六小館

入亞博睇姜濤演唱會前，先同朋友去東涌站東薈城既「六小館」飲茶，預先為體力叉電！餐廳裝潢非常雅緻同闊落，玻璃窗位置仲有好靚嘅開揚山景，見到環境已經首先心心眼～餐廳主打新派粵菜，食物質素唔單止好，仲非常有心思！✢ 本地溫室蕃茄濃湯和牛湯米＄108湯底濃郁並帶有蕃茄嘅清甜同微酸味，米粉煮得軟硬適中，和牛軟嫩仲有好多片，加埋好足料嘅粒粒蕃茄，非常推薦勁開胃！✢ 紅米鮮蝦帶子腸粉 ＄ 72腸粉就食得多，但係用紅米做嘅腸粉就真係第一次試。紅米皮裹住炸得香脆可口嘅大蝦，特別又好味，鍾意食腸粉嘅一定要試吓！✢ 魚子帶子燒賣＄62呢款點心非常矜貴，大大粒帶子放喺燒賣上邊，仲用咗魚子一齊蒸，將燒賣嘅層次昇華。✢ 鹹水角＄52以綠色趣緻啤梨造型登場鹹水角，味道亦相當唔錯，外皮仲非常脆。如果同小朋友一齊食嘅話，相信一定吸引到佢哋試～✢ 紫薯南瓜粿＄52最後食埋甜品紫薯南瓜粿，造型相當有趣，紫薯餡好香而且唔會過甜，大滿足！鍾意食有質素點心同中菜嘅朋友，真係要試吓！