上海佬餐館 (Closed)

一個人浮浮下去灣仔搵食，記起杜老誌台有間“上海佬”，响樓下見個餐牌都幾啱食，就沿彎梯拾級而上。坐低先知原來餐牌包哂全部款式，只需揀湯同點心，好啱貪新鮮鍾意試嘢嘅我。環境風格走中國化現代型格，漆黑配暗紅燈籠，枱面放咗唔同顏色嘅龍，唔知點解有隻玩具熊坐响張中國長背椅。可能由於接近2點，餐廳冇乜人。落咗單唔夠10分鐘，店方用咗4分鐘上哂前菜同主菜，因擔心放涼影響味道，我快手咁影完相就即刻食。醉雞冇酒香味，而且如果有汁會冇咁乾，但胸位嚟講唔嚡。小黃瓜爽口。燻魚甜甜地幾好。金沙蝦仁太鹹。酸辣湯濃稠調味適中但欠個性。五香排骨夠香味，酸甜度剛好，惟質地太腍唔似食肉。毛豆百頁冇過鹹但有雪菜香味，百頁又冇黐埋一pat，幾好。小籠包15分嚟埋，皮薄湯汁帶肉香甜。桂花酒釀丸子帶桂花清香微甜，冇平時成日食到嘅酒釀微酸，丸子軟糯帶粉，都幾好。雖然廚房好快上哂啲菜，但樓面嘅侍應招呼好好，見我食緊嘢放低時會講聲唔好意思，主動幫客斟茶，又詢問是否可上甜品。一個人食中菜唔多選擇，呢度食物水準都可以，環境有型，坐得舒服，招呼唔錯，想靜靜地嘅可以嚟。