一眼睇晒車仔麵喺面底、配菜、調味方面有咩選擇，仲有好多唔同小食可以揀。
仲另外有早餐同茶餐嘅餐單，都幾豐富。
除咗填餐紙外，仲可以用QR code手機自助落單，即時計到自己order嘅價錢，夠哂方便。每個座位面前都有一個小架俾客人放置手機同銀包，簡單嘅設計已經感受到貼心嘅服務👍🏼
堂食嘅餐具都用外賣餐具，咁就有啲唔太環保，但疫情期間呢個安排亦都無可厚非，始終衛生都好重要。
枱上面仲放咗六款唔同嘅辣醬，我覺得幾新穎，牆上面仲貼咗六款辣醬嘅介紹，每款都有唔同層次嘅辣，如果想試嘅話，可以問店員攞隻調味碟逐一品嚐。
我同同事都覺得超肚餓，所以每人揀咗五個餸，我嗰碗有午餐肉($8)、牛肚($10)、牛骨汁牛丸($10)、牛腩($12)同咖喱魷魚($12)配米線，仲加咗秘製辣汁。
另外仲叫咗幾款小食，酥炸雞翼有三隻，係屬於大size嘅雞翼，炸得香脆又仍然保留肉汁，味道唔錯！
脆B生煎包總共有三個，原來係一個扁扁嘅菜肉包，呢個味道就一般啦，我就比較推介以上三個小食喇！
話説前排同朋友中午去壽司X唔駛等好耐，呢日同事又話想搏下，不過運氣嘅嘢唔係時時有。我朋友推介過嗰度附近有間唔錯嘅🚗車仔麵，叫做「賞麵」。
我哋下午一點鐘左右去到，人山人海，門口有張櫈好多人等緊外賣🥡。好彩原來餐廳面積都唔細，有非常多座位，格局有啲似自修室，乾淨企理。
「麻雀雖小，五臟俱全」正好用嚟形容枱頭嘅設備，每張枱都設有📱手機同👛銀包架，非常方便。枱最上面仲可以擺袋添，設計貼心。就算空間有限，都唔代表一定會坐得唔舒服。
車仔麵定價唔貴，麵底$13，有多款選擇。餸料則分為三種價錢：$8、$10同$12，就算8蚊餸都好吸引，唔係雞肋嘢😚。另外，各款小食都係賣$18，好抵！點餐紙用上好多Emoji，好可愛，不過其實餐廳都可以用QR Code落單。
我哋一人叫咗一碗麵，再加小食Share🙈。張枱夠位擺哂，仲有位淨，闊落！
同事嗰碗要咗河粉加秘製辣汁，呢隻辣汁仲啱我口味，因為辣度無咁強，亦好似有啲啲沙嗲香。河粉偏粗身，幾滑。餸料佢要咗咖哩魷魚($12)、花枝丸($10)、魚肉春卷($8)同蘿蔔($8)。🦑咖哩魷魚最出色，另外每碗麵都會搭兩條生菜，幾好。
小店開喺工業區，主要做上班族生意👩💼👨💼，所以營業時間亦相應配合。早市同茶時更有車仔麵以外嘅選擇。題外話，🥤飲品紙啲飲品名好過癮，明明係大路嘢，但變咗做肥妹同甩色等，好搞笑。麵餐加$6有解茶飲，抵！
每枱有六款特式辣椒醬😳，而且仲有簡單介紹，之不過個口麻痺咗，所以無試到。如果鍾意食辣嘅朋友，應該會好興奮。
總括嚟講，賞麵確係唔錯，湯底同米粉好食😋，餸就中矩中舉，個別項目比較有特色。不過餸量相對較少，例如丸類得兩粒，男仔就加底或加小食吧。小店細細，不過經營得相當有條理，上餐快、店員有禮，我仲見到佢哋今日只係開到兩點，因為要進行內部培訓👍。
Video
