東京築地拉麵 (Closed)

以前中意襯下午茶或者黑夜時段嚟食拉麵，咁會抵dd但而家無左黑夜優惠，下午茶又唔做星期六，平時口痕貴少少都照食啦我個人好怕港式嘅偽日式拉麵，呢間又唔同喎，雖然比唔上成百蚊碗嘅真日式拉麵但佢湯底都高質嘅，係煲到偏奶白色拉麵都夠彈牙，我最中意加極多黑胡椒同芝麻，香味大大提升。而且佢嘅义燒都係無得彈，肥瘦均勻夠腍又好味

呢間店都開得幾隱蔽，唔係朋友帶黎食都唔會發現佢。出名既三神拉麵，上次黎已經食過赤神拉麵，味道唔錯，今次又再黎食下其他。今次揀左黑鬼拉麵，叉燒大大塊，湯底濃，整體黎講都好食，不過都係比較鐘意辣辣地既赤神拉麵。

今次第二次去食屯門時代東京築地食拉麵🍜！等位快所以好快有位，我地二人叫左一個築地叉燒豚肉湯拉麵🍜，味自慢叉燒豚肉湯拉麵，湯🥣熱嘅面底滑，肉厚薄適中唔鞋，不過人就比較多，坐位有點逼，叫多兩杯飲品，不過不失

今晚想食簡單d,,一向唔中意食飯既我揀左食拉麵，係屯門市中心，有4-5間食拉麵既地方，最後揀左間近巴士總站既東京築地拉麵。服務員揀左張4人枱俾我地兩個坐，坐底左就俾左兩杯茶，還帶上笑容咁放底兩杯茶黑蒜叉燒拉麵每次食拉面，都會先試下果間既叉燒，因為呢樣係最基本，通常呢樣整得好食既話，我都會再去食。呢間叉燒一夾起就散開，唔係咁中意赤丸叉燒拉麵唔夠辣，同埋一d都唔香，就好似落左辣油既拉麵，麻麻地呢間雖然有吧位，但一睇就知，呢d位唔係俾人坐🤣

今次係第二次去食，等位都算快，同第一次一樣啲拉麵質感差，反而湯底比較清甜感覺唔錯，食材分量剛剛好。再加左一客餃子，外表OK但無內涵，食唔出有肉味，餃子比較遜色。

同兩位朋友去完屯門醫院探病後，晚上八點許，想找個地方食晚餐。朋友話想去試下屯市樓下間築地，我地兩話不說就去了。我地都係第一次去此店。見到門面裝修都好似好靚。格局都幾似豚王，但當然價值就平啲。餐牌用報紙質地整成，我地隨意點左三碗$6X 拉麵，叫左一碟餃子。拉麵好似普係超市買到黎煮果隻。想食有口感拉麵就唔好黎呢度，因為你會失望而回。黑醬款朋友說沒有蒜味，而且望落個黑有啲奇怪。整體而言，個人認為間店舖好似好高尚，但是食既野都係好普通。但是，佢勝左唔洗等位，想填飽個肚係可以選擇它。

今日同老友行過試咗呢間，第一次食，感覺幾好，幾好味。服務亦唔錯！食品如下: 1) 叫咗兩碗拉面: a 特上大盛拉面: 湯夠熱又好飲，面底滑，叉燒厚簿適中唔鞋，豬軟骨我本身唔鍾意食，無得比較。b 赤神叉燒拉面: 老友係咁話正2) 溏心旦，其實拉面半身有半隻，因為鍾意食，另加兩隻3) 餃子: 正常嘢，好食4) 日式黑油雞翼: 似鹵水，夠熱，入味而且滑5) 椰菜豬肉: 好食，不過唔特別6) 綠茶可樂: 獻出第一次，唔太甜，ok。全部好食！ 拉面湯底濃度適中，個人口味唔鍾意好杰果種。 價錢唔貴，會再去試埋其它嘢

中午和朋友去屯門時代廣場行街，見有點餓就搵左呢間拉麵店試下，可能lunch time 關係，等左15分鐘左右先有位，走進店舖，地方比較狹窄，我們點了3碗拉麵和一客煎餃。

同朋友行完街開餐諗起呢間拉麵店，上次太多人去咗食其他，見今日冇咩人就試吓！我地2人各人叫了一個拉麵，豚骨湯豬軟骨拉麵、味自慢醬油叉燒拉麵、麻醬豆腐、燒秋刀魚。個人比較喜歡醬油叉燒拉麵及麻醬豆腐。

原來係太興旗下既連鎖拉麵，放工唔知食乜好就去試下。裝修算幾好，暗暗地幾好feel, 客人唔多都叫坐得都鬆動。見到個介紹好似好勁，個湯又咩五輪製湯法，麵又係咩七輪製麵法，於是叫左個黃金拉麵。碗麵好快就黎到，賣相都ok, 有兩塊叉燒，兩塊紫菜，半隻流心蛋。但係一飲啖湯只係有死咸味，冇乜鮮味（五輪製湯法既味道？）。麵質係普通日式超市買到果d,仲要有陣鹼水味（七輪製麵法既特色？）。感覺唔係幾好食，可能係我食唔慣正宗築地拉麵。唯一要讚既係侍應雖然冇乜笑容，但加水加得幾快。總括黎講想試下用左正宗多輪製麵法既築地拉麵既話，就一定要黎啦以5分滿分既話用七輪製麵法整既麵：2分用五輪製湯法整既湯：2分叉燒：3分半隻流心蛋：3分服務：2.5分

星期六的晚上, 在屯門時代廣場處處人龍, 見呢間拉麵最無乜人等就試下, 味道太普通芝麻汁冷豆腐($ 22), 質地比較硬身, 這個芝麻汁配合得唔好味~可以不試>黑蒜油豚肉拉麵 ($68), 黑蒜油不夠濃香, 但豚肉質地厚薄剛好, 而且不會有重豬味, 所以豚肉唔錯~見到餐牌有個套餐是拉麵+小食+飲品只是六十幾元, 算是抵食, 因套餐的拉麵沒有糖心蛋, 所以本人是次是散叫~

👫下午茶想食啲嘢又唔想咁飽，就嚟咗呢到食迷你拉麵🍜啦🤣 📢 想知邊到有更多好西食？Follow&like @ourfoodstory.hk✨ 吃貨情侶帶你食勻全世界🌏 不定時更新食評⭐️一一一一一一一一一一一一一一#迷你豬軟骨豚骨湯拉麵 <$36>▫️熱日本綠茶話就話係迷你，但份量一啲都唔少㗎🤔 面頭啲豬軟骨炆到好稔，軟骨一咬就碎，所以幾易咬🤤 湯底偏淡唔會太鹹，都幾濃豬骨味🍜 木耳碎同粟米嘅份量都幾多，認真足料👍🏻 一碗麵連嘢飲只係$36，真係超抵食😍 驚唔夠飽叫埋指定小食都有半價優惠㗎🤓 啱曬長期糧尾嘅👱🏻‍♀️ 😂一一一一一一一一一一一一一一👾驚喜指數：❗️❗️🔙翻撻指數：❗️❗️❗️（5個❗️最高）一一一一一一一一一一一一一一💑提提你：▪️10% Service Charge

豚肉拉麵套餐，配菜連飲品都只係$68。超值呀～8:40晚市後不用等位，可直接入內，環境坐位舒適，豚肉麵湯底唔錯，黑麻油好香，豚肉不過不失。餃子皮薄但餡料略少。本來想試金菇豚肉卷，但賣哂，唯有下次再去食過啦。呢個價錢$68係市中心食到碗豚肉拉麵，已經超值。如果無心水，唔知食咩，不妨一試。

位於屯門市中心時代廣場地下，就有一間貌似日本風嘅連鎖拉麵店，七點嚟到都有座位，設計呢就比味千拉麵好啲，而且燈光昏暗，幾適合情侶朋友短聚。打開menu有幾款豚骨湯叉燒拉麵，都係$68，咁啱有特別推出嘅黑油豚骨拉麵套餐，$68包小食同柚子蜜，就點咗一客。都好快上菜，不過一黎個拉麵真係比較普通，係街邊食到嗰啲彈牙橡筋麵，而個湯底都只係似豬骨味精湯，反而黑蒜油香味十足，幾開胃！而豚肉就真係極度唔推薦，似白灼肥豬肉，同拉麵好唔夾！值得推薦係碳燒叉燒，入口即溶雖然肥膩但非常好食

同男朋友行街, 晚餐想食拉麵, 喺openrice一 search, 就見到呢間築地拉麵好似唔錯。我哋六點十左右去到, 呢個時段未算好多人 ,我就叫咗個雪印牛油叉燒拉麵。一來到見到個拉麵賣相都唔錯, 見到塊牛油 大大塊好厚感就已經覺得好興奮。 之後影下相, 影完相塊牛油基本上已經同個湯融合咗。跟佢嘅食法落咗啲黑胡椒粉同埋白芝麻, 食落真係幾好食。首先個湯底有好濃香嘅牛油味, 本身佢豬骨湯底唔算話係太鹹嗰種, 但係都已經好濃郁。 加埋芝麻同黑胡椒一齊食 , 一啖拉麵一啖湯。 食得好開心。 至於男朋友叫咗個醬油湯底嘅叉燒拉麵, 我試咗一啖個湯, 就覺得都係個牛油雪印豬骨湯底正啲, 唔怕肥嘅話就十級推介。