德家日式燒肉店 (Closed)

爸爸話想食燒肉放題，做女嘅梗係即刻book間放題餐廳同佢食啦 。揀咗旺角創興廣場嘅德家燒肉，因cp值高，二百幾蚊又有各種肉類，又有海鮮，日式主菜無限任食，出面又有得攞沙律 ，前菜 ，例如糖心蛋，麻醬豆腐，又有好多款飲品。 肉類嘅選擇都好多，單單係牛都有大約十款，例如牛脊肉， 一口牛，牛舌，牛胸腹等等 。還有雞腿肉，五花腩，羊架等。海鮮方面最喜歡蝦，因為超新鮮，肉質非常彈牙，不斷encore.我還愛吃燒菠蘿，燒甜玉子，燒日本番薯仔。 我個人推介一定要試下海鮮粥，因為食咁多肉，有啲粥暖下胃，有啲米氣落肚，個肚舒服好多，而且海鮮粥好足料，食到有一條條嘅蟹肉，海鮮味好濃，所以好美味。最後，除咗可以出去攞唔同嘅甜品之外，仲可以每人叫一款雪米糍，有三種口味，選擇有芒果味，香芋味同雲呢拿味，食埋個雪米糍就非常飽。