開爐重慶老火鍋

Open Now

Now Closed

今日同老公、仔仔、奶奶一行四人首次惠顧，叫咗三個一人午餐鍋再加碟萵苣。一人鍋包括菜籃（生菜、鴨血四片、粟米兩舊、南瓜三片）、手打丸（牛、鯪魚、蝦各二）、主菜（拉麵、紅薯粉、苕粉、白飯四選一）、配菜（牛肩、豬肉、羊肉三選一，安格斯加$10）同飲品（汽水，特飲加$12-$30）、湯底（蕃茄、重慶麻辣、山珍鮮菌）。菜籃同手打丸都好鮮，似乎並非隔夜貨。主菜試盡三款麵，紅薯粉勁快熟需要快手處理，拉麵亦似新鮮貨需要時間烹煮，苕粉最有驚喜，應該係薯粉表親，口感一樣但厚啲闊啲，滑亦不爛。豬肉、牛肩正常貨，安格斯就食出另一層次。蕃茄湯底濃郁偏酸，麻辣就有正常so味。萵苣鮮甜，正。$88一鍋，萵苣$28，免茶免加一。抵到爛，一定會再幫襯。