爺爺雞飯 (金百利中心) (Closed)

雷神電影啱啱上畫，梗係要先睹為快啦。所以就約埋朋友喺銅鑼灣食個DINNER再去睇戲。爺爺雞飯喺金百利中心7樓，一出地鐵站搭轉𨋢就到，非常方便。為免睇戲飯氣攻心，所以揀咗雙拼套餐同小食。份量上到枱都好多同朋友SHARE就剛剛好又抵食。爺爺海南雞飯拼馬來肉骨茶。雞肉嫰滑多汁雞皮都算爽口，沾上薑蓉甜辣醬一齊食，非常惹味。加上雞油飯香口得黎唔會太膩，水準唔錯。肉骨茶材料都豐富，骨排／支竹／豆卜／冬菇／金菇等，骨排煲完湯都唔鞋口，加上湯底藥材味幾濃郁，飲完個人都暖笠笠。咖央多士。睇見有咁大塊牛油夾住就知夠晒邪惡，咖央醬又多，夾住烘底厚多士一齊食。真係跑返幾圈運動場都抵啊。叄巴蘿蔔糕。朋友心血來潮想食就點黎過下口癮，入口微辣蘿蔔糕偏軟身但味道都唔錯。泰式奶茶＆桔桔。奶茶味道不過不失，茶味偏淡但唔太甜。桔桔就好香柑桔味，甜甜酸酸咁好醒胃。整體價錢喺銅鑼灣黎講算好親民而且選擇都多，跟餐飲品亦有半價優惠。臨走先發覺佢有OPENRICE PAY，下次幫襯上網睇下有咩優惠一齊用仲抵啊。