Owl’s Stage (Closed)

【油尖旺區】【Owl’s Stage】同春哥嚟到太子搵嘢食，以前一定係傾向行去旺角方向睇，但係今次心血來潮就向返深水埗嗰邊睇。又唔太想食荔枝角道嗰堆傳統老店，就入一條街，半推半就之下入咗呢間酒吧西餐食 lunch。最緊要係我上司春哥 okay，我呢啲冇乜所謂嘅啫，好識做人嘅。我哋試兩樣嘢，首先上菜嘅係 $118 嘅「法式卡邦尼煙肉洋蔥意粉」，我哋 share 食，佢哋嘅卡邦尼唔係好似其他咁打到一 pat pat 蛋黃醬，而係比較乾身，芝士香同鹹香都幾豐盈。同埋意粉嘅口感唔會話腍到糊仔咁，有返啲「咬口」，煙靱啲，幾好食嘅。另一款我哋試咗嘅係 $98 嘅「黑啤酒漿脆炸比目魚柳薯條」，個脆漿好得，炸到脆卜卜得嚟冇影響到比目魚嘅鮮味同口感，配合埋炸薯條，送酒一流。不過我哋都只係飲咗各 $28 嘅「凍檸茶」同「菠蘿汁」，都係健康好飲嘅正常之作，埋單 $299，唔錯喎。。。（地址：太子大南街27-31號富威閣地下3-4號舖）@owls.stage#1amfoodie #foodie #hkfoodie #thatfoodiething #hkfood #food #instafood #yummy