一家

Open Now

Now Closed

約半年前疫情嗰陣每星期都起碼去一家堂食或外賣三四次，住左係筲箕灣咁多年呢間上海菜雖然價錢唔平，裝修及環境亦不過不失，但勝在味道夠正宗及有水準，同埋覺得嗰陣個男經理服務態度好又細心所以才經常光顧。不過後來我自己搬左過九龍之後就好耐無幫襯。尋日番開筲箕灣探家人於是帶埋佢地去一家諗住回味一下，入到去氣氛已經唔同左加上假期堂食都無乜客已經心知不妙，坐左一陣見唔倒之前個男經理我估佢應該無做，而家呢班侍應一係低頭識玩手機一係就圍埋傾偈，舉手又睇唔到要大叫先識埋嚟最後仲要落錯單。點心方面叫勉強保持水準，但其餘嗰幾樣炒餸真係不敢恭維，等得耐都算碟碟一係無味一係就太鹹，我唔駛問都知肯定換咗大廚啦，成家人都覺得極度失望！我見最近啲食評讚到天上有地下無咁好明顯係鱔稿，當然亦唔排除佢哋味覺有問題，無論點都好上天係公平嘅呢啲低水準餐廳最終都會被市場淘汰。