達人烤肉 (Closed)

本來諗住揸車去圓方，經過柯士甸附近突然想食韓烤，咁就撞下睇下有冇車位啦。泊左車之後本來過左對面上去山林睇下有冇位，點知有間野好鬼搶眼响停車場隔離，咪過返對面睇下有咩食囉。原來係韓烤，問左佢地冇時間限制又睇個場都好大仲唔即刻入去咩。座落就上左湯，沙律，凍水，泡菜同生菜呀咁，似足韓國個邊喎。睇下餐牌，都叫大路嘅有晒架，豬腩肉啦，豬皮啦，牛呀咁。最衰朋友唔食內臟啦，我真係想食豬腸同豬皮架。終於淨係叫左豬腩肉同牛仔骨，諗住陣間試埋冷麵嘛。一如韓國個邊啲舖頭，豬腩肉都係一大舊烤到咁上下先切開佢，正! 夾埋生菜同蒜頭食口臭都唔理咁多架嘞。因為一心諗住留肚試個冷麵，所以只係燒兩種肉。個冷麵味道好好，可惜唔夠凍，如果好似某餐廳咁有啲冰就透心涼嘞。因為新開張，點真露嘅時候服務員話其實有免費嘅，咁佢就比左張咭我，我要行去對面一間韓國舖頭攞酒嘞。送兩枝韓國啤酒同真露一枝。兩個人有一個要揸車，夠架嘞。總體上，服務員十分落力，本地嘅同韓國黎嘅都好週到，價錢唔貴，最好係無時限嘛，得90分鐘食個啲我真係唔想入去架，就算我真係食到但好大壓力，一邊食一邊睇住個鐘都不突止，到咁上下就有人比張單你話埋定先喎。慘過去大牌檔。