阿木台灣麵 (豉油街)

Open Now

Now Closed

【油尖旺區】【阿木台灣麵】最近都去咗幾次台灣，不過去到台灣都唔係成日食台灣菜，所以呢一日同域哥喺旺角食嘢，都有啲掛住台灣菜嘅風味而想食。咁講到喺旺角食台灣嘢，我諗都冇乜邊度可以代替到「阿木台灣麵」喺我心目中嘅地位。佢哋成日好多人排隊，咁啱有位就入去啦。當時都兩點幾，我哋都有啲餓，域哥試咗碗 $79 嘅「紅燒牛肉牛筋麵」，我冇份食，但睇見都幾濃郁，佢都食得好滋味。而我自己就試 $65 嘅「炸排骨便當」，豬扒用台式炸法攪到勁邪惡，配合埋肉燥飯同是日三款配菜，成件事都幾滿足，好多嘢食咁呀。不過咁樣唔代表我哋就可以唔嗌小食，先試 $39 嘅「鹽酥雞」，香噴噴大大碟，椒鹽粉又勁香，最重要係啲雞都幾嫩滑，唔會炸到好老。然後試埋 $62 嘅「鹵牛腱」，又大件又腍，肥瘦均匀，鹵得又好味，食肉獸一定中意，呢兩款小食都畀到幾大驚喜我。講吓嘢飲喇，食台灣嘢冇理由唔飲埋台式飲品嘅，我哋有叫主食嘅話飲品可以減五蚊，所以域哥原本試 $25 嘅「芝士岩鹽奶蓋炭燒烏龍茶」變成 $20，我試 $22 嘅「黑糖珍珠鮮奶」就變成 $17，幾好飲，減咗價之後仲抵咗。咁樣散叫法埋單先 $292，唔貴。。。（地址：旺角豉油街60