稻香 (淘大商場3期)

Open Now

Now Closed

原本今晚同墨丸米去海x食長腳蟹，但已經加到208斤，後來得知稻香做緊長腳蟹198蚊斤，橫掂就在對面就立即轉場這間稻香新搬來的，我也是第一次食，估不到地方都很大。我們2人被安排坐6人枱，所以坐得好舒適寛落而且沒有用餐時限，也沒有好似海x分2輪時段，所以食得好輕鬆。後來人漸漸多，全場爆滿，好多都為長腳蟹而來我們當然必點長腳蟹，由侍應姐姐帶我們去海鮮區揀蟹，每隻蟹都好生猛，還上演逃獄戲碼最後我們揀了一隻3斤半左右的長腳蟹清蒸$693還點了孖寶餐$188，有： 脆皮乳鴿兩隻 ～ 香口肉厚，好和味 椒鹽蝦 ～ 蝦炸得好香脆，連殼都食得， 椒鹽好惹味，不錯長腳蟹 ～ 賣相超吸引打卡一流！長腳蟹肉質鮮甜多肉，好正食得超滿足另有每人15蚊茶位及加一收費。

真係，真係，真係，好難食。其實，瑤柱蛋白炒飯同埋炸子雞都OK。當上湯龍蝦伊麵上枱之後，就好唔對路。你可以想像下，龍蝦韌而無味，伊麵溝水，仲難食過乜都唔加。我諗去街市買返嚟自己慢慢煮都煮唔到佢咁嘅水準。係咪今日個大廚唔喺度啊？就算係都唔使咁㗎。其實我真係唔寫食評，但係忍唔住。喺櫃檯比茶包自己斟水仲要加人頭再加一。其實你俾杯茶我自己攞得㗎啦。如果人頭再加一不如你幫我斟茶啦。其實我個人冇乜嘢，好易話為㗎咋。我都係食返茶記或者北上好啦。心碎。而家斟杯茶定下驚先。

搬咗之後，雖然環境好似好咗，嘢食係平，幫襯咗4次，次次都漏單，等成個鐘都未齊肯定話整緊其實漏單。嘢食好似係平過其他酒樓，不過質素一般般，碗具污糟洗唔干净，冲茶个壶好污糟。早茶搭臺一臺要搭夠三圍臺起碼冇位剩先心熄，仲要共用熱水壺話冇多比你，真係離譜。你就係出面等餐死，眼白白見到有幾條友話識得邊個邊個就立即有位。有次晚飯去到最尾等個糖水等成粒鐘，佢先同你講話雪櫃剛攞出黎未煮局你轉壽包。以後都唔會再幫襯！

見到淘大有間新稻香，應該都係開咗幾個月嘅啫， 所以星期六休息就去試下，新裝修幾靚，有卡位，但我哋大约早上七點九去到，左邊大廳和卡位已經坐滿了，姐姐比張卡同茶包比我，叫我去入面右手邊廳房，廳房係冇自助水機， 每枱都有保暖壺，我覺得其實仲方便衛生啦叫咗兩個老友記孖寶，兩個人埋單都只係HK$67.5, 非常抵食而且正價點心有六折，下次試下蒸飯，淘大稻香正價點心價錢比觀塘/德福都平少少㗎食物方面，煎釀茄子，魚肉夠多，但茄子很淡口， 而且笳子入面有一粒粒籽，不太喜歡。鮮竹卷勝在夠熱辣辣，好味另外要提係洗手間，行得頗遠，但新裝修而且大，格數又多

唔講唔知🤔 原來 #淘大商場 間 #稻香 搬咗過嚟戲院樓上，雖然係新裝修，不過樓底實在太矮，嘈吵嘅聲音被困住、整個環境感覺都幾侷促😅 不過價錢勝在夠親民，我哋七個人叫咗個六人套餐，$1140已經包咗七個餸，仲有 #燉湯、#糯米飯 同 #奶黃卷 做 #甜品，啱晒一家大細嚟幫襯☺️ 不過前台嘅服務員態度真係有啲離地，當住客人面前都可以講是非🤯 唯有當借咗聾耳陳隻耳，咩都聽唔到🙂‍↔️🙂‍↔️講返啲食物，款式同味道都唔差，大大條 #清蒸金花斑，係老竇嘅至愛♥️ 佢每次都要加個白飯再淋上魚汁一齊食，佢話咁食認真一流🤭 而我就比較鍾意佢哋嘅燉湯 #鮑魚海中寶，湯料睇嚟都幾豐富，啖湯非常鮮味🤤 而佢哋嘅糯米飯亦都炒得幾乾身，搞到我忍唔住一啖又一啖放入口🤭🤭不過每次嚟幫襯，我覺得最敗筆嘅都係佢哋嘅 #自助沖茶模式 同埋 #員工嘅服務態度 … 或者呢啲就叫 #正宗港式風味 啦😅😅📍 稻香(九龍灣) 牛頭角道77號淘大商場3期2樓S159, S171-175號舖

搬咗新舖位，第一次幫襯見到宣傳單張價錢都好似唔係好貴就去試吓啦舊舖嗰陣時都間唔中去食覺得都幾抵食嘅入到去覺得裝修幾靚啦，間隔都好闊落坐得舒服過之前好多但係覺得嘢食就一般大家可以睇吓啲圖希望佢之後會進步啦