Video
Introduction
提供港式麵食的麵檔，以雲吞麵作招徠。另外亦有撈麵、粥品及煲仔飯供應。
continue reading
Opening Hours
Mon - Sun
12:00 - 03:00
Above information is for reference only. Please check details with the restaurant.
Signature Dishes
今個冬季的收成相比往年不算得豐富，主要是慢了起步，北海道的白蘿蔔還未長得肥大，已被暖和的天氣逼得開出花來了，還是趁早收割，免得春、夏季又一度落後。唯一慶幸是首次成功種出兩個日本椰菜，當然滿心歡喜，趁蔬菜仍在新鮮的狀態，快將我一半的收成，與我至愛的老爸分享。當天中午相約老爸在佐敦會面，除了分享收成外，當然也不忘美食。棠記是一家位於渡船角的老式麵家，聽伙記細說棠記的歷史，原來開業已接近50年了，昔日在渡船角只是以街邊車仔模式經營，蔡瀾光顧蔥花撈麵就是該年代了。及至1997年政府整理市容，才搬入舖位。筷子套是懷舊的紅色龍鳳圖案，對我來說，已甚少看到。老爸要了雲吞麵，面上散滿了蔥粒及韮黃。問老爸要了一粒雲吞試試，老爸即說是雙蝦的。一咬細小的雲吞，果然內藏兩隻白中帶鮮紅橫紋的蝦子，蝦肉非常爽口，配搭了小量具鹹香的豬肉，味道恰好！不過可能因蝦肉處理得太爽口了，所以未能保存天然蝦的鮮與甜，也許這同是大部份雲吞常見的問題。麵條爽口帶韌勁，不錯也！經伙記介紹，我又將膽固醇的考慮擱於一旁，要來了豬手麵。麵上仍是充滿了蔥粒及韮黃。豬手炆煮得軟腍，這個不孝女也轉移一點膽固醇給老爸嚐之，老爸一試後，最終將半隻讓給了他。棠記的豬手，皮較薄、南乳味則較輕，緃使豬手大部份是由滑溜的脂肪組成，但相對其他麵店的豬手，其肥膩度則較低，在現今講求健康的飲食文化，這是未嘗不可的新取向。自己也食得很暢快，差點也忘了拍照。從食評得知，棠記的水餃是必食的項目。於是要來了一碗淨水餃，同時蔥花及韮黃密佈。水餃的可觀性甚高，餃皮恰似少女散開的裙邊，同時薄薄的餃皮透出了粉紅的餡料，吸引非常。一咬水餃，香氣隨即滲出，預告水餃質量相當不錯。餡料有爽口的木耳、豬肉、冬菇及蝦肉等，難度就在於各種食材怎樣的配合，小女子當然不懂得箇中巧妙，但有時吃到的水餃食材對辦，但偏偏就拼合不出理想的香氣及味道來，相信師傅一定有其秘訣。原來生水餃每打售 $60大元，平均 $5塊錢一隻，也頗合理。值得一提的也有棠記的傳統大地魚、蝦角湯底，蝦角即是蝦頭、蝦尾，而多肉的蝦身反而帶不出湯頭的香氣，味道一絲不苟，加上蔥花與韮黃的配合，此湯底絕對值回票價。腩汁芥蘭，交帶了伙記要稍軟一點，怕老爸咬得辛苦。芥蘭雖則較軟腍，但又不至於難吃的狀態。腩汁色澤頗為深濃，但伴著芥蘭又不覺得腩味如預期中那般濃郁。棠記的辣椒油，帶香與鹹度足，但辣味則較溫和。棠記晚上備有薑蔥魚腩、魚嘴煲供應，引得老爸口水流，可惜當天中午無緣嚐到。棠記用料新鮮，加上傳統正宗的手藝，怪不得可屹立半個世紀之久，果然是傳統味之泉。
continue reading
一向知道渡船角附件滿佈出色食肆，但自己又真的很少走入去食野，除了做到係人都識的老趙、添記和堂記腸粉外，其他的都沒什麼吃過。經地膽推介，來到棠記食番餐粥麵，和友人點了一碗粥、一客麵，以及炸雲吞，食住先，唔夠再來下場。是田雞粥，粥底幾綿密，沒什麼味精，只是田雞唔得肥美，肉也比較韌；炸醬麵則幾爽口，微辣，肉絲不會硬柴柴，愈食愈開胃。雲吞是即叫即炸，香脆鬆化，餡料的蝦肉成份亦算足，此等香口之物，從來我都欣賞。若是配上傳統的甜酸醬汁，一定會比現在附上的沙律醬更好。胃納尚有空間，友人說添記去也。
continue reading
早一陣子師傅做左一個非常重大的決定, 就係要與我最深愛的內臟食物分手, 分手原因好老土, 就係因了解而分開; 臨別秋波, 無理由唔食埋最後一次, 於是相約好友食家"乜都放入窿"齊齊食餐飯! 而好友食家"乜都放入窿"知道師傅分手在即, 於是就決定同師傅黎呢間食店, 等師傅可以作個最後回憶! 地點一早確定, 師傅約埋好友食家"乜都放入窿"就齊齊行去, 而師傅就懷著一顆期待加不捨嘅心情入到食店; 坐底後就商量下有咩想食, 其實黎呢間食店最主要係豬雜, 所以呢道菜係絕對唔會唔叫, 而好友食家"乜都放入窿"就揀左一碗生菜粥, 而師傅就揀左牛筋撈麵, 再加多一碟炸雲吞! 當柯打豬雜的一剎那, 侍應就問要白灼定炆? 好友食家"乜都放入窿"就問炆係點炆? 但師傅估都估唔到個侍應會咁講, “炆咪就係用個煲黎炆囉!” 師傅當堂O晒咀, 嘩點樣炆都唔講, 粟子炆又得, 疆蔥炆又得, 就算你話謄條炆都得, 但佢偏偏話用個煲黎炆, 絕對吹漲! 為免糾纏下去, 師傅決定揀白灼!唔使等好耐就已經有得食, 師傅就冇試到生菜粥, 反而第一時間試牛筋撈麵, 牛筋撈麵賣相好靚, 好吸引, 而且牛筋炆得好腍, 柱侯味夠香夠入味, 真的不錯, 加上撈麵嘅麵身爽口彈牙, 口感絕對一流, 加上冇鹼水味, 非常之正; 而配上嘅湯亦夠清甜, 有蝦籽嘅香味, 成碟撈麵嘅配搭算得上一絕!炸雲吞絕對係即叫即炸, 皆因一放上枱上, 師傅就見到嗰種熱氣, 真係熱辣辣嘅熱氣, 一碟有五至六件, 雲吞炸得好脆, 冇油味亦唔油膩, 而且餡料亦不賴皮, 皆因蝦肉都幾多, 不比未炸的雲吞差; 但如果用同類食品炸九菜餃相比下, 就會失色少少, 此終九菜有種好香好吸引嘅味道, 而雲吞就冇左, 比師傅再揀多一次, 師傅一定要炸九菜餃!最後係白灼豬雜, 豬雜有豬潤, 豬腰, 粉腸同豬心等, 成個豬雜都真係好新鮮, 灼得絕不過火, 入口鮮嫩爽口, 而且咁多款都冇邊樣係整得唔得, 成碟豬雜絕對係高水準; 不過唯一令師傅同好友食家"乜都放入窿"覺得失望, 就係份量比較少, 呢碟白灼豬雜只不過係比及第粥嘅料多少少, 但價錢就貴得多, 由於之前已經領教過及第粥, 所以師傅同好友食家"乜都放入窿"都覺得要兩碗及第粥仲會抵好多囉!總括黎講食物繼續維持高水準, 非常出色, 服務亦算友善, 環境舒服乾淨, 價錢唔係貴, 不過實價師傅已經唔記得左, 恕未能例出! 作為同內臟分手前的最後一餐, 師傅都算得上非常滿足; 雖然千萬個不捨, 但仍得分手; 呢間食店師傅相信絕對會再黎, 不過幾時就唔知, 可能再來時就係師傅同內臟重修舊時, 亦就係同呢間食店重聚之時, 笑臉係絕對要比, 並希望食店繼續努力啦!
continue reading
朋友住附近,時常同我講,話自已樓下好多好野食,哈哈,晒命咩,我樓下的食店,差不多全部垃圾,本來又話帶我食下串燒,又話食牛腩,不過我因為患上尼古丁退瘟後遺症,當時成口都飛滋,我都好想食串燒同牛肉,同辣野,但.........為了身體,忍住,最後只好帶我去食水餃麵水餃麵,水餃唔算大粒,但就好爽口,好大隻蝦,而且隻蝦好彈牙,麵的質量都好,灼麵的時間好準確,good女友的淨水餃,一樣好味道朋友的水餃撈,我無食到,但佢就不停話好味,我諗都應該唔錯大家一起吃的魚皮,其實我覺得都無幾多店鋪有白灼魚皮食喇,難得呢度有,我又點會錯過呢?魚皮爽口,麻油份量也剛好,薑,蔥也夠多,正爆啦總結:我愛死這種老鋪了,出品有一定水平,又或者呢種老店,經驗夠之餘,唔應該太好生意,老實講,都唔知幾多鋪頭,生意做得旺,出品就會立即走樣,我相信大家都見過好多啦,我覺得,如果有過開來呢邊,可以試下呢間雲吞麵店,唔錯嫁..........再見
continue reading
午市去食半場客滿，冷氣唔太夠係唯一敗北，但係呢度勝在用料鮮、粉麵靚。叫左墨丸水餃河，墨丸唔係雪丸食得出鮮墨魚，水餃蝦大大隻無欺場，河粉薄到透見湯底顏色、粗幼均一而且唔會一夾就斷、爽而滑，食完唔覺有味精。 呢度食粉麵起標價係廿蚊，我覺得值。一路食都見到好多西裝友專登入黎幫襯，隔離枱仲係四人搵食團黎，一路食一路讚。雖然環顧各區，棠記未見得係首屈一指，但以本區黎講質素應該唔錯。 PS: 好耐未食過咁靚河粉。
continue reading