金牌小龍 (Closed)

今晚我們喺尖沙咀附近做完嘢之後，去咗iSQUARE嘅「金牌小龍」食晚飯！我們叫咗上海風味肉嘅質感好爽口鬆化，啫喱嘅位置亦好煙韌彈牙，唔會好硬實實！台式酸辣湯雖然係小小一碗，但材料有豆腐、肉絲、筍絲等等等等⋯⋯都幾足料豐富，至於味道都幾夠酸，食落相當醒胃！紅燒豬手嘅質感好爽滑煙韌，味道好入味香濃，最好係唔會有好油膩嘅感覺！台灣紅燒牛肉麵嘅湯底味道非常鮮味濃郁，牛肉嘅肉質相當鬆軟，麵質就好煙韌彈牙！五福小籠包係有五種唔同顏色，味道分別係墨魚海鮮、櫻花蝦、抹茶雜菌、蟲草花同咖哩鷄，雖然有多款唔同嘅味道同外皮非常薄身，湯汁嘅味道都算幾鮮甜，但始終都係原味嘅味道比較好！原盅鷄湯麵同清燉牛肉湯麵嘅湯底真係超級清淡，味道祇係比滾水多啲啲味，而且鷄肉嘅肉質比較「粗嚡」，牛肉就不過不失，因湯同麵係分開另上，所以麵質好煙韌硬身！醬牛肉捲大餅嘅外層餅皮質感好軟熟，入面包著惹味嘅醬牛肉同爽脆嘅青瓜絲，但就牛肉嘅份量就超級少，好似食緊牛肉拌青瓜捲咁！豆沙鍋餅嘅外層好香口乾身，豆沙嘅味道好香甜，但就略嫌碎咗啲！