。蜆肉都幾多，最好睇都係個賣相。夠哂colourful。整體既味道唔錯既，但我都係鍾情於忌廉汁天使麵。凍朱古力好普通既飲品，但今次沖得甜得滯。呢間餐廳既水平都保持到，實有下次既。