常滿雞煲火鍋專門店 (Closed)

半年前食過，半年後同同一班朋友再嚟。原本有兩間地鋪，我哋上次坐靚裝少少嗰間已經執咗。依家得返一間地鋪，得十張細枱左右。我哋前一日打電話嚟想訂七半，但店員話得七點，但無限時。枱留15min，人數過半先入得。我七點到，見店內已坐滿，有啲疑惑，不過原來旁邊唐樓樓梯上兩層，有個無招牌嘅單位變咗「私竇」，四正裝修開咗幾圍。「私竇」燈光比較暗，但反而更有feel，環境比上次貼地，幾張大枱圍爐好有氣氛。有電視播電影同波。得一位姐姐加一個啤酒妹，人手不夠，難免有啲錯漏，但姐姐算勤力有禮，尚可體諒。有時我哋更會自助去攞湯加湯。。老火湯無咗，所有自家製飲品都無咗。叫了一隻雞份量嘅麻辣雞煲，$198，少麻少辣。雞件不多，而且唔係真．一隻雞，入面有三四隻雞翼尖同雞腳。麻辣度適中，惹味帶少許香辣。勝在唔油，聽其他食客講，呢度雞不經油泡，所以唔會好似出面一般雞煲咁勁多油。就算之後加水打邊爐都好清，唔使去油都得。火鍋配料，墨魚滑、凍豆腐、響鈴都好正，菜嘅份量都多。每人$200頭，如有有citibank卡仲有折。